ရွှေ့ပြောင်းလုပ်သား များပြားတဲ့ တာချီလိတ်မြို့မှာ စစ်ဏာသိမ်းပြီးချိန်မှစတင်ကာ စီးပွားရေး ကျဆင်းလာလို့ ရွှေ့ပြောင်း လုပ်သားတွေ အနေနဲ့ နေထိုင်စားသောက် စရိတ်နဲ့ ရရှိတဲ့ လုပ်ခလစာ မျှတအောင် ကြိုးစား နေရပေမယ့် အခုလို အိမ်ငှားရမ်းခတွေ မြင့်တက်လာလို့ အခက်ခဲတွေနဲ့ ကြုံတွေ့နေရတာ ဖြစ်ပါတယ်။
ဒီနေ့ ၁ လပိုင်း ၅ ရက်ကနေစပြီး အိမ်လစာတွေ တိုးကောက်မယ်ဆိုပြီး သတင်းတွေ ထွက်နေတယ်။ စစ်တပ်က အာဏာရူးပြီး ကတည်းက စီးပွားရေးက လုံးဝ မကောင်းဘူး။ အရင်လို ရှာဖွေ စားသောက်ရတာ မလွယ်တော့ဘူး။ အရင်က အိမ်လခ၊ ရေဖိုး၊ မီးဖိုး အကုန်ပေါင်းမှ ဘတ် ၂,၀၀၀ ကျော်လောက်ပဲ ကျတာ။ အခု ဘတ် ၃,၇၀၀ ကျော်လောက် ရှင်းနေရတယ်။ ထပ်တိုးကောက်မယ်ဆို အိမ်ကို လစာ ပြန်ပို့ဖို့က မလွယ်တော့ဘူး။ အခုဆို လကုန် အကုန်ရှင်းပြီး (ကျပ်) ၅ သောင်းလောက်ပဲ ပြန်ပို့နိုင်တယ်
လို့ တာချီလိတ်မြို့မှာ လုပ်ကိုင်နေတဲ့ ရွှေ့ပြောင်း လုပ်သား တစ်ဦးက ပြောပါတယ်။
လက်ရှိ တာချီလိတ်မြို့မှာ အိမ်ငှားခတွေ ထပ်တိုးကောက်ခံမယ်လို့ အိမ်ရှင်တွေက ပြောဆိုပြီးနောက် သာမန် နေအိမ် အခန်းငှားခတွေကို အနည်းဆုံး ဘတ် ၅၀၀ ကနေ ဘတ် ၁,၅၀၀၊ ဘတ် ၂,၀၀၀ အထိ တိုးမြှင့်ကောက်ခံလျက် ရှိနေတာပါ။
ပြီးခဲ့တဲ့လက နေအိမ် အခန်းငှားတဲ့ ပိုင်ရှင်တွေကို တာချီလိတ်မြို့နယ် ပြည်တွင်း အခွန်များဦးစီးဌာနက အခွန်ကျသင့်ငွေ အပြင် ဘတ် ၅,၀၀၀ မှ ဘတ် ၁၀,၀၀၀ အထိ ထပ်ဆောင်း ကောက်ခံခဲ့တယ်လို့ တာချီလတ် သတင်းဌာနက ဖော်ပြပါတယ်။
စစ်တပ်အာဏာသိမ်းပြီး နောက်ပိုင်း တာချီလိတ်မြို့မှာ အခွန်အခတွေ ထပ်တိုး ကောက်ခံနေတဲ့အပြင် တရားမဝင် အွန်လိုင်း လောင်းကစားလုပ်ငန်းတွေ ကျယ်ပြန့်လာပြီး နေအိမ်ခန်း ငှားရမ်းမှု များပြားလာရာက အိမ်ခန်းငှားရမ်းခတွေ ဈေးတိုးတောင်းတဲ့အတွက် သာမန် ရွှေ့ပြောင်းအလုပ်သမားတွေ အခက်အခဲဖြစ်လာနေတာ ဖြစ်ပါတယ်။
