မဲခေါင်၊ ဇူလိုင် ၁၇

ရှမ်းပြည်တောင်ပိုင်း၊ အောင်ပန်းမြို့ရှိ ကုန်စိမ်းဈေးကွက်၏ ဇူလိုင် ၁၆ ရက် ဈေးနှုန်းစာရင်းအရ ခရမ်းချဉ်၊ ရွှေပဲနှင့် ကြက်သွန်နီတို့မှာ ဈေးကောင်းရရှိနေသည့် ကုန်စည်များဖြစ်လာပြီး ပန်းပွင့်၊ ဂေါ်ဖီ၊ အာလူး၊ ကြက်သွန်ဖြူ၊ ဂျင်းဥမနှင့် ဒညှင်းသီးတို့မှာ အလယ်အလတ်ဈေးဖြင့် အရောင်းအဝယ်ဖြစ်နေသည်။

ဇူလိုင် ၁၂ ရက်က ကြက်သွန်ဖြူ၊ အာလူး၊ မုန်လာဥနီနှင့် ဒညှင်းသီးတို့ ဈေးကောင်းရနေခဲ့သော်လည်း လက်ရှိဈေးကွက်တွင် ခရမ်းချဉ်သီး၊ ရွှေပဲနှင့် ကြက်သွန်နီတို့ ဝယ်လိုအားမြင့်တက်လာပြီး ဈေးကွက်ကို ဦးဆောင်လာကြောင်း ကုန်သည်များက ပြောသည်။

ခရမ်းချဉ်ဈေးကွက်တွင် ဂွတ်သီးတစ်ပိဿာ နှစ်ထောင့်ငါးရာကျပ်၊ ရှယ်သီး နှစ်ထောင့်သုံးရာကျပ် နှင့် အသေးသီး နှစ်ထောင်ကျပ် အထိ ပေါက်ဈေးရှိနေပြီး ဈေးနှုန်းတည်ငြိမ်သော်လည်း အရောင်းအဝယ်သွက်လက်နေကြောင်း သိရသည်။

ရွှေပဲ ရှယ်တစ်ပိဿာ တစ်သောင်းသုံးထောင်ကျပ် နှင့် အလတ်စတစ်ပိဿာ တစ်သောင်းတစ်ထောင်ကျပ် အထိ ရှိနေပြီး ယခင်ရက်များထက် ဈေးမာလာသည့် အခြေအနေရှိသည်။

ထို့အပြင် ကြက်သွန်နီအသစ် အဆင့်(၁) တစ်ပိဿာ ငါးထောင့်သုံးရာကျပ်၊ အဆင့်(၂) ငါးထောင်ကျပ်၊ အဆင့်(၃) လေးထောင့်ခုနစ်ရာကျပ် နှင့် အဆင့်(၄) လေးထောင်ကျပ် ဖြင့် အရောင်းအဝယ်ဖြစ်နေပြီး ဈေးကောင်းရရှိနေသည့် ကုန်စည်စာရင်းတွင် ပါဝင်လာသည်။

ယခင်သီတင်းပတ်က ဈေးကောင်းရရှိနေသည့် အာလူးနှင့် ဒညှင်းသီးတို့မှာ လက်ရှိတွင် ဈေးနှုန်းတည်ငြိမ်နေပြီး အာလူး တစ်ပိဿာ နှစ်ထောင်ကျပ်မှ လေးထောင့်ခုနစ်ရာကျပ် နှင့် ဒညှင်းသီး တစ်ပိဿာ သုံးထောင့်ငါးရာကျပ် ဖြင့် အရောင်းအဝယ်ဖြစ်နေကြောင်း သိရသည်။

ပန်းပွင့်၊ ဂေါ်ဖီ၊ ဂျင်းဥမတို့မှာလည်း အလယ်အလတ်ဈေးဖြင့်သာ ရောင်းဝယ်နေပြီး ဈေးကွက်အတွင်း ထူးခြားသည့် အပြောင်းအလဲမရှိကြောင်း သိရသည်။

တစ်ဖက်တွင် မုံညှင်းမှာ ယခင်အပတ်ကကဲ့သို့ပင် ဈေးနှုန်းကျဆင်းနေဆဲဖြစ်ပြီး တစ်ပိဿာလျှင် ခုနစ်ရာကျပ်မှ တစ်ထောင်ကျပ် သာ ရရှိနေကြောင်း သိရသည်။ ကုန်ဝင်ရောက်မှုများပြားနေခြင်းနှင့် ဝယ်လိုအားနည်းပါးခြင်းတို့ကြောင့် ဈေးနှုန်းဖိအား ဆက်လက်ရှိနေသည်ဟု ကုန်သည်များက ဆိုသည်။

“ဒီတစ်ပတ်မှာ ရွှေပဲနဲ့ ကြက်သွန်နီက ပိုပြီး ဈေးကောင်းလာတယ်။ ခရမ်းချဉ်လည်း အရောင်းသွက်တယ်။ မုံညှင်းကတော့ အရင်အပတ်လိုပဲ ကုန်ဝင်များပြီး ဈေးမတက်သေးဘူး” ဟု အောင်ပန်းကုန်စိမ်းဈေးကွက်မှ ကုန်သည်တစ်ဦးက မဲခေါင်သို့ ပြောသည်။

ကုန်သည်များ၏ ပြောကြားချက်အရ မိုးရာသီကာလအတွင်း ကုန်စည်ဝင်ရောက်မှုပမာဏ၊ ရာသီဥတုအခြေအနေနှင့် ဝယ်လိုအားပေါ်မူတည်၍ ဈေးနှုန်းအပြောင်းအလဲများ ဆက်လက်ဖြစ်ပေါ်နိုင်ကြောင်း သိရသည်။

#MeKongNews
#အောင်ပန်း
#ကုန်စိမ်း
#ခရမ်းချဥ်
#ရွှေပဲ
#ကြက်သွန်နီ
#မုန်ညှင်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)