မဲခေါင်၊ ဇွန် ၉
ရှမ်းပြည်တောင်ပိုင်း၊ ကလောမြို့၊ အမှတ် (၁) ရပ်ကွက်ရှိ ကလောဆေးရုံဝင်းအပြင်ဘက် ဆေးရုံဝန်ထမ်းအိမ်ရာအနီးမှ အများပြည်သူ ဖြတ်သန်းသွားလာနေသည့် လမ်းကို ကလောခရိုင်ဆေးရုံအုပ် ဆရာဝန်မကြီးက ပိတ်လိုက်သဖြင့် မြို့ခံများ အခက်အခဲဖြစ်ပေါ်နေကြောင်း သိရသည်။
ယင်းလမ်းမှာ ကလောမြို့၊ အမှတ် (၁) ရပ်ကွက်ရှိ ရွှေတောင်ကြားနယ်မြေနှင့် စော်ဘွားကြီးကုန်းနယ်မြေတို့မှ မြို့တွင်းသို့ သွားရာတွင် အဓိကအသုံးပြုနေသည့် လမ်းဖြစ်သဖြင့် ယခုကဲ့သို့ ဖြတ်သန်းခွင့်ပိတ်ပင်ခြင်းမှာ ဒေသခံလူထုအတွက် သွားလာမှု အခက်အခဲများစွာ ဖြစ်ပေါ်လျက်ရှိသည်ဟု မြို့ခံများက ဆိုသည်။
“အခုလို လမ်းပိတ်တာမျိုး မလုပ်သင့်ပါဘူး။ ဒီလမ်းက အများပြည်သူ အသုံးပြုနေတဲ့ လမ်းမို့လို့ တံခါးတောင် မတပ်သင့်တဲ့ နေရာမျိုးပါ” ဟု ကလောဒေသခံတစ်ဦးက ပြောသည်။
ယင်းလမ်းကို လွန်ခဲ့သည့် နှစ် ၇၀ ကျော်ကတည်းက ရွှေတောင်ကြားနှင့် စော်ဘွားကြီးကုန်းနယ်မြေတွင် နေထိုင်ကြသည့် ရပ်ကွက်သူ၊ ရပ်ကွက်သားများအပြင် အခြားအရပ်မှ လာရောက်သူများပါ နေ့စဉ်နှင့်အမျှ ဥဒဟို ဖြတ်သန်းသွားလာခဲ့ကြခြင်း ဖြစ်ပြီး လွန်ခဲ့သည့် နှစ်ပေါင်း ၃၀ ခန့်ကလည်း ကလောမြို့နယ် စည်ပင်သာယာရေးအဖွဲ့၏ စီမံမှု၊ ရပ်ကွက်သူ ရပ်ကွက်သားများ၏ ပူးပေါင်းမှုတို့ဖြင့် လမ်းမြေဖော်ခြင်းနှင့် လမ်းချဲ့ခြင်းလုပ်ငန်းများကို ဆောင်ရွက်ခဲ့ဖူးကြောင်း သိရသည်။
“အခု လမ်းပိတ်တဲ့ကိစ္စကို ပြီးခဲ့တဲ့ ဖေဖော်ဝါရီလက မြို့ခံတွေ စုစည်း လက်မှတ်ထိုးပြီး မြို့စီမံအုပ်ချုပ်ရေးအဖွဲ့ကို တင်ပြခဲ့ကြတယ်။ ခရိုင်အုပ်ချုပ်ရေးမှူး၊ မြို့နယ်အုပ်ချုပ်ရေးမှူး၊ စည်ပင်၊ မြေစာရင်းနဲ့ ရပ်ကွက်အုပ်ချုပ်ရေးမှူးဆီအထိ စာပို့ထားပေမဲ့ အခုထိတော့ ဘာမှ ထူးမလာသေးပါဘူး” ဟု မြို့ခံတစ်ဦးက ဆိုသည်။
ယင်းလမ်းမှာ ယူဇနာလမ်းနှင့် စည်ပင်ဆိုင်ခန်းများမှတစ်ဆင့် မြို့တွင်းသို့ ဆက်သွယ်ထားပြီး နေ့စဉ် လူဦးရေ ၁,၀၀၀ ခန့် သွားလာနေသည့် လမ်းဖြစ်ကြောင်း သိရသည်။
ထို့ပြင် စော်ဘွားကြီးကုန်းနှင့် ရွှေတောင်ကြား အပေါ်ပိုင်းနေရာများသည် ကုန်းမြင့်ပိုင်းတွင် ရှိသဖြင့် သောက်သုံးရေအတွက် ရေသယ်ယာဉ်များကိုသာ အားကိုးနေရရာ လမ်းပိတ်လိုက်သဖြင့် ရေကားများ ဝင်ရောက်နိုင်ခြင်း မရှိတော့သလို မြို့သန့်ရှင်းရေးအတွက် အမှိုက်သိမ်းယာဉ်များ ဖြတ်သန်းမှုမှာလည်း အခက်အခဲဖြစ်နေကြောင်း ဒေသခံများထံမှ သိရသည်။
အခြားလမ်းများဖြစ်သည့် ရွှေတောင်ကြားလမ်းသွယ် (၁) နှင့် (၂) တို့မှာ မတ်စောက်ပြီး ကျဉ်းမြောင်းသဖြင့် ရေသယ်ယာဉ်များ၊ အရေးပေါ်မီးသတ်ကားများနှင့် လူနာတင်ယာဉ်များ ဝင်ရောက်နိုင်ခြင်း မရှိသောကြောင့် ဆေးရုံဝင်းအတွင်းမှ ဖြတ်သန်းသွားလာမှသာ အဆင်ပြေနိုင်မည်ဖြစ်ကြောင်း ဒေသခံများက ပြောသည်။
ဆေးရုံလုံခြုံရေးအတွက် လမ်းပိတ်ခြင်းဖြစ်သည်ဟု ဆိုသော်လည်း အများပြည်သူတို့၏ နေ့စဉ်ဘဝ သွားလာမှု၊ သောက်သုံးရေ ရရှိမှု၊ အမှိုက်သိမ်းဆည်းမှုနှင့် မီးဘေး၊ သဘာဝဘေးအန္တရာယ်များအတွက် အခက်အခဲပေါင်းများစွာ ကြုံတွေ့နေရသဖြင့် လွန်ခဲ့သော နှစ်ပေါင်း ၇၀ ကျော်ကတည်းက အသုံးပြုခဲ့သည့် လမ်းအား ပြန်လည်ဖွင့်လှစ်ပေးရန် ဒေသခံများက အနူးအညွတ် တောင်းဆိုနေကြသည်။
လက်ရှိတွင် စော်ဘွားကြီးကုန်းနယ်မြေ၌ အိမ်ခြေ ၂၀၀ ခန့်၊ လူဦးရေ ၇၀၀ ခန့် နှင့် ရွှေတောင်ကြားအပေါ်ပိုင်းတွင် အိမ်ခြေ ၄၀ ခန့်၊ လူဦးရေ ၂၀၀ ခန့် ရှိရာ စုစုပေါင်း အိမ်ခြေ ၂၄၀ ခန့်မှ လူဦးရေ ၁,၀၀၀ နီးပါး လမ်းပိတ်ဆို့မှုဒဏ်ကို ခံစားနေရကြောင်း စုံစမ်းသိရှိရသည်။
#MeKongNews
#ကလောမြို့
#ဆေးရုံကြီး
#စော်ဘွားကြီးကုန်းရပ်ကွက်
#ရွှေတောင်ကြားနယ်မြေ
