မဲခေါင်၊ ဇွန် ၂၆
ရှမ်းပြည်မြောက်ပိုင်း၊ မူဆယ်မြို့၊ ကောင်းမှုလွယ်နယ်မြေ ကောင်းမှုတုံရပ်ကွက်ရှိ နေအိမ်တစ်လုံးကို ဝင်ရောက်ဖမ်းဆီးရာ ကျားဖြန့်တရုတ် ၇ ဦးကို သက်သေပစ္စည်းများနှင့်အတူ ဖမ်းဆီးရမိသည်ဟု စစ်ကောင်စီက သတင်းထုတ်ပြန်သည်။
ယမန်နေ့ ဇွန် ၂၅ရက် နေ့လယ် ၁ နာရီခွဲခန့်တွင် ကောင်းမှုတုံရပ်ကွက်ရှိ ကျားဖြန့်လုပ်နေသည့် နေအိအိမ်တစ်လုံးကို ဝင်ဖမ်းရာ တရားမဝင်ကျားဖြန့်တရုတ်နိုင်ငံသား အမျိုးသား ၇ ဦးအား ဖုန်းမျိုးစုံ ၅၀ လုံး၊ All In One ကွန်ပျူတာ ၂ လုံး၊ Laptop ၁ လုံး၊ ဆိုင်ကယ် ၂ စီး၊ အခြားလုပ်ငန်းသုံး ဆက်စပ်ပစ္စည်းများနှင့်အတူ ဖမ်းဆီးရမိခဲ့ခြင်းဖြစ်သည်ဟု စစ်ကောင်စီကဆိုသည်။
ပြီးခဲ့သည့် ဇွန် ၂၄ ရက်တွင်လည်း မူဆယ်မြို့ ဟိုမွန်ရပ်ကွက်တွင် ကျားဖြန့်တရုတ် ၄ ဦးကို စစ်ကောင်စီက ဖမ်းဆီးမိခဲ့သေးသည်။
ယင်းအွန်လိုင်းလိမ်လည်လောင်းကစားမှုများလုပ်ကိုင်လျက်ရှိသည့် ဖမ်းဆီးရမိသူများအား လိုအပ်သည့်စစ်ဆေးမှုများ ဆောင်ရွက်ပြီးစီးပါက ထိရောက်ပြင်းထန်စွာ အရေးယူဆောင်ရွက်သွားမည်ဟု စစ်ကောင်စီက ဆိုသည်။
လက်ရှိတွင် မူဆယ်မြို့၌ ကျားဖြန့်ရုံများကို စစ်ကောင်စီက မကြာခဏ ဖမ်းဆီးပြနေသော်လည်း ဖမ်းဆီးသည့် ရုံများမှာ လူ ၁၀၀ မပြည့်သည့် ရုံအသေးစားများသာဖြစ်ပြီး လူထောင်ချီသည့် ကျားဖြန့်ရုံကြီးများကိုမူ ဖမ်းဆီးခြင်း မရှိသဖြင့် မူဆယ်ပြည်သူများကလည်း ဝေဖန်လျက်ရှိသည်။
မူဆယ်မြို့တွင် ကျားဖြန့်ရုံ ၅၈ ရုံ၊ လောင်းကစားရုံ ၈၇ ရုံ၊ အနှိပ်ခန်း ၇၂ ခု၊ ပြည့်တန်ဆာရုံ အကြီး၃၉ ရုံ အသေး၅၉ ရုံ၊ တရားမဝင် အပေါင်ဆိုင်လုပ်ငန်း ၄၃ ခု ရှိပြီး တစ်လလျှင် ကျားဖြန့်ရုံကြီး ကျပ်သိန်း၂၀၀၊ ရုံအသေး သိန်း ၆၀ မှ သိန်း ၁၀၀ ထိ လစဉ်လကုန်ပြီး ၅ ရက်အတွင်း မူဆယ်ခရိုင်ရဲတပ်ဖွဲ့များထံ ဆက်ကြေးငွေပေးရသည်။
ရှမ်းပြည်မြောက်ပိုင်း၊ မူဆယ်မြို့တွင် စစ်ကောင်စီတပ်နှင့် ပြည်သူ့စစ်အဖွဲ့ ၁၅ ဖွဲ့ထက်မနည်းရှိပြီး မူးယစ်ဆေးဝါး၊ လောင်းကစားဝိုင်း၊ ကျားဖြန့်ရုံ၊ ပြည့်တန်ဆာရုံများ များပြားလွန်းသဖြင့် ခိုးမှု၊ ဓားပြတိုက်မှု၊ လုယက်မှု၊ ပြန်ပေးဆွဲမှုများ မကြာခဏဖြစ်ပွားလျက်ရှိသည်။
#MeKongNews
#မူဆယ်
#ကျားဖြန့်တရုတ်
#စစ်ကောင်စီ
#ဖမ်းဆီး
