မဲခေါင်၊ စက်တင်ဘာ ၂၆
ရှမ်းပြည်တောင်ပိုင်း၊ ရွှေညောင်မြို့၊ ပြည်ထောင်စုလမ်းမကြီးပေါ်တွင် စက်တင်ဘာ ၂၆ ရက် နေ့လယ်ပိုင်းက ၁၂ ဘီး ကုန်တင်ယာဉ်နှင့် ဆိုင်ကယ်တိုက်မိပြီး Grade-7 ကျောင်းသူတစ်ဦး သေဆုံးသွားကြောင်း သိရသည်။
ရွှေညောင်မြို့၊ မင်္ဂလာရွှေဗဟိုရ်ရပ်ကွက်၊ ပြည်ထောင်စုလမ်းမကြီး၊ မိုင်တိုင်အမှတ် (၁၀၂/၅ နှင့် ၁၀၂/၆) ကြား၊ ရွှေညောင်ကဖေး စားသောက်ဆိုင်ရှေ့၌ ရွှေညောင်ဘက်မှ တောင်ကြီးဘက်သို့ အောင်မြင့်သူ (၃၂ နှစ်) မောင်းနှင်လာသည့် MITSUBISHI FUSO အမျိုးအစား ခဲ/ပြာရောင် ၁၂ ဘီး မော်တော်ယာဉ်သည် ရှေ့မှ Grade-8 ကျောင်းသူ မနန်းပွင့်ဦး -၁၅ မောင်းနှင်ပြီး Grade-7 ကျောင်းသူ မနေခြည်မင်း ၁၄ နှစ်လိုက်ပါလာသည့် YAMAHA ဆိုင်ကယ်အား ကျော်တက်စဉ် ၁၂ ဘီးယာဉ်၏ ဘေးဖောင်းမီးကိုင်းဖြင့် ပွတ်တိုက်မိခဲ့ခြင်းဖြစ်သည်။
ယာဉ်တိုက်မှုကြောင့် ဆိုင်ကယ်မောင်းနှင်သူ မနန်းပွင့်ဦးတွင် မျက်ခုံး၊ မေးစေ့နှင့် ခြေဖမိုး ပေါက်ပြဲဒဏ်ရာများ (မစိုးရိမ်ရ) ရရှိခဲ့ပြီး နောက်မှ လိုက်ပါသူ မနေခြည်မင်းတွင် ခါး၊ ပေါင်နှင့် ခြေသလုံး ဒဏ်ရာများအပြင် မိန်းမ ကိုယ်မှ သွေးထွက်ဒဏ်ရာ စိုးရိမ်ရဒဏ်ရာများ ရရှိခဲ့သည်။
ဒဏ်ရာရရှိသူများအား တောင်ကြီးမြို့၊ စဝ်စံထွန်းဆေးရုံသို့ အရေးပေါ် ပို့ဆောင်ကုသပေးခဲ့သော်လည်း စိုးရိမ်ရဒဏ်ရာရရှိခဲ့သူ မနေခြည်မင်းမှာ ယမန်နေ့ စက်တင်ဘာ ၂၆ ရက် ညနေ ၃နာရီ ၃၅ မိနစ်အချိန်တွင် ရရှိသောဒဏ်ရာများဖြင့် သေဆုံးသွားခဲ့ကြောင်း သိရသည်။
အဆိုပါ ဖြစ်စဉ်နှင့်ပတ်သက်၍ မော်တော်ယာဉ်အား မဆင်မခြင် မောင်းနှင်သူ ယာဉ်မောင်း အောင်မြင့်သူအား ရွှေညောင်မြို့ နယ်မြေရဲစခန်းတွင် ဥပဒေအရ အမှုဖွင့် အရေးယူဆောင်ရွက်ထားကြောင်း သိရသည်။
#MeKongNews
#ရှမ်းတောင်
#ရွှေညောင်
#ဆိုင်ကယ်
#ပွတ်တိုက်မိ
#ကျောင်းသူ
