မဲခေါင်၊ ဇွန် ၂၂
၁၅၁ နှစ်ပြည့် ကရင်နီအမျိုးသားနေ့ အထိမ်းအမှတ်အဖြစ် အကျဉ်းသား ၃၉ ဦးကို ပြစ်ဒဏ်လွတ်ငြိမ်းချမ်းသာခွင့်ပေးလိုက်သည်ဟု ကရင်နီပြည် ကြားကာလအုပ်ချုပ်ရေးကောင်စီ – IEC က သတင်းထုတ်ပြန်သည်။
ယမန်နေ့ ဇွန် ၂၁ ရက်တွင် ကျရောက်သည့် ကရင်နီအမျိုးသားနေ့တွင် ယင်းပြစ်ဒဏ် ကျခံလျက်ရှိနေသည့် အကျဉ်းသား ၃၉ ဦးကို ကရင်နီပြည်၏ ကြားကာလအစီအမံ အပိုဒ် ၇၅၊ အပိုဒ်ခွဲ (ခ) အရ ပြစ်ဒဏ်လွတ်ငြိမ်းချမ်းသာခွင့်ပေးလိုက်ခြင်းဖြစ်သည်ဟု IEC က ဆိုသည်။
လွတ်ငြိမ်းချမ်းသာခွင့် ရရှိသည့်သူများမှာ ၂၀၂၆ ခုနှစ် ဇွန် ၂၁ ရက် မတိုင်မီ ကျူးလွန်ခဲ့သည့် ပြစ်မှုတစ်ခုခုနှင့် စပ်လျဉ်း၍ ပြစ်ဒဏ်ချမှတ်ခြင်းခံရသည့် အကျဉ်းထောင် အကျဉ်းစခန်း အသီးသီးတွင် အကျဉ်းကျခံရသော အကျဉ်းသူ အကျဉ်းသားများဖြစ်သည်ဟု IEC ထုတ်ပြန်ချက်အရ သိရသည်။
ယခုကဲ့သို့ လွတ်ငြိမ်းချမ်းသာခွင့်ပေးခြင်းမှာ ၁၅၁ နှစ်မြောက် ကရင်နီအမျိုးသားနေ့ အထိမ်းအမှတ်အဖြစ်သော်လည်းကောင်း၊ လူသားချင်းစာနာထောက်ထားမှုကို အလေးထားသောအားဖြင့်လည်းကောင်း လွတ်ငြိမ်းချမ်းသာခွင့်ပေးခဲ့ခြင်းဖြစ်သည်ဟု IEC က ထုတ်ပြန်ချက်တွင် ပြောသည်။
ပြီးခဲ့သည့် နှစ်တွင်လည်း ကရင်နီအမျိုးသားနေ့ အထိမ်းအမှတ်အဖြစ် IEC သည် အကျဥ်းသား ၂၈ ဦးကို လွတ်ငြိမ်းချမ်းသာခွင့်နှင့် ၁၄၈ ဦးကို ပြစ်ဒဏ်လျှော့ပေါ့ခွင့် ပေးခဲ့သည်။
#MeKongNews
#ကရင်နီအမျိုးသားနေ့
#အကျဥ်းသား
#IEC
#လွတ်ငြိမ်းချမ်းသာခွင့်
