မဲခေါင်၊ မေ ၁၆
ရှမ်းပြည်မြောက်ပိုင်း၊ မူဆယ်မြို့နယ်၊ ကြူကုတ်ပန်ဆိုင်းမြို့တွင် ကိုးကန့်တပ်ဖွဲ့ – MNDAA က တစ်အိမ်တစ်ယောက် စစ်မှုလာထမ်းရန် ဖိအားပေးလုပ် ဆောင်နေသည်ဟု မြို့ခံသတင်းရင်းမြစ်များထံမှ သိရသည်။
MNDAA က သတ်မှတ်ထားသည့် စစ်မှုထမ်းအကျုံးဝင်သူများအနေဖြင့် အမျိုးသားဖြစ်စေ၊အမျိုးသမီးဖြစ်စေ စစ်မှုမထမ်းပါက နေအိမ်ကို ချိပ်ပိတ်မည်ဟု ခြိမ်းခြောက် ပြောဆိုကြောင်းလည်း သတင်းရင်းမြစ်များက ပြောသည်။
ကြူကုတ်ပန်ဆိုင်းမြို့တွင် နေထိုင်သူများအနေဖြင့် အသက် ၁၈ နှစ်ပြည့်ပါက တစ်အိမ်တစ်ယောက် စစ်မှုထမ်းရမည်ဟု MNDAAက သတ်မှတ်ထားခြင်းဖြစ်ပြီး လက်တွေ့တွင် အသက် ၁၈ နှစ်မပြည့်သေးသူများကိုပါ တပ်သားသစ်စုဆောင်းနေသည်ဟုလည်း မြို့ခံသတင်းရင်းမြစ်တစ်ဦးက ပြောသည်။
“ယောကျာ်းလေးရော မိန်းကလေးရော သူတို့သတ်မှတ်ချက်အတိုင်း သွားရတယ်။ မသွားတဲ့ အိမ်တွေကိုလည်း ချိပ်ပိတ်ပြီး သိမ်းတာတွေ စလုပ်နေပြီ။ဒါပေမယ့် တရုတ်တွေ တော်တော်များများကတော့ ပြေးတဲ့လူတွေကလည်း ပြေးကြတယ်။ ပိုက်ဆံရှိတဲ့လူတွေကျတော့ လူတွေငှားပြီး အစားထိုးသွားတာပေါ့။ အရင်တခေါက်လည်း ခေါ်ပြီးပြီ၊ အခုက တခါထပ်ခေါ်တာပေါ့။ ပြောတာကျတော့ အသက် ၁၈ နှစ်လို့ ပြောပေမယ့် လက်တွေ့မှာက အသက်မပြည့်လည်း သွားရတယ် “ ဟု ပန်ဆိုင်းမြို့ခံ အမျိုးသားတစ်ဦးက ပြောသည်။
ယခင်က မူဆယ်မြို့နယ် ပန်ဆိုင်းဒေသတွင် လက်နက်ကိုင်တပ်ဖွဲ့များက ၎င်းတို့၏ သက်ဆိုင်ရာ လူမျိုးများကိုသာ အဓိကထားပြီး တပ်သားသစ် စုဆောင်းကြသော်လည်း လက်ရှိတွင် MNDAA က လူမျိုးတိုင်းကို စစ်သားစုဆောင်းနေသည်ဟုလည်း နောက်ထပ်မြို့ခံတစ်ဦးကပြောသည်။
“ပန်ဆိုင်းမြို့ကို ကိုးကန့်က ထိန်းချုပ်ပြီးနောက်ပိုင်း လူမျိုးတိုင်းကို တပ်သားသစ် စုဆောင်းတယ်။ ရှမ်းတွေကော ပလောင်တွေကော အကုန်ခေါ်တယ်။ ပန်ဆိုင်းမှာနေပြီး တခြားအဖွဲ့မှာ စစ်မှုထမ်းပြီဆိုလည်း မရဘူး သူတို့သတ်မှတ်ချက်ထဲ အကျုံးမဝင်ဘူး။ သူတို့တပ်ဖွဲ့မှာ စစ်မှုထမ်းမှရမယ်တဲ့”ဟု ၎င်းသတင်းရင်းမြစ်က ပြောသည်။
MNDAA သည် လက်ရှိတွင် ၎င်းတို့ထိန်းချုပ်နယ်မြေအတွင်း၌ တပ်သားသစ်.စုဆောင်းမှုများကို အရှိန်အဟုန်ဖြင့် လုပ်ဆောင်နေပြီး စစ်သင်တန်းများကိုလည်း အဆက်မပြတ် ဖွင့်လှစ်သင်ကြားနေသည်။
မေ ၉ ရက်တွင် ကွတ်ခိုင်မြို့နယ် မုံးစီး၊ မုံးဟွမ်ဒေသ၌လည်း တအာင်းတပ်ဖွဲ့ – TNLA ထံ စစ်မှုထမ်းနေသည့်သူများကို MNDAAသို့ ဘက်ပြောင်းစစ်မှုထမ်းရန် နှင့် မပြောင်းပါက ကိုးကန့်ထိန်းချုပ်နယ်မြေမှ တစ်မိသားစုလုံး ထွက်ခွာသွားရန် MNDAA က ဖိအားပေးခဲ့သည်။
ထို့ပြင် ကိုးကန့်တပ်ဖွဲ့သည် ကွတ်ခိုင်မြို့နယ်၊ ဟိုဖျက်ကျေးရွာအုပ်စုတွင်လည်း တစ်ရွာ ၁၀ ယောက် လကုန် နောက်ဆုံးထားပြီး စစ်မှုထမ်းလာရမည်ဟု ကျေးရွာအုပ်ရေးမှူးများမှ တဆင့် တပ်သားသစ်တောင်းဆိုထားသည်။
MNDAA သည် ပြီးခဲ့သည့် ဧပြီ ၂၈ ရက်တွင် မုံးကိုးမြို့၊ ပန်စီတိုင်ကျေးရွာ၌ စစ်မှုလာမထမ်းဘဲ ထွက် ပြေးသည်ဟုဆိုကာ ပြည်သူတစ်ဦး၏ နေအိမ်နှင့်တောင်ယာများကို သိမ်းယူပြီး မိသားစုဝင်များကို ကျေးရွာအတွင်းမှ နှင်ထုတ်ခဲ့သည်။
MNDAA သည် ၁၀၂၇ စစ်ဆင်ရေး ပြီးသည့်နောက်ပိုင်း ၎င်းထိန်းချုပ် နယ်မြေအတွင်းတွင် ကိုးကန့်မဟုတ်သည့် အခြားလူမျိုးများကိုပါ နည်းမျိုးစုံဖြင့် စစ်မှုထမ်းရန် လုပ်ဆောင်နေပြီး သားသမီးထွက်ပြေးပါက မိဘများကို ဖမ်းဆီးထားခြင်းများ ပြုလုပ်နေသည်။
#MeKongNews
#ကြူကုတ်ပန်ဆိုင်း
#MNDAA
#စစ်မှုထမ်းခေါ်
#မူဆယ်
