မဲခေါင်၊ ဇွန် ၂၂
ရွာငံမြို့နယ် တစ်နေရာတွင် တော်လှန်ရေးတပ်ဖွဲ့အမည် အလွဲသုံးစားပြုလုပ်၍ ဓားပြတိုက်ရာတွင် ပါဝင်သူ တစ်ဦးကို ဖမ်းဆီးအရေးယူထားသည်ဟု ဓနုဒေသအခြေစိုက် ပြည်သူ့ကာကွယ်ရေးတပ်မတော် – ၁၀၀၃ တပ်ရင်းက ယနေ့တွင် သတင်းထုတ်ပြန်သည်။
ဓားပြတိုက်ရာတွင် ပါဝင်သူတစ်ဦးကို ဖမ်းဆီးမိခဲ့သော်လည်း ကျန်ရှိသည့် အဖွဲ့ခေါင်းဆောင်နှင့် အဖွဲ့ဝင်များမှာ ထွက်ပြေးတိမ်းရှောင်နေဆဲ ဖြစ်ပြီး ဓားပြတိုက်ရာတွင် ပါဝင်သူများမှာ အသက်မပြည့်သေးသည့် လူငယ်များ ပါဝင်နေသည်ကိုလည်း တွေ့ရသည်ဟု ၁၀၀၃ တပ်ရင်းက ဆိုသည်။
ဓားပြတိုက်မှု ကျူးလွန်သူသည် ငွေကြေးလိုအပ်ချက်အရ သေနတ်အတုများ၊ ဓားများကိုအသုံးပြုကာ ဓားပြတိုက်ခဲ့ကြောင်း ဖမ်းဆီးခံရသူက ဝန်ခံထွက်ဆိုထားသည်ကိုလည်း ထုတ်ပြန်ချက်ဗီဒီယိုတွင် တွေ့ရသည်။
“ခေါင်းဆောင်က ဂိမ်းဆော့ရအောင်ဆိုပြီး ခေါ်တာ လိုက်သွားလိုက်ရင်းနဲ့ ဂိမ်းရှုံးတော့ ခေါင်းဆောင်က ဝေစုပေးမယ်ဆိုတာနဲ့ ဓားပြတိုက်တာကို လိုက်သွားလိုက်တယ်။ မျက်နှာအုပ်ထားပြီး တိုက်တယ်။ ဓားပြတိုက်ရာမှာလည်း သေနတ်အတုနဲ့ ဓားတွေကို အသုံးပြုတယ်။ ခေါင်းဆောင်က အိမ်ပေါ်တက်ပြီးတိုက်တယ်။ တစ်ခေါက်က သိန်း ၂၀ ဝေစုရတယ်။ အဲ့ရတဲ့ သိန်း၂၀ ကိုလည်း ကျနော်က ဂိမ်းဆော့လိုက်တယ်။ နောက် ၅ ရက်နေတော့ ခေါင်းဆောင်က ခေါ်လို့ နောက်တစ်အိမ် ဓားပြထပ်တိုက်တယ်။ ကျနော်က ၃ သိန်းရတယ်”ဟု ထွက်ဆိုထားသည်ကို တွေ့ရသည်။
ယင်းဓားပြတိုက်မှု ကျူးလွန်သူများသည် တော်လှန်ရေးတပ်ဖွဲ့များ၏အမည်ကို အသုံးပြုကာ တော်လှန်ရေးတပ်ဖွဲ့များနှင့် ပြည်သူများကြား၊ တော်လှန်ရေးတပ်ဖွဲ့များ အချင်းချင်းကြား ယုံကြည်မှု ကင်းမဲ့စေရန် သတင်းအမှားများ ဖြန့်ဝေခဲ့သည်ကိုလည်း စစ်ဆေးတွေ့ရှိရသည့်အပြင် ဓားပြတိုက်သူများသည် ပြစ်မှုကျူးလွန်ပြီးနောက် ၁၀၀၃ တပ်ရင်မှူးအမည်ကို အသုံးပြုကာ ၁၀၀၃ တပ်ရင်းမှူးက ၎င်းတို့ကို ခိုင်းစေသယောင် သတင်းမှားများ ဖြန့်ဝေခဲ့သည်ကိုလည်း စစ်ဆေးတွေ့ရှိခဲ့သည်ဟု ၁၀၀၃ တပ်ရင်းက ပြောသည်။
ထို့ပြင် ဓားပြတိုက်မှု ကျူးလွန်သူများသည် အွန်လိုင်းလောင်းကစားစလော့ဂိမ်းနှင့် မူးယစ်ဆေးသုံးစွဲသူများ ဖြစ်နေသည်ကိုလည်း တွေ့ရသဖြင့် အွန်လိုင်းလောင်းကစား စလော့ဂိမ်းကစားသူများ မူးယစ်ဆေးဝါး သုံးစွဲသူများကိုပါ အရေးယူမှုပြုလုပ်သွားမည်ဟုလည်း ၁၀၀၃ တပ်ရင်းက ပြောသည်။
ထိုကြောင့် ယခုလိုပြည်သူများအပေါ် ဓားပြတိုက်မှုများ ကျူးလွန်လုပ်ဆောင်နေသည်မှာ အဓိက စလော့ဂိမ်းနှင့် မူးယစ်ဆေးသုံးစွဲမှုများကြောင့် ငွေကြေးလိုအပ်ချက်အရ လုပ်ဆောင်ခြင်းဖြစ်သည်ကို တွေ့ရသဖြင့် ယခုကဲ့သို့ဖြစ်စဉ်များ ထပ်မံမဖြစ်ပွားစေရန် ၁၀၀၃ တပ်ရင်းအနေဖြင့် ဓနုဒေသတွင်း စလော့ဂိမ်းကစားသူများနှင့် မူးယစ်ဆေးသုံးစွဲရောင်းဝယ်နေသူများကို အရေးယူသွားမည်ဟု ဆိုသည်။
#MeKongNews
#တော်လှန်ရေးတပ်ဖွဲ့
#ဓားပြတိုက်
#ဓနုအခြေစိုက်
#ပြည်သူ့ကာကွယ်ရေးတပ်မတော်
