မဲခေါင်၊ ဇွန် ၂၀

တရားဝင်လူနေထိုင်ခွင့်မရှိသည့် လယ်မြေများအပါအဝင် ရွာမြေအများအပြားကို တာချီလိတ်မြို့နယ်၊ ပါဆတ်ရပ်ကွက်အတွင်း၌ ပွဲစားများက တရားဝင်သဖွယ် ကျယ်ကျယ်ပြန့်ပြန့်ရောင်းချသည့် ကိစ္စများ ပိုမိုဆိုးရွာလာပြီး ယင်းမြေကွက်အရောင်းအဝယ်များကို အုပ်ချုပ်ရေးမှူး စိုင်းခမ်းအွန်က ငွေကြေးရယူကာ လက်မှတ်ထိုး စာချုပ်ချုပ်ပေးနေကြောင်း ဒေသခံများက မဲခေါင်သို့ ပြောသည်။

ယင်းသို့ တရားမဝင် ရောင်းချနေသည့် မြေကွက်များကို ရောင်းဝယ်ရာတွင် ရပ်ကျေးအုပ်ချုပ်ရေးမှူးများက ငွေကြေးရယူကာ အသိအမှတ်ပြု စာချုပ် ချုပ်ပေးနေပြီး မြေကွက်တစ်ကွက်လျှင် ဘတ် ၃သောင်းမှ သိန်းဂဏန်းအထိ ပေးရကြောင်း ဒေသခံများက ပြောသည်။

“ခမ်းအွန်က မပြောင်းရသေးဘူး။ အတောင်းအရမ်းကြမ်းတယ်။ မြေကွက်တွေလည်း တရားဝင်ဝင်၊ မဝင်ဝင် အရောင်းအဝယ် စာချုပ်ချုပ်ပေးတယ်။ ဘတ် ၄၊ ၅သောင်းယူတယ်။ အဆောက်အဦဆောက်ဖို့ စည်ပင်ထောက်ခံစာတောင်းရင်လည်း ရစ်တယ်။ သူ့ဆီမှာ လက်မှတ်မထိုးထားရင်လည်း ရစ်တယ်။ ပိုက်ဆံမပေးရင် မလုပ်ပေးဘူး” ဟု တာချီလိတ်ဒေသခံတစ်ဦးက ပြောသည်။

ယင်းကဲ့သို့ အကွက်ရိုက်ရောင်းချမှုများကို သက်ဆိုင်ရာဝန်ထမ်းများက တရားလို ပြုလုပ်ကာ တရားစွဲဆိုရမည်ဖြစ်သော်လည်း ဝန်ထမ်းများအနေဖြင့် မြေပွဲစားများထံမှ လာဘ်ငွေရယူကာ မသိကျိုးကျွံပြုနေကြောင်း ဥပဒေရေးရာ နားလည်သည့် ဒေသခံတစ်ဦးက ပြောသည်။

“ဘတ် တစ်သိန်းသွင်းရုံနဲ့ အရစ်ကျနဲ့ရမယ်ဘာညာဆိုပြီး နည်းမျိုးစုံနဲ့ တစ်တော့မှာ ကြော်ငြာပြီး ရောင်းနေကြတာ။ တကယ်တမ်းဖြစ်ရင် ဝယ်တဲ့သူတွေပဲခံရမှာ။ ဒီလိုဝယ်တယ်ဆိုတာလည်း ငွေကြေးသိပ်မတတ်နိုင်တဲ့ လူတန်းစားများတယ်။ ရှေ့မှာလည်း ဖြစ်ခဲ့တဲ့ ဥပမာတွေ မနည်းဘူး” ဟု ၎င်းက ပြောသည်။

၂၀၁၆ ခုနှစ်ခန့်မှ စပြီး လယ်မြေများကို အခြားအသုံးပြုခွင့် ပိတ်ထားသော်လည်း တာချီလိတ်မြို့တွင်မူ ၂၀၂၁ ခုနှစ်နောက်ပိုင်း မြို့အနီးအနားကျေးရွာများမှ လယ်မြေများကို လုပ်ငန်းရှင်များနှင့် ပွဲစားများက မြေဖို့ကာ အကွက်ရိုက်ရောင်းချနေကြခြင်း ဖြစ်ပြီး ဌာနဆိုင်ရာများကလည်း လာဘ်ငွေယူကာ မသိကျိုးကျွံပြုထားကြောင်း ဒေသခံများက ပြောသည်။

ပွဲစားများက ပြီးခဲ့သည့် နှစ်ပိုင်းအတွင်း အကွက်ရိုက်ရောင်းချသည့် မြေများကို လူမှုကွန်ယက်များမှ တဆင့် Live လွှင့် ရောင်းချခြင်း၊ အရစ်ကျဖြင့် ရောင်းချခြင်းများ ပြုလုပ်နေကြပြီး စာချုပ်ချုပ်သည့်အခါတွင် ရပ်ကွက်အုပ်ချုပ်ရေးမှူး ရုံးများ၌ ငွေပေးကာ အရောင်းအဝယ် စာချုပ်ချုပ်ကြကြောင်း၊ ယင်းဖို့မြေများမှာ ပြသနာတစ်စုံတစ်ရာတက်ပါက မြေကွက်ပေါ်မှ အဆောက်အဦများ ပြန်ဖျက်ပေးရသည်များလည်းရှိသည့်အတွက် ပိုင်ဆိုင်မှု အာမခံချက် မရှိသည့် မြေများကို ရောင်းမှား ဝယ်မှားမဖြစ်စေရန် သတိပြုဖို့လိုကြောင်း နားလည်တတ်ကျွမ်းသူများက သတိပေးထားသည်။

#MeKongNews
#တာချီလိတ်
#လယ်မြေ
#အကွက်ရိုက်ရောင်း
#တရားမဝင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)