မဲခေါင်၊ ဧပြီ ၂၃

ကိုးကန့်တပ်ဖွဲ့ – MNDAA ထိန်းချုပ်ထားသည့် ရှမ်းပြည်မြောက်ပိုင်း၊ သိန္နီမြို့တွင် ပြည်ကြီးတရုတ် လုပ်ငန်းရှင်များက ဒေသခံများ၏ မြေယာ အများအပြားကို အဆက်မပြတ် ဝယ်ယူနေသည်ဟု ဒေသခံများက ပြောသည်။

တရုတ်လုပ်ငန်းရှင်များသည် လမ်းမကြီးဘေးရှိ မြေယာများကို အဓိက ဝယ်ယူနေပြီး သိန္နီမြို့တွင်းတွင် အဆောက်အအုံများ ဆက်တိုက် ဆောက်လုပ်နေသကဲ့သို့ ပြည်ကြီးတရုတ်လူမျိုး အများအပြားလည်း ဝင်ရောက် အခြေချနေကြသည်ဟု ဒေသခံများထံမှ သိရသည်။

“မြေတွေကို လမ်းမကြီးဘေးမှာ အဓိကထား ဝယ်တာတွေ့ရတယ်။ ရင်းနှီးမြှုပ်နှံလို့ကောင်းမယ့် နေရာတွေ ဝယ်တာပေါ့။ စျေးကျတော့ မြေယာပိုင်ရှင်နဲ့ ညှိနှိုင်းပြီး ဝယ်တာ၊ မရောင်း ရောင်းအောင် ဈေးကြီးပေးပြီး ဝယ်ကြတာ။ အခုဈေးကောင်းရနေတုန်း မရောင်းရင် စီမံကိန်းတွေလုပ်ရင် အလကား သိမ်းခံရမှာမို့ ဈေးကောင်းပေးတုန်း ရောင်းလိုက်ဆိုတာမျိုး ပြောပြီးလည်း လိုက်ဝယ်နေကြတယ်။ မြို့ထဲမှာတော့ တရုတ်တွေနဲ့ တော်တော်ပြည့်လာတယ်” ဟု သိန္နီမြို့ခံ အမျိုးသားတစ်ဦးက ပြောသည်။

ဒေသခံများ၏ မြေယာများကို တရုတ်လုပ်ငန်းရှင်များက ဝယ်ယူပြီး အဆောက်အအုံအသစ်များ ဆောက်လုပ်လာသကဲ့သို့ ငှက်ပျော၊ ကြံ စိုက်ပျိုးမှုများကိုလည်း ပြုလုပ်လာကြသည်ဟု မြို့ခံများထံမှ သိရသည်။

ယခင် စစ်ကောင်စီ ထိန်းချုပ်စဉ်ကတည်းက သိန္နီမြို့ရှိ ဒေသခံများ၏ မြေယာများကို တရုတ်လုပ်ငန်းရှင်များက ဝယ်ယူခြင်းများ ရှိခဲ့ပြီး လက်ရှိ ကိုးကန့်တပ်ဖွဲ့ ထိန်းချုပ်ချိန်တွင်မူ ပိုမို များပြားလာသည်ဟုလည်း မြို့ခံတစ်ဦးက ပြောသည်။

“အရင်ကတည်းက တရုတ်တွေက အကျင့်ပျက် စကစဝန်ထမ်းတွေနဲ့ ပေါင်းပြီး ဝယ်ကြတာ၊ အခုက အုပ်ချုပ်တာလည်း တရုတ်ဖြစ်သွားပြီဆိုတော့ ငွေအားနဲ့ ပေါက်ပြီး ပိုဝယ်လာကြတာပေါ့၊ သူတို့က ဘယ်ကရလာတဲ့ ငွေတွေလည်းမသိ ငွေမဲလား ငွေဖြူလားလည်း မသိတော့ သူတို့ငွေအားကို ဒေသခံအစစ်တွေက မယှဉ်နိုင်ဘူးလေ။ မြေယာတွေက တဖြည်းဖြည်းနဲ့ တရုတ်လက်ထဲ ရောက်ကုန်ပြီ”ဟု ၎င်းက ပြောသည်။

တရုတ်လုပ်ငန်းရှင်များက ဒေသခံများ၏ မြေယာများကို ဝယ်ယူရာတွင် လယ်မြေတစ်ဧကကို ကျပ်သိန်း ၃ ထောင်အထက် ပေးဝယ်နေကြသည်ဟု ဒေသခံ သတင်းရင်းမြစ်များက ပြောသည်။

“တရုတ်တွေက ငွေနဲ့ပေါက်ပြီး ဝယ်နေတယ်ရှင့်။ အခုမရောင်းလည်း အဖွဲ့အစည်း စီမံကိန်းလာရင် အလကား ဖယ်ပေးရမှာပဲလို့ သတင်း လွှင့်ပြီးတော့လည်း ဝယ်ကြတော့ တော်တော်များများက ရောင်းနေကြရတယ်။ တဖြည်းဖြည်းနဲ့ ရောင်းကုန်ကြတော့ ကျန်တဲ့သူတွေကလည်း မရောင်းရင် အလကား သိမ်းခံရမှာစိုးလို့ မရောင်းချင်လည်းရောင်း ရောင်းချင်လည်းရောင်း ဖြစ်နေတယ်ရှင့်”ဟု လယ်ပိုင်ရှင် အမျိုးသမီးတစ်ဦးက ပြောသည်။

ကိုးကန့်တပ်ဖွဲ့က တရုတ်လုပ်ငန်းရှင်များနှင့် ပူးပေါင်းပြီး မြို့သစ်စီမံကိန်း လုပ်မည်ဟု သတင်း ထွက်ပေါ်နေသဖြင့် မြေများကို မရောင်းပေးပါက မြို့သစ်စီမံကိန်း စတင်သည့်အခါ မြေသိမ်းခံရမည်ကို စိုးရိမ်သဖြင့် ရောင်းချကြရသည်များလည်း ရှိကြောင်း သတင်းရင်းမြစ်များ၏ ပြောဆိုချက်အရ သိရသည်။

“ဒီတိုင်ယက်ရွာဖက်မှာဆို မြို့သစ်စီမံကိန်း လုပ်မယ်ဆိုပြီး မြေတွေ လိုက်ဝယ်၊ လိုက်တိုင်းနေတာ” ဟု သတင်းရင်းမြစ်တစ်ဦးက ပြောသည်။

ထို့ပြင် သိန္နီမြို့ထဲတွင် ကိုးကန့်တပ်ဖွဲ့၏ အမိန့်အရ ဆိုင်များ၏ ဆိုင်းဘုတ်များကို တရုတ်စာများကိုသာ အဓိက အသုံးပြုရပြီး တရုတ်စီမံကိန်းနှင့် ဆောက်လုပ်သည့် အဆောက်အအုံအသစ်များ တိုးလာသည်ဟုလည်း ဒေသခံများက ပြောသည်။

သိန္နီမြို့ကို ပြီးခဲ့သည့် ၁၀၂၇ စစ်ဆင်ရေးအတွင်း ကိုးကန့်တပ်ဖွဲ့က တိုက်ခိုက်သိမ်းယူခဲ့ဖြစ်ပြီး သိန္နီမြို့ကို “မူပန်” မြို့ဟုလည်း ပြောင်းလဲထားသည်။

#MeKongNews
#သိန္နီ
#ပြည်မတရုတ်
#ဒေသခံများ
#မြေယာ
#ဝယ်ယူ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)