မဲခေါင်၊ ဇွန် ၂၃
ရှမ်းပြည်တောင်ပိုင်း၊ အေးသာယာမြို့တွင် EPC ဝန်ထမ်းမှ ရပ်ကွက်များအတွင်း လိုက်ကောက်ထားသည့် မီတာခများကို ဌာနသို့ပေးသွင်းခြင် းမပြုသည့်ကိစ္စ ပြည်သူများက ဌာနသို့တိုင်ကြားရာ အေးသာယာ EPC က ၎င်းတို့တာဝန်မရှိဟု ငြင်းဆိုပြီး မီတာခ ကျသင့်ငွေများကို ထပ်မံပေးဆောင်ခိုင်းကြောင်း သိရသည်။
ယင်းဖြစ်ရပ်မှာ ရပ်ကွက်အားလုံးလိုလိုမှ ပြည်သူအချို့ထံမှ မီတာခတစ်လလျှင် ကျပ် ၃ သောင်းခန့်နှင့် အနည်းဆုံး ၃ လစာ ကျပ်တစ်သိန်းဝန်းကျင်ဖြင့် အိမ်ထောင်စုများစွာထံမှ ကောက်ယူထားပြီး ဌာနသို့ မပေးသွင်းခြင်းဖြစ်ကြောင်း သိရသည်။
” ကျမတို့က မီတာခကို လစဉ်လတိုင်း မီတာစာရွာလာပေးပြီဆိုတာနဲ့ တစ်ခါထဲ ထည့်ဆောင်လိုက်ပါတယ်၊။ ဝန်ဆောင်ခ ပေးပီးတော့ပေါ့ ၊ ကြာပါပီ အဲလိုဆောင်နေတာ။ အဲ့မှာ ဒီ ၅ လပိုင်းမှာ မီတာခ ၃ သောင်းကျော် ကျပါတယ်။ အဲဒါနဲ့ သူလာယူမအားလို့ kpay နဲ့ လွှဲလို့ရတယ်ဆိုလို့ လွှဲလိုက်တာ နောက်လကျတော့ မီတာစာရွက်မှာ မီတာကြွေးတွေ ပါလာတယ်။ မေးတော့လဲ ကျနော် ဆောင်ပြီးပြီပြောလိုက်မယ် ဘာညာနဲ့၊ အခုလလဲ အကြွေးက ၄ သောင်းကျော် ပါလာတယ်။ အဲဒါ ပြောတော့လဲ ကျနော်ပြောလိုက်မယ် ဘာညာနဲ့ နောက်မှ အဲလိုမျိုး ခံရတဲ့သူက ကိုယ်တွေတစ်အိမ်ထဲ မဟုတ်ဘူး၊ အများကြီးပဲ၊ မီတာဆောင်ရမယ့် ငွေတွေကို မီတာမဆောင်ဘဲ ဖြတ်ခုတ်သွားတာ၊ ဟိုရက်က EPC ရုံးမှာသွားပြောတော့၊ သူတို့နဲ့မဆိုင်ဘူး အဲကောင်ကိုလဲ အလုပ်ထုတ်ပလိုက်ပြီ ဆိုတော့ လတွေစုကုန်ပီအကြွေးကျန်တွေများကုန်တာပေါ့။ အချို့ အိမ်တွေကို အကြွေးကို ၁ သိန်းကျော်လောက်ကျန်တယ်၊ ဒဏ်ကြေးတွေရော”ဟု အေးသာယာရပ်ကွက် ၁၁ နေသူတစ်ဦးက ပြောသည်။
ပြည်သူထံမှ မီတာခကောက်ပြီး အစိုးရသို့ ငွေမသွင်းသည့် အေးသာယာ EPC ဝန်ထမ်းမှာ လင်းပြည့်စုံဦး ဆိုသူဖြစ်ပြီး ၎င်းကိုတရား ဝင်ခန့်ထားပြီး တာဝန်မယူဟု ဆိုသည့် အေးသာယာ EPC အနေဖြင့် ပြည်သူများသို့သာမီတာခများ သွင်းခိုင်းနေပြီး ပေးသွင်းမှု မရှိပါက မီးဖြတ်််မည်ဟုသာ ခြိမ်းခြောက်နေသည်ဟု ပြည်သူများက ပြောသည်။
