မဲခေါင်၊ ဧပြီ ၂၀
တာချီလိတ်မြို့ မီးလင်းရေးကော်မတီဥက္ကဋ္ဌ ဦးတင်လှိုင်၏ ပြည်သူပိုင်ငွေကြေး သုံးစွဲမှုများကို စနစ်တကျ စိစစ်ကြပ်မတ်ပေးရန် ဒေသခံလူထုက တောင်းဆိုနေကြသည်။
မြို့မီးလင်းရေးကော်မတီဥက္ကဋ္ဌ ဦးတင်လှိုင်သည် ထိုင်းဘတ် ၂ သန်းခွဲတန်ဖိုးရှိ လိုင်စင်မဲ့မော်တော်ယာဉ်ကို ဝယ်ယူစီးနင်းနေခြင်း အပါအဝင် လစဉ်ငွေကြေးရရှိသုံးစွဲမှုစာရင်းများ၊ ပြည်သူပိုင် မီးလင်းရေးစာရင်းဇယားများနှင့် ဝန်ထမ်းအင်အားစာရင်းများကို ပွင့်လင်းမြင်သာမှုရှိစေရန် စစ်ဆေးပေးစေလိုကြောင်း ဒေသခံများက ပြောသည်။
“မီးလင်းရေးနဲ့ ပတ်သက်တဲ့ ငွေကြေး၊ စာရင်းဇယားတွေက ပြည်သူအများ ပွင့်လင်းမြင်သာစွာ သိသင့်ပါတယ်။ ဦးတင်လှိုင်က မီးလင်းရေးကော်မတီမှာ ၂၀၁၈ ကတည်းက ဥက္ကဌ လုပ်ခဲ့တာ။ အခုထိလည်း ဥက္ကဌပဲ။ ဥက္ကဌသက်တမ်းလည်း ကျော်လွန်နေပါပြီ” ဟု ဒေသခံတစ်ဦးက ပြောသည်။
ယင်းကိစ္စနှင့် ပတ်သက်၍ တာချီလိတ်မြို့နယ် ပြည်သူ့လွှတ်တော်ကိုယ်စားလှယ် ဦးကျော်ငြိမ်းအောင်ကလည်း တာချီလိတ်မြို့ လျှပ်စစ်မီး ဝယ်ယူသွယ်တန်းထားသည့် စာရင်းဇယားများ၊ မြို့နယ်အတွင်း လျှပ်စစ်မီး ဖြန့်ဖြူးရောင်းချနေသော ကုမ္ပဏီများနှင့် အဖွဲ့အစည်းစာရင်းများ၊ နေအိမ်အလိုက် မီတာပေါက် စာရင်းဇယားများ၊ မီတာခနှင့် ယူနစ်နှုန်းထားများ အပါအဝင် လစဉ်ငွေရှင်းတမ်းများကို စိစစ်နိုင်ရန် မြို့နယ်အုပ်ချုပ်ရေးမှူးထံသို့ ဧပြီလ ၁၉ ရက်နေ့တွင် စာပေးပို့ အကြောင်းကြားထားကြောင်း သိရသည်။
တာချီလိတ်မြို့သည် လျှပ်စစ်ဓာတ်အားကို အိမ်နီးချင်း ထိုင်းနိုင်ငံနှင့် လာအိုနိုင်ငံတို့မှ ဝယ်ယူသုံးစွဲနေရခြင်းဖြစ်ပြီး၊ ယင်းလုပ်ငန်းစဉ်ကို တာချီလိတ်မီးလင်းရေးကော်မတီက ဦးစီးဆောင်ရွက်နေခြင်း ဖြစ်သည်။
မီးလင်းရေးကော်မတီနှင့်ပတ်သက်ပြီး လက်ရှိဥက္ကဌ တာဝန်ထမ်းဆောင်နေသည်မှာ ၈နှစ်ကျော်ရှိပြီဖြစ်ပြီး စည်းမျဉ်းအရ ၅နှစ်လျှင်တစ်ကြိမ် ဥက္ကဌပြန်လည်ရွေးချယ်ရမည်ဖြစ်ကြောင်း၊ ဘဏ္ဍာရေးဆိုင်ရာ ရှင်းတမ်းများလည်း အများသိအောင် ရှင်းလင်းမှုမရှိကြောင်း၊ မီးလင်းရေးကော်မတီ၏ ရန်ပုံငွေဖြစ်သည့် ဘတ်ငွေ သန်း ၃၀ကျော် (၂၀၁၈ စာရင်းအရ) ကိုလည်း မည်သို့မည်ပုံလုပ်ဆောင်ထားကြောင်းလည်း မသိရကြောင်း ဒေသခံတစ်ဦးက ထောက်ပြသည်။
“၂၀၁၈မှာ လွှတ်တော်ကိုယ်စားလှယ်တွေရှိတုန်းက သိလိုက်ရတာက ရန်ပုံငွေ ဘတ်သန်း ၃၀ ကျော်ရှိတယ်။ အဲဒီနောက်ပိုင်းလည်း ဘာမှ မကြားရတော့ဘူး။ အခုမီးလင်းရေးက လူတစ်စုက အုပ်စိုးထားသလိုဖြစ်နေတယ်။ မီးလင်းရေးဆိုတာ အများပိုင်ဖြစ်တယ်။ အရင်ခေတ်အဆက်ဆက်ကတည်းက မြို့အတွက်လုပ်လာကြတာ။ လျှပ်စစ်မီးရောင်းတိုင်းလည်း တစ်ယူနစ်တိုင်းမှာ အကျိုးအမြတ်ရနေတာ၊ ဒါတွေကို ပွင့်လင်းမြင်သာမှုရှိအောင် ချပြဖို့လိုပါတယ်” ဟု ၎င်းက ပြောသည်။
တာချီလိတ်မြို့နယ်မီးလင်းရေးကော်မတီ (၁)ကို ၂၀၁၈ ခုနှစ်နှစ်ကုန်ပိုင်းတွင် ပိုမိုပွင့်လင်းမြင်သာမှုရှိစေရန် ခရိုင်အုပ်ချုပ်ရေးဦးဆောင်မှု ကော်မတီမှ မြို့မိမြို့ဖဦးဆောင်သည့် ကော်မတီသို့ လွှဲပြောင်းပေးခဲ့ခြင်းဖြစ်သည်။ ယင်းအချိန်ကတည်းက ကော်မတီဥက္ကဌနေရာကို ဦးတင်လှိုင်က ရရှိထားခြင်းဖြစ်သည်။
တာချီလိတ်မြို့နယ်အတွင်း မီးလင်းရေးကော်မတီ (၁) နှင့် မီးလင်ရေးကော်မတီ (၂) ဟူ၍ရှိပြီး မီးလင်းရေးကော်မတီ (၁)ကို မြို့မိမြို့ဖများဦးဆောင်သည့် ကော်မတီက တာဝန်ယူကာ မြို့ပေါ်ရပ်ကွက်များသို့ အဓိကထား လျှပ်စစ်မီးဖြန့်ဖြူးပေးနေခြင်းဖြစ်ပြီး မီးလင်းရေးကော်မတီ (၂)ကို “ဝ” တပ်ဖွဲ့က တာဝန်ယူကာ မြို့အစွန်ရပ်ကွက်များနှင့် ကျေးရွာများသို့ ဖြန့်ဖြူးပေးနေခြင်းဖြစ်သည်။
#MeKongNews
#တာချီလိတ်
#မီးလင်းရေးကော်မတီ
#ထိုင်းနိုင်ငံ
#ပွင့်လင်းမြင်သာမှု
