မဲခေါင်၊ ဧပြီ ၁၈
အာဏာသိမ်း စစ်ခေါင်းဆောင် ဦးမင်းအောင်လှိုင်ကို သမ္မတအဖြစ် TNLA မှ ကြိုဆိုထောက်ခံခဲ့သည့်အပေါ် အထူးပြင်းထန်စွာ ကန့်ကွက်ရှုတ်ချပြီး TNLA လက်အောက်ရှိ တအောင်းပြည် ကျန်းမာရေးကောင်စီ – THC နှင့် ပူးပေါင်းဆောင်ရွက်မှု အားလုံးကိုလည်း အပြီးတိုင် ရပ်ဆိုင်းလိုက်ကြောင်း ဆေးတက္ကသိုလ် (မန္တလေး) ကြားကာလတက္ကသိုလ်ကောင်စီ – UMMIUC က ဧပြီ ၁၆ ရက်တွင် ထုတ်ပြန်ကြေညာသည်။
ဦးမင်းအောင်လှိုင်အား သမ္မတအဖြစ် TNLA က ပြီးခဲ့သည့် ဧပြီ ၁၅ ရက်တွင် ဂုဏ်ပြုသဝဏ်လွှာ ပေးပို့ခဲ့သည့် လုပ်ရပ်သည် တစ်နိုင်ငံလုံးရှိ ပြည်သူများ၏ သွေးမြေကျ ပေးဆပ်မှုများနှင့် CDM ကျန်းမာရေးဝန်ထမ်းများ၏ ဆန္ဒသဘောထားများကို လျစ်လျူရှုကာ နွေဦးတော်လှန်ရေး၏ အခြေခံမူဝါဒများကို သစ္စာဖောက်ဖျက်လိုက်ခြင်း ဖြစ်သည်ဟု UMMIUC က ပြင်းပြင်းထန်ထန် ဝေဖန်ထားသည်။
UMMIUC အနေဖြင့် နွေဦးတော်လှန်ရေး ကာလအတွင်း ကျန်းမာရေးနှင့် ပညာရေးကဏ္ဍများ ဟန်ချက်ညီညီ ပိုမိုအားကောင်းလာစေရန် ရည်ရွယ်၍ THC နှင့် ပူးပေါင်းကာ Tealand Medical School ပေါ်ပေါက်လာရေးအတွက် ပညာရပ်ပိုင်းဆိုင်ရာ ကူညီပံ့ပိုးမှုများ ပြုလုပ်ပေးရန် မူလက စီစဉ်ထားခဲ့ခြင်း ဖြစ်သည်ဟု ဆိုသည်။
ယခုတွင်မူ UMMIUC အနေဖြင့် TNLA လက်အောက်ခံ THC နှင့် ဖြစ်စေ၊ Tealand Medical School နှင့် ဖြစ်စေ ပူးပေါင်း ဆောင်ရွက်နေသည့် လုပ်ငန်းစဉ်အားလုံးကို ယခုအချိန်မှစ၍ အပြီးတိုင် ရပ်ဆိုင်းလိုက်ပြီ ဖြစ်ကြောင်း အများပြည်သူသို့ အသိပေးထားသည်။
“တရားမဝင် အကြမ်းဖက်စစ်အုပ်စုအား အသက်သွင်းပေးသည့် မည်သည့် လုပ်ရပ်ကိုမဆို လုံးဝ (လုံးဝ) လက်ခံနိုင်စရာ အကြောင်းမရှိပါ” ဟု ယင်းကြေညာချက်တွင် ဖော်ပြထားသည်။
ထို့နောက် အကြမ်းဖက် စစ်အာဏာရှင်စနစ် အမြစ်ပြတ်ကျဆုံး၍ ဖက်ဒရယ်ဒီမိုကရေစီ ပြည်ထောင်စု ပေါ်ပေါက်လာသည်အထိ ပြည်သူလူထုနှင့်အတူ တစ်သားတည်း ဆက်လက်ရပ်တည် တိုက်ပွဲဝင်သွားမည် ဖြစ်ကြောင်း UMMIUC က ကတိပြုထားသည်။
#MeKongNews
#အာဏာသိမ်း
#စစ်ခေါင်းဆောင်
#ဦးမင်းအောင်လှိုင်
#TNLA
#UMMIUC