၎င်းကို အလုပ်ထုတ်လိုက်ပြီဟု ပြောသော်လည်း အမှန်မှာ ၎င်းကို ဟိုပုံးမြို့သို့ ပြောင်းရွှေ့လိုက်ခြင်းသာ ဖြစ်သည်ဟု ပြည်သူအချို့က ပြောသည်။
“ရပ်ကွက်မှာ၂ လည်း အိမ်တိုင်းလိုလိုကို ခုလိုပဲ အလိမ်ခံလိုက်ရတာပါ။ ကျမအိမ်ဆိုရင် တစ်နှစ်စာနီးပါ ပါသွားတာပါ၊ တချိို့အိမ်ဆိုရင် ၅ သိန်း ၆ သိန်းထိ ကြားရတယ်။ အကြွေးလက်ကျန်ငွေ ကို အမည်းရောင်နဲ့ အုပ်ဖုံးထားတာပါ၊ အိမ်ရဲ့ လူအခြေအနေကြည့်ပြီး စာရွက်တွေပေးခဲ့တာပါ၊ စာရွက်ကိုသေချာကြည့်သော်လည်း မျက်စေ့ရှန်းပြီး သတိမထားမိခဲ့တာကြောင့် နှစ်ချုပ်မှ သိရတာတွေများပါတယ်။ ရုံးကို အကျိုးအကြောင်း ပြောပြတော့လည်း အလုပ်ထုတ်လိုက်ပီချည်းပဲ ပြောတယ်၊ သူတို့ရဲ့လင်ကဖြင့် ငွေအမောင့်များတဲ့အိမ်တချို့ကို ရုံးယူနီဖောင်းနဲ့ စာရွက်လိုက်ဝေနေတုန်း၊ ကိုယ်’အ’လို့ ကိုယ်ခံရတာလို့ ခနဲ့တဲ့တဲ့ပြောဆိုတဲ့ ဝန်ထမ်းက ရှိသေး၊ ကြည့်ရတာ အလိုတူ အလိုပါ ပူးပေါင်းလုပ်စားနေတာလို့ပဲ ထင်မိတယ်။ ၃ လထိ မီတာခလာမဆောင်ရင် မီးဖြတ်မယ်ဆို.နင်တို့သာ မီးလာဖြတ်ခဲ့ရင် ငါတို့အလိမ်ခံရတာ စောသိတော့ နည်းနည်းသက်သာနိုင်သေးတယ်။ နင်တို့က လုပ်စားဂွင် တမင် ‘ဟ’ ပေးထားတာလား”ဟု ဒေသခံတစ်ဦးကဆိုသည်။
တာဝန်ရှိ အစိုးရဌာနတစ်ခုအနေဖြင့် ဖြစ်ပေါ်နေသည့် ပြဿနာကို အလွယ်တကူပင် အလုပ် ထုတ် လိုက်ပြီဟုဆိုကာ တာဝန်ယူမှု၊ တာဝန်ခံမှုမရှိလုပ်ဆောင်မှု၊ ပြဿနာဖြစ်ပွားနေမှုကို စုံစမ်းစစ်ဆေးမှု မပြုလုပ်ဘဲ ပြည်သူများသို့သာ ပုံချတာဝန်ယူစေမှု၊ လုပ်ပိုင်ခွင့်သုံးပြီး ပြည်သူကို လိမ်လည်သည့်အပြင် နိုင်ငံတော်ဘဏ္ဍာငွေ ကိုပါ အပျောက်ရိုက်သည်ကို ထိထိရောက်ရောက် ဥပဒေအရ အရေးမယူမှုများဖြင့် အစိုးရဌာတစ်ရပ်အနေဖြင့် ဂုဏ်သိက္ခာမဲ့သည့် လုပ်ရပ် ဖြစ်ပေါ်လျက်ရှိနေသဖြင့် နစ်နာနေသည့် ပြည်သူများအတွက် လိုအပ်သည်များ ရှမ်းအစိုးရက အရေးယူပေးရန် လိုလားလျက်ရှိကြကြောင်း သိရသည်။
#MeKongNews
#ရပ်ကွက်မီတာခ
#အေးသာယာ
#EPC
#လိမ်ပြေးမှု
