မဲခေါင်၊ ဇူလိုင် ၂၄
ရှမ်းပြည်အရှေ့ပိုင်း၊ မိုင်းဆတ်မြို့နယ်တွင် မူးယစ်တပ်ဖွဲ့မှ ရဲအရာရှိ ရာဇာ ဆိုသူက အသက် ၂၁ နှစ်အရွယ် ဒေသခံလူငယ်တစ်ဦးကို Happy Pod သုံးခု တွေ့ရှိသည်ဟုဆိုကာ ဖမ်းဆီးပြီး မိသားစုထံမှ ထိုင်းဘတ်ငွေ ၁ သိန်း တောင်းခံခဲ့ရာ မိသားစုက ဘတ် ၃သောင်းဖြင့် ညှိနှိုင်းထုတ်ယူခဲ့ရကြောင်း မိသားစုနှင့် နီးစပ်သူများထံမှ သိရသည်။
မိသားစုမှ ဘတ်တစ်သိန်း မပေးနိုင်သဖြင့် ရဲစခန်းသို့ လက်ထိပ်ခတ် ခေါ်ဆောင်သွားကာ ကိုယ်ထိလက်ရောက် ထိုးကြိတ်ရိုက်နှက်ပြီးနောက် မိသားစုက ငွေဘတ် ၃ သောင်းဖြင့် ပြန်လည်ရွေးယူခဲ့ရကြောင်း မိသားစုနှင့် နီးစပ်သူများထံမှ သိရသည်။
ပြီးခဲ့သည့် မေလ ၂၈ ရက်နေ့ ညနေပိုင်းက ဖြစ်ပွားခဲ့ခြင်းဖြစ်ပြီး မူးယစ်တပ်ဖွဲ့ ရဲအရာရှိ ရာဇာ ဆိုသူ ဦးဆောင်သည့် ရဲအဖွဲ့သည် ယင်းလူငယ်အား Happy Pod များ လက်ဝယ်တွေ့ရှိသည်ဟု ဆိုကာ ဖမ်းဆီးခဲ့ပြီး မိသားစုထံမှ ထိုင်းဘတ်ငွေ ၁ သိန်း တောင်းခံခဲ့ကြောင်း၊ မိသားစုက မပေးနိုင်သဖြင့် ၎င်းအား ထိုးကြိတ်ရိုက်နှက်ခဲ့ကြောင်း ဟု မိသားစုနှင့် နီးစပ်သူတစ်ဦးက မဲခေါင်သို့ ပြောသည်။
“စခန်းကို ခေါ်ဆောင်သွားတယ်ဆိုရင် ဥပဒေအတိုင်း အမှုဖွင့်ပါ။ လက်ထိပ်ခတ်ပြီး အဆမတန် ရိုက်နှက်စရာ မလိုပါဘူး။ ခုဟာက မူးယစ်တပ်ဖွဲ့က တရားဥပဒေအတိုင်း အမှုရအောင် ရှာတာမဟုတ်ဘဲ ငွေတောင်းနေတဲ့ လိုင်စင်ရ ဓားမြတွေ ဖြစ်နေတယ်။ မြို့ပေါ်က KTV နဲ့ ဘားတွေဆီကနေကျတော့ လိုင်းကြေးငွေယူပြီး မသိချင်ယောင် ဆောင်နေကြတာ။ အဲဒီနေရာတွေမှာ Happy Pod တွေကို လူတိုင်း လွတ်လပ်စွာ သုံးစွဲနေကြတာကို မဖမ်းဘဲ၊ အခုလို သာမန်လူငယ်ကိုမှ တမင်လုပ်ကြံ အမှုဆင် ဖမ်းဆီးပြီး ငွေညှစ်တာ” ဟု ၎င်းကပြောသည်။
လက်ရှိတွင် မိုင်းဆတ်မြို့ပေါ်ရှိ ဘားများနှင့် KTV များ၌ Happy Pod အပါအဝင် မူးယစ်ဆေးဝါးများကို ပေါ်တင် သုံးစွဲနေကြသည်ကိုမူ မူးယစ်ရဲတပ်ဖွဲ့က ဖမ်းဆီးခြင်းမရှိဘဲ လိုင်းကြေးယူ ဖုံးကွယ်ပေးထားပြီး ယခုကဲ့သို့ အပြစ်မဲ့ အရပ်သား လူငယ်များကို အဓမ္မ အမှုဆင် ဖမ်းဆီးရိုက်နှက်ကာ ငွေညှစ်နေသည့် မူးယစ်ရဲအရာရှိ ရာဇာ နှင့် အဖွဲ့အား ဒေသခံများက ဝေဖန်နေကြသည်။
#MeKongNews
#မိုင်းဆတ်မြို့နယ်
#မူးယစ်ရဲ
#ငွေညှစ်
#မူးယစ်ဆေးဝါး
