မဲခေါင်၊ ဇွန် ၁၇
ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ်တွင် အွန်လိုင်းလောင်းကစားဂိမ်း ကစားသူများ မြင့်တက်လာခြင်းကြောင့် KPay ဖြင့် ငွေသွင်း၊ ငွေထုတ် ဝန်ဆောင်မှုပေးကာ စီးပွားရေးလုပ်ကိုင်သူများလည်း ပိုမိုများပြားလာကြောင်း ဒေသခံများထံမှ သိရသည်။
အွန်လိုင်းလောင်းကစားဂိမ်းများ ကစားရန်ငွေသွင်း၊ ငွေထုတ်ရာတွင် KPay ဝန်ဆောင်မှုကို အဓိကအသုံးပြုနေကြပြီး ကျပ်ငွေတစ်သိန်းလျှင် ငွေသွင်း၊ ငွေထုတ် ဝန်ဆောင်ခအဖြစ် ကျပ်တစ်သောင်းခန့်အထိ ကောက်ခံကြသဖြင့် အမြတ်အများအပြား ရရှိကြောင်း ဒေသခံတစ်ဦးက ပြောသည်။
“ကျနော်တို့ဆိုင်ဆို နေ့စဉ် အနည်းဆုံး လူ ၅၀ လောက် ငွေသွင်းပေးရတယ်။ အွန်လိုင်းအကောင့်ထဲ ငွေလာထည့်တဲ့သူတွေက အသက်အရွယ်စုံပဲ။လူလတ်ပိုင်းတွေကတော့ ပိုများတယ်” ဟု ဒေသတွင်း KPay ငွေလွှဲဝန်ဆောင်မှုသပေးသူတစ်ဦးက ပြောသည်။
ဒေသခံများ၏ ပြောကြားချက်အရ အွန်လိုင်းလောင်းကစားဂိမ်းများတွင် ဆယ်ကျော်သက်အရွယ်မှစ၍ လူလတ်ပိုင်းနှင့် သက်ကြီးပိုင်းအထိ ပါဝင်ကစားနေကြပြီး စလော့ဂိမ်း၊ ကျွဲဂိမ်း အစရှိသည့် လောင်းကစားဂိမ်းများကို အများဆုံး ကစားနေကြကြောင်း သိရသည်။
“အွန်လိုင်းလောင်းကစားက အစမှာ အမြတ်ပေးသလို ထင်ရပေမယ့် နောက်ဆုံးမှာတော့ ငွေဆုံးရှုံးမှုနဲ့ မိသားစုဒုက္ခကိုပဲ ချန်ထားခဲ့တာ များပါတယ်။ KPay ဆိုင်တွေ များလာတာဟာ စီးပွားရေးကောင်းလာလို့ မဟုတ်ဘဲ အွန်လိုင်းလောင်းကစား ငွေသွင်း၊ ငွေထုတ် လုပ်တဲ့သူတွေ တိုးလာတာကြောင့် ဖြစ်တယ်လို့ မြင်ပါတယ်။ လောင်းကစားမှာ အနိုင်ရသူထက် အရှုံးသမားက ပိုများပါတယ်။ အခုလို လူငယ်တွေကအစ အသက်အရွယ်စုံ ပါဝင်လာတာက ဒေသရဲ့ အနာဂတ်အတွက် စိုးရိမ်စရာဖြစ်နေပါတယ်” ဟု ဒေသခံတစ်ဦးက မဲခေါင်သို့ ပြောသည်။
စစ်တပ်အာဏာသိမ်းပြီးနောက်ပိုင်း ဓနုကိုယ်ပိုင်အုပ်ချုပ်ခွင့်ရဒေသတွင် အွန်လိုင်းလောင်းကစားနှင့် မူးယစ်ဆေးဝါး သုံးစွဲမှုများ ပိုမိုများပြားလာပြီး ယင်းအခြေအနေများကြောင့် ခိုးမှု၊ လုယက်မှုကဲ့သို့သော မှုခင်းများလည်း မကြာခဏ ဖြစ်ပွားနေကြောင်း ဒေသခံများက ပြောသည်။
ပြီးခဲ့သည့် မေ ၁၉ ရက်တွင်လည်း ပင်းတယမြို့နယ်၊ မြင်းမူးကျေးရွာ၌ အွန်လိုင်းစလော့ဂိမ်း လောင်းကစားပြီး အကြွေးပြဿနာများကြောင့် မူလတန်းပြကျောင်းဆရာမတစ်ဦးက ဓားပြတိုက်မှု ကျူးလွန်ရာမှ သားအမိ ၂ ယောက် သေဆုံးခဲ့သည့် ဖြစ်စဉ်ရှိခဲ့ကြောင်း ဒေသခံများထံမှ သိရသည်။
#MeKongNews
#ပင်းတယ
#အွန်လိုင်း
#လောင်းကစားဂိမ်း
#KPay
