မဲခေါင်၊ ဧပြီ ၂၃
တာချီလိတ်မြို့နယ်အတွင်းရှိ မြစ်ချောင်းများဖြစ်သည့် မယ်ဆိုင်ချောင်း၊ မယ်ခေါင်ချောင်း၊ မယ်ဟုတ်ချောင်း၊ မယ်ဟောက်ချောင်းနှင့် မဲခေါင်မြစ်တို့တွင် ရေအရည်အသွေးတိုင်းတာခြင်းကို ပတ်ဝန်းကျင်ထိန်းသိမ်းရေးဦးစီးဌာနက ဧပြီလ ၂၃ ရက်တွင် ပြုလုပ်ခဲ့ကြောင်း ဒေသခံများထံမှ သိရသည်။
ရေအရည်အသွေးတိုင်းတာခြင်းကို တိုင်းတာအမှတ် ၆ မှတ် သတ်မှတ်ကာ ပြုလုပ်ခဲ့ပြီး တိုင်းတာအမှတ် (၃)တွင်မူ ရေခမ်းခြောက်နေသည့်အတွက် တိုင်းတာနိုင်ခြင်း မရှိကြောင်း ဒေသခံတစ်ဦးက ပြောသည်။
“အခုတိုင်းပြီးတော့ တောင်ကြီးကို နမူနာပို့မယ်။ ပြီးရင် ရလဒ်ကို အများပြည်သူသိအောင် ကြေညာမယ်လို့ ပြောသွားတယ်။ ပြီးခဲ့တဲ့ရက်က ထိုင်းက မဲခေါင်မြစ်ထဲတိုင်းတာ အာဆင်းနစ်က ၉ ဆများနေတယ်။ မြန်မာဘက်ကတော့ အားလုံးကောင်းပါသည်လို့ အဖြေထွက်လာရင် ရယ်စရာပေါ့ဗျာ။ ပညာသင်ထားတာ လိမ်ဖို့မဟုတ်ဘူးဆိုတာ ပတ်ဝန်းကျင်ထိန်းသိမ်းရေးကလူတွေ သိစေချင်တယ်” ဟု ၎င်းက ပြောသည်။
ရေအရည်အသွေးတိုင်းတာရာတွင် တိုင်းတာ အမှတ်(၁) ကို လွယ်တော်ခမ်းကျေးရွာအုပ်စုရှိ လွယ်တော်ခမ်းတံတားအနီး မယ်ဆိုင်ချောင်း၊ တိုင်းတာအမှတ်(၂) ကို မယ်ခေါင်ရပ်ကွက်အတွင်းရှိ ချစ်ကြည်ရေးတံတားအမှတ် -၂ အနီး မယ်ဆိုင်ချောင်း၊ တိုင်းတာအမှတ် (၃)မှာ တိုင်းတာနိုင်ခြင်းမရှိ၊ တိုင်းတာအမှတ် (၄)ကို ဆေခမ်းရပ်ကွက်ရှိ ဦးထွန်းအောင် တံတားအနီး မယ်ဟုတ်ချောင်း၊ တိုင်းတာအမှတ် (၅)ကို တာချီလိတ်မြို့နယ်၊ မိုင်းဖုန်း(က)ကျေးရွာ အုပ်စုရှိ ပါရာဒိုက်ဟိုတယ်အနီး မယ်ဟောက်ချောင်းနှင့် မဲခေါင်မြစ်ဆုံမှတ်၊ တိုင်းတာအမှတ်(၆)ကို မြန်မာ-လာအို နှစ်နိုင်ငံနယ်စပ် မိုင်းဖုန်း(က) ကျေးရွာအုပ်စုရှိ ဝမ်ပုံအပြည်ပြည်ဆိုင်ရာဆိမ်ကမ်းအနီး မဲခေါင်မြစ်တို့ကို တိုင်းတာခဲ့ခြင်းဖြစ်ကြောင်း သိရသည်။
ဒေသတစ်ခုတွင် မြစ်ချောင်းများ၏ အရည်အသွေးမှာ များစွာအရေးကြီးပြီး ဒေသလူထု၏ အသက်အိုးအိမ်နှင့် သက်ဆိုင်သည့်အတွက် မှန်ကန်စွာနှင့် မြန်ဆန်စွာ ထုတ်ပြန်ပေးစေချင်ကြောင်း တာချီလိတ်မြို့ခံတစ်ဦးကလည်း ပြောသည်။
“ထိုင်းဘက်မှာဆို သူတို့ပြည်သူအတွက် စိုးရိမ်ပြီး အမြဲတမ်း တိုင်းတာထုတ်ပြန်ပေးတယ်။ ထိုင်းပညာရှင်တွေဟာ ပညာရှင်ပီသစွာ ကောင်းရင် ကောင်းတယ်၊ မကောင်းရင် မကောင်းဘူးပြောတယ်။ ကျနော်တို့ဘက်လည်း အဲ့လိုပဲ ဖြစ်စေချင်တယ်” ဟု ၎င်းကပြောသည်။
ယခုကဲ့သို့ တာချီလိတ်မြို့နယ်အတွင်း မြစ်ချောင်းများမှ ရေအရေအသွေး တိုင်းတားမှု ရလဒ်ထုတ်ပြန်မည့်ရက်ကိုမူ မသိရသေးပေ။
#MeKongNews
#တာချီလိတ်
#ရေအရည်အသွေး
#ပတ်ဝန်းကျင်ထိန်းသိမ်းရေး
#မဲခေါင်မြစ်
