မဲခေါင်၊ ဇွန် ၉

ရှမ်းပြည်မြောက်ပိုင်း၊ နမ္မတူမြို့နယ်တွင် ငါးဖမ်းရန်သွားသည့် ပြည်သူတစ်ဦး မိုင်းနင်းမိရာမှ သေဆုံးသွားသည်ဟု သတင်းရင်းမြစ်များထံမှ သိရသည်။

ပြီးခဲ့သည့် ဇွန် ၅ ရက်တွင် နမ္မတူမြို့နယ် ပန်လုံကျေးရွာမှ ဒေသခံ ၂ ဦးသည် နမ့်မြီးချောင်းတွင် ငါးဖမ်းရန် သွားရာမှ ချောင်းအနီးတွင်ရှိသည့် သစ်ပင်တစ်ပင်အနီးတွင် တစ်ဦးက မိုင်းနင်းမိခဲ့ခြင်းဖြစ်သည်။

“သူတို့က ချောင်းမှာ ငါးသွားဖမ်းရင်း သစ်ပင်ပေါ်တက်တာ သူ့အဖော်က သစ်ပင်ပေါ်တက်သေးတယ် မနင်းမိဘူး။ သူ့အလှည့်ကျမှ သစ်ပင်ခြေရင်းမှာပဲ မိုင်းနင်းမိသွားတာ မိုင်းနင်းမိတဲ့ နေရာမှာပဲ သေသွားတယ်”ဟု ဖြစ်စဉ်ကို သိရှိသူတစ်ဦးက ပြောသည်။

ယင်းကဲ့သို့ မိုင်းနင်းမိပြီး သေဆုံးသွားသည့်သူမှာ ပန်လုံရွာနေ အသက် ၃၀ ခန့်ရှိ အောင်အိုက်ကျန်ဆိုသူဖြစ်သည်ဟု သတင်းရင်းမြစ်ထံမှ သိရသည်။

မိုင်းပေါက်ကွဲမှုအတွင်း သေဆုံးသွားသည့် မောင်အိုက်ကျန်ကို ဒေသခံများက ကောင်းမွန်စွာ သင်္ဂြိုဟ်ပေးခဲ့သည်။

မဲခေါင်သတင်းဌာနမှ လက်လှမ်းမှီသမျှ ကောက်ယူထားသည့် စာရင်းအရ ယခုနှစ်အတွင်း ရှမ်းပြည်မြောက်ပိုင်းတွင် တိုက်ပွဲအကြွင်းအကျန် မိုင်းပေါက်ကွဲမှုများကြောင့် ကလေးငယ် ၆ ဦးအပါအဝင် ထိခိုက်ဒဏ်ရာရရှိသူ ၂၉ ဦးနှင့်သေဆုံးသူ ၇ ဦးရှိသည်။

#MeKongNews
#နမ္မတူ
#မိုင်းနင်း
#ပြည်သူ
#သေဆုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)