မဲခေါင်၊ ဧပြီ ၂၀
မဲခေါင်မြစ်ဆိပ်ကိမ်းတည်ရှိပြီး မဲခေါင်မြစ်နှင့် နီးကပ်သည့် ရှမ်းပြည်နယ်အရှေ့ပိုင်း၊ NDAA ထိန်းချုပ်ရာ အထူးဒေသ – ၄ အတွင်းရှိ နမ့်ပန်းဒေသတွင် မြေရှားသတ္တုတူးဖော်သည့် လုပ်ကွက်ပေါင်း ၃၀ ကျော်အထိ တိုးချဲ့လာနေကြောင်း လုပ်ကိုင်နေသူများနှင့် နီးစပ်သည့် သတင်းရင်းမြစ်များထံမှ သိရသည်။
အထူးဒေသ-၄၊ နမ့်ပန်းဒေသအတွင်း လက်ရှိတွင် သတ္တုလုပ်ကွက် ၃၀ ကျော်ရှိနေပြီး မဲခေါင်မြစ်နှင့် မနီးမဝေးဖြစ်သည့် နမ့်ပန်း-မိုင်းဆော လမ်းခွဲ တဝိုက်တွင်လည်း သတ္တုတူးဖော်သည့် နေရာ ၅ နေရာခန့်ရှိကြောင်း မြေရှားလုပ်ကိုင်သူများနှင့် နီးစပ်သူတစ်ဦးက ပြောသည်။
အထူးဒေသ-၄ တွင် မြေရှားသတ္တုလုပ်ကွက်များ များပြားလာသည်မှာ စစ်တပ်အာဏာသိမ်းပြီး ကာလဖြစ်သည့် ၂၀၂၂ ခုနှစ် နောက်ပိုင်းတွင်ဖြစ်ကြောင်း၊ တစ်နှစ်ထက် တစ်နှစ်များပြားလာခြင်းဖြစ်ပြီး ပိုင်ရှင်များမှာ တရုတ်လူမျိုးများ ဖြစ်ကြောင်း ယင်းနီးစပ်သူက ပြောသည်။
“သူဌေးတွေက တရုတ်လူမျိုးတွေပါ။ ၂၀၂၂ လောက်ကစပြီး တစ်နှစ်ထက်တစ်နှစ် ပိုများလာတယ်။ နောက်ပြီး မိုးရာသီမှာဆို ရေကြီးတာ၊ တောင်ပြိုတာတွေ ခဏခဏ ဖြစ်လာနေပြီ” ဟု ၎င်းကပြောသည်။
မြေရှား သတ္တုတွင်းများ အများဆုံး တည်ရှိရာ နေရာမှာ ကျိုင်းခမ်းဒိုင်နယ်၊ ဝမ်လောက်ရွာနှင့် ပါဆန်းဒိုင်နယ်အတွင်းရှိ ပါဆန်းအောက်ကျေးရွာတို့ ဖြစ်ကြောင်း ဒေသခံများထံမှ သိရသည်။
မြေရှားသတ္တုလုပ်ကွက်များတွင် အလုပ်သမားများကို တရုတ်သူဌေးများမှ လကုန်ရက် လုပ်ခလစာမရှင်းပေးသည့် ဖြစ်ရပ်များလည်း ရှိပြီး ယင်းကိစ္စများကို အထူးဒေသ-၄ ရဲစခန်းသို့ သွားရောက်တိုင်ကြားသော်လည်း ရဲက ဖြေရှင်းပေးခြင်းမရှိကြောင်း အလုပ်သမားများနှင့် နီးစပ်သူများထံမှ သိရသည်။
ကချင်ပြည်နယ်ရှိ မြေရှားလုပ်ကွက်အချို့ ပိတ်လိုက်ရပြီးနောက် အထူးဒေသ-၄ တွင် မြေရှားလုပ်ကွက်များ ပိုမိုများပြားလာခြင်းဖြစ်ကြောင်း ဒေသခံများထံမှ သိရသည်။
ယင်း အထူးဒေသ-၄ အတွင်း၌ မိုင်းလားဒေသ၊ ဆီလူးဒေသနှင့် နမ့်ပန်းဒေသတို့ပါဝင်ပြီး နမ့်ပန်းဒေသမှာ မဲခေါင်မြစ်ကမ်းတွင် တည်ရှိကာ အထူးဒေသ-၄ ၏ အရေးပါသည့် ဆွတ်လွေဆိပ်ကမ်းတည်ရှိရာ ဒေသလည်းဖြစ်သည်။
မဲခေါင်မြစ်ထဲတွင် လူကို အန္တရာယ်ပေးသည့် အာဆင်းနစ်ဓာတ်ပမာဏမှာ ၉ဆကျော် များပြားနေပြီး အထူးသဖြင့် ထိုင်း-မြန်မာ-လာအို ၃နိုင်ငံဆုံရာ ရွှေတြိဂံဒေသတွင် အများဆုံးဖြစ်ကြောင်း ထိုင်းပညာရှင်များက ဧပြီလလယ်အတွင်း သတိပေးချက် ထုတ်ပြန်ထားသည်။
#MeKongNews
#မိုင်းလား
#အထူးဒေသ၄
#နမ့်ပန်းဒေသ
#မြေရှားသတ္တု
