မဲခေါင်၊ မေ ၁၈
ရှမ်းပြည်မြောက်ပိုင်း၊ သိန္နီမြို့တွင် ကိုးကန့်တပ်ဖွဲ့- MNDAA က အမျိုးသားတစ်ဦးကို ဖမ်းဆီးပြီး ငွေကျပ်သိန်း ၃၀၀ ကျော်ဖြင့် ပြန်ရွေးခိုင်းမှု ဖြစ်ပွားခဲ့သည်ဟု မြို့ခံသတင်းရင်းမြစ်များထံမှ သိရသည်။
ပြီးခဲ့သည့် ဧပြီလ ၂၁ ရက်တွင် MNDAA က သိန္နီမြို့ထဲရှိ အမျိုးသားတစ်ဦးကို ဖမ်းဆီးကာ ကျပ်သိန်း ၃၀၀ ကျော် တောင်းခဲ့ခြင်းဖြစ်ပြီး ဖမ်းဆီးထားစဉ်အတွင်းတွင်လည်း ရိုက်နှက်နှိပ်စက်မှု ပြုလုပ်ခဲ့သည်ဟု ဖြစ်စဉ်ကို သိရှိသည့် ဒေသခံ သတင်းရင်းမြစ်တစ်ဦးက ပြောသည်။
“၂၁ ရက်နေ့မှာ ဖမ်းသွားတာ၊ တပတ်လောက် အဖမ်းခံရတယ်။ ၂၈ ရက်နေ့မှာကျမှ ငွေသိန်း ၃၀၀ ကျော် သွားပေးမှ ကိုးကန့်တပ်က ပြန်လွတ်လာတာတဲ့။ တကိုယ်လုံး ရိုက်နှက်ခံထားရတော့ လွတ်လာတဲ့အချိန်ထိ ဒဏ်ရာတောင် မပျောက်သေးဘူး” ဟု ဖြစ်စဉ်ကို သိရှိသည့် သိန္နီမြိုခံတစ်ဦးက ပြောသည်။
အခြားသတင်းရင်းမြစ်တဦး၏ ပြောဆိုချက်အရ ယင်းဖမ်းဆီးခံရသည့် အမျိုးသား၏ မိသားစုဝင်တစ်ဦးသည် သူခိုးတစ်ဦး လာရောင်းသည့် စက်ပစ္စည်းတစ်ခုကို သူခိုးမှန်းမသိပဲ ဝယ်ယူမိသဖြင့် အဖမ်းခံရခြင်းဖြစ်သည်ဟု ဆိုသည်။
“ဝယ်တာက သူဝယ်တာမဟုတ်ဘူး။ သူ့မိသားစုဝင်တစ်ယောက်က သူခိုးလာရောင်းတဲ့ ပစ္စည်းတစ်ခုကို သူခိုးမှန်းမသိပဲ ဝယ်မိတာ။ ပစ္စည်းက ၁၀ သိန်းလောက်ပဲတန်တာ၊ ဒါပေမယ့် ကိုးကန့်တပ်လာဖမ်းတဲ့အချိန်ကျ အိမ်မှာရှိနေတဲ့ သူ့ကို ဖမ်းသွားတာ၊ သူခိုးလည်း ဖမ်းမိပြီ။ သူခိုးလာရောင်းတဲ့ ပစ္စည်းလည်း ပြန်သိမ်းသွားပြီ” ဟု ၎င်းက ပြောသည်။
ဧပြီ ၂၀ ရက်တွင် သူခိုးတစ်ဦး လာရောင်းသည့် စက်ပစ္စည်းတစ်ခုကို ၎င်းအမျိုးသား၏ မိသားစုဝင်တစ်ဦးက သူခိုးမှန်းမသိပဲ ဝယ်ယူထားမိသဖြင့် ဧပြီ ၂၁ ရက် မနက် ၁၁ နာရီဝန်းကျင်တွင် MNDAA က ၎င်းအိမ်ရှင်အမျိုးသားကို လာရောက် ဖမ်းဆီးသွားခြင်း ဖြစ်သည်။
“ပစ္စည်းလည်း သူတို့ ပြန်ယူသွားတယ်။ သူခိုးကိုလည်း ထောင်ချလိုက်တယ်။ အဲဒါကို သူတို့က ပစ္စည်းလက်ခံတဲ့သူကို ငွေညှစ်ချင်တဲ့သဘော။ ဒီတိုင်း ဘာမှမဆီမဆိုင် လက်နက်အားကိုးနဲ့ ငွေညှစ်တာ။ အမှန်ဆိုရင် ဘယ်အစိုးရပဲဖြစ်ဖြစ် ခိုးတဲ့ပစ္စည်းလည်းတွေ့ပြီ သူခိုးလည်း တွေ့ပြီဆိုရင် မသိဘဲ ဝယ်ယူမိတဲ့သူကိုတော့ အာမခံနဲ့ ရပ်ကွက် အုပ်ချုပ်ရေးမှူးတွေဘာတွေနဲ့ ခံဝန်ထိုးပြီး ပြန်လွှတ်ရမယ့် သဘောလေနော်။ အခုက ရိုက်လည်း ရိုက်တယ်။ ပြီးတော့ ပိုက်ဆံလည်း တောင်းတယ်” ဟု ဖြစ်စဉ်ကိုသိရှိသည့် သတင်းရင်းမြစ်က ပြောသည်။
ဖမ်းဆီးခံရစဥ်အတွင်း ယင်းအမျိုးသားကို ကိုးကန့်တပ်သားများက ညိုမဲဒဏ်ရာများ စွဲကျန်သည့်အထိ ရိုက်နှက်နှိပ်စက်ခဲ့ပြီး ၈ ရက်အကြာ ဧပြီ ၂၈ ရက်တွင် ငွေသိန်း ၃၀၀ ကျော်ပေးမှသာ ပြန်လွှတ်ပေးခဲ့ခြင်းဖြစ်သည်။
“သူခိုးပစ္စည်းဝယ်မိလို့ အရေးယူမယ်ဆိုလည်း သူခိုးပစ္စည်းလက်ခံမှုနဲ့ တရားစွဲပြီး အရေးယူလို့ရတယ်လေ။ အခုအဖမ်းခံရပြီး ငွေပေးရတဲ့သူက ကိုယ်တိုင် သူခိုးပစ္စည်းဝယ်မိတာလည်း မဟုတ်ဘူး။ အဲဒါကို ဖမ်းပြီးနှိပ်စက်ခံရ၊ ငွေသိန်း ၃၀၀ လည်းပေးရဆိုတော့ ရပ်ကွက်ထဲက လူတွေလည်း စိတ်မကောင်းဘူး။ အရိုက်ခံရတာလည်း သနားစရာဗျာ။ ကျွဲလို နွာလို အရိုက်ခံခဲ့ရတာ” ဟု ဖြစ်စဉ်ကိုသိရှိသည့် ဒေသခံတစ်ဦးက ပြောသည်။
အလားတူ ပြီးခဲ့သည့် မတ်လတွင်လည်း တူးမီးသေနတ်ဖြင့် တောလိုက်သွားသည့် လားဟူအမျိုးသား ၃ ဦးကို သေနတ်ကိုင်သည်ဆိုသည့် အကြောင်းပြချက်ဖြင့် MNDAA က ဖမ်းဆီးခဲ့ပြီး ငွေကျပ်သိန်း ၁၀၀ ကျော်ဖြင့် ပြန်ရွေးခိုင်းခဲ့သည်။
#MeKongNews
#သိန္နီ
#အမျိုးသားတစ်ဦး
#MNDAA
#ဖမ်းဆီးရိုက်နှက်
