ဒေါ်သန်းမြင့်အောင်ကို စစ်အာဏာသိမ်းခဲ့တဲ့ နေ့က ဖမ်းဆီးခဲ့ပြီး ပုဒ်မ ၅၀၅ (က) နဲ့ ထောင်ဒဏ် ၃ နှစ် ချမှတ်ခဲ့တာ ဖြစ်ပါတယ်။
ဒေါ်သန်းမြင့်အောင်၊ ဦးအောင်ကိုတို့က ညကတည်းက လွတ်လာတာပါ။ ကိုကျော်ဇေယျနဲ့ ကိုထင်လင်းဦး ကတော့ အိမ်မရောက်ကြသေးဘူး
လို့ သူကပြောပါတယ်။
ရန်ကုန်တိုင်း စည်ပင်သာယာကော်မတီဝင် ဒေါ်သန်းမြင့်အောင်ကို တပ်မတော်ပြိုကွဲအောင် လှုံ့ဆော်မှုနဲ့ စစ်ကောင်စီက ၂၀၂၁ ခုနှစ်၊ ဒီဇင်ဘာလ ၂၇ ရက်မှာ ထောင်ဒဏ် ၃ နှစ် ချမှတ်ခဲ့တာပါ။
ဇန်နဝါရီလ ၄ ရက်မှာ ကျရောက်တဲ့ ၇၅ နှစ်မြောက် လွတ်လပ်ရေးနေ့ အထိမ်းအမှတ်အဖြစ် အကျဉ်းထောင် အသီးသီးရှိ အကျဉ်းသားတွေကို လွှတ်ပေးမယ်လို့ သတင်းတွေ ထွက်ပေါ်နေပြီး နိုင်ငံရေးအကျဉ်းသားတချို့ လွတ်မြောက်လာတာပါ။
လွတ်လပ်ရေးနေ့မှာ လွတ်ငြိမ်းပေးတဲ့ အကျဉ်းသား၊ အကျဉ်းသူတွေထဲမှာမှ နိုင်ငံရေးအမှုနဲ့ ပြစ်ဒဏ်ကျခံနေရသူတွေကို ပြစ်ဒဏ်ကျန်ကာလ ၁ နှစ်အောက် တွေကိုသာ စိစစ်လွှတ်ပေးတာ တွေ့ရှိရတယ်လို့လည်း ရှေ့နေတစ်ဦးက ပြောပါတယ်။
ကြားထားတဲ့ သတင်းအရတော့ ရာဇသတ်ကြီးပုဒ်မ ၅၀၅-က ၅၀၅(က) ၅၀၅(ခ) အမှုတွေနဲ့ ထောင်ဒဏ် ကျခံနေရသူတွေထဲက ကျခံရန် ကျန်ကာလ ၁ နှစ်အောက် အကျဉ်းသားတွေကို ကျန်တဲ့ပြစ်ဒဏ် လွတ်ငြိမ်းခွင့်ပြုပြီး လွှတ်မယ်။ ကျခံရန် ကျန်ကာလ ၁ နှစ်အထက် ကျန်သူတွေကို ပြစ်ဒဏ်ရဲ့ ၆ ပုံ၁ပုံ လျှော့ပေါ့ လွှတ်ငြိမ်းပေးမယ် ကြားရပါတယ်။ အမိန့်စာ မမြင်ရသေးတော့ အတည်မပြုနိုင်သေးပါ။ ကြားတဲ့သတင်း မှန်ရင် ပြစ်ဒဏ် ၂ နှစ်ချခံရသူတွေ အားလုံးလွတ်ပါမယ်။ ပြစ်ဒဏ် ၃ နှစ်ကျသူတွေကတော့ ချုပ်ရက် ထောင်နေသား၊ လျှော့ရက်စနစ်များအရ တွက်ကြည့်တဲ့အခါ ၂၀၂၁ မေလအထိ ဖမ်းဆီးခံရပြီး ပြစ်ဒဏ်ကျခံရသူတွေ လွတ်နိုင်ပါတယ်
လို့ သူက သုံးသပ်ထားပါတယ်။
အခု ပြန်လည် လွတ်မြောက်သူတွေထဲမှာ ဂျာနယ်လစ် တစ်ချို့လည်း ပါဝင်တယ်လို့ သိရပါတယ်။
စစ်ကောင်စီက မနေ့ညက လွှတ်ပေးတဲ့အထဲ စာရေးဆရာမ ဒေါ်သန်းမြင့်အောင်၊ သာသနာရေးဝန်ကြီး သူရဦးအောင်ကို တို့ပါဝင်ပြီး ဒီနေ့ လွှတ်ပေးမယ့်စာရင်းထဲမှာ စာရေးဆရာ ထင်လင်းဦး၊ လွှတ်တော်ကိုယ်စားလှယ် ဒေါ်နီနီမေမြင့်၊ မော်ကွန်း သတင်းထောက်ချုပ် ကိုကျော်ဇေယျနဲ့ ဂျာနယ်လစ်အချို့ ပါဝင်တယ်လို့ သိရပါတယ်။
လက်ရှိ လွတ်မယ့် စာရင်းထဲပါဝင်သူ အချို့ရဲ့ မိသားစုဝင်တွေဟာ အင်းစိန်ထောင်ဝမှာ စောင့်ဆိုင်းနေဆဲဖြစ်တယ်လို့ သိရပါတယ်။
