မဲခေါင်၊ စက်တင်ဘာ ၈

တရားမဝင်ကုန်စည်ဖမ်းဆီးရမိသည့် ပို့ကုန်/သွင်းကုန် အမှုပေါင်း ၈မှုကိုပေါင်းကာ ကျိုင်းတုံမြို့နယ်တရားသူကြီး ဦးအောင်ကိုကိုက ထောင်ဒဏ်တစ်လသာ ချမှတ်ခဲ့ကြောင်း တရားရေးအသိုင်းအဝိုင်း သတင်းရင်းမြစ်များက မဲခေါင်သို့ပြောသည်။

ပြီးခဲ့သည့်လအတွင်းက ကျိုင်းတုံ၊ ဝမ်တာပင်းဂိတ်တွင် တရားမဝင်ကုန်စည်တင်ကား ၈စီးကို ဖမ်းဆီးရမိပြီးနောက် ကုန်သည်တစ်ဦးကို ပို့ကုန်/သွင်းကုန် ဥပဒေဖြင့် အမှု ၈ မှု တရားစွဲဆိုခဲ့ခြင်းဖြစ်ပြီး ယင်းအမှုများကို မြို့နယ်တရားသူကြီး ဦးအောင်ကိုကိုက ကျပ်သိန်း ထောင်ဂဏန်းလာဘ်စားကာ စုစုပေါင်း ထောင်ဒဏ် တစ်လသာ ချမှတ်ခဲ့ခြင်းဖြစ်ကြောင်း သတင်းရင်းမြစ်များက ပြောသည်။

“အမှုအားလုံးပေါင်းပြီး ထောင်တစ်လပဲချတယ်။ ပိုက်ဆံမရတဲ့ အမှုဆိုရင်တော့ ဘာဖြစ်ဖြစ်ထောင်ချတာပဲ။ မြို့နယ်တရားသူကြီးက တော်တော်ဆိုးနေတယ်” ဟု ၎င်းက ပြောသည်။

မြို့နယ်တရားသူကြီး ဦးအောင်ကိုကိုသည် အမှုသည်များထံမှ လာဘ်ငွေတောင်းခံရာ၌ နေပြည်တော်အတွက်ပါ ပေးရသည်ဟုဆိုကာ ပိုတောင်းလေ့ရှိကြောင်း တရားရေး သတင်းရင်းမြစ်တစ်ဦးက ပြောသည်။

“သူက နေပြည်တော်ကလာတယ်၊ လူကြီးတွေနဲ့ပိုင်တယ်၊ တရားလွှတ်တော်ချုပ် တရားသူကြီး ဦးကိုကိုနိုင်ရဲ့ တပည့်ဆိုပြီး လုပ်ချင်တာ လုပ်နေတာ” ဟု ၎င်းက ပြောသည်။

ပြီးခဲ့သည့် လပိုင်းအတွင်းကလည်း လူသေဆုံးစေမှု၊ နာကျင်စေမှု၊ အပြင်းအထန်နာကျင်စေမှုများဖြင့် အမှုဖွင့်ခံထားရသူတစ်ဦးကို ကျိုင်းတုံမြို့နယ် တရားသူကြီး ဦးအောင်ကိုကိုက လာဘ်စားကာ ပြစ်မှု ၃ခုအတွက် ထောင်ဒဏ် ၆ လသာ ချမှတ်လိုက်သည့်အတွက် ပြည်သူအများ၏ ဝေဖန်မှုကို ခံနေရသူတစ်ဦးကဖြစ်သည်။

#MeKongNews
#ကျိုင်းတုံမြို့နယ်
#တရားသူကြီး
#လာဘ်စား
#ဦးအောင်ကိုကို

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)