မဲခေါင်၊ ဇန်နဝါရီ ၁၅
တာချီလိတ်မြို့ အခြေစိုက် အမှတ် (၁၂၁) ယာဉ်ထိန်းရဲတပ်ဖွဲ့စု (တာချီလိတ်) တပ်ဖွဲ့စုမှူး ဒုရဲမှူး အေးမင်းအောင်သည် ဒုရဲချုပ်၏ ကိုယ်ရေးအရာရှိ PSO လုပ်ခဲ့ဖူးသည့် အရှိန်ဖြင့် ယာဉ်တိုက်မှုများတွင် အမှုဖြစ်စဉ်အလိုက် ခြိမ်းခြောက်ကာ လာဘ်ငွေ ဘတ်သိန်းချီ တောင်းခံ လာဘ်စားနေကြောင်း ယာဉ်မတော်တဆမှု ဖြစ်ပွားခဲ့သူများထံမှ သိရသည်။
မော်တော်ယာဉ် မတော်တဆမှုများတွင် ယာဉ်ပိုင်ရှင်အချင်းချင်း ညှိနှိုင်း၍ အဆင်ပြေသွားသော်လည်း၊ ဒုရဲမှူး အေးမင်းအောင်က အမှုဖွင့်ပုဒ်မတပ်ခြင်း၊ ယာဉ်သိမ်းဆည်းခြင်းနှင့် ထောင်ချနိုင်သည်ဟု ခြိမ်းခြောက်ခြင်းများပြုလုပ်ကာ အမှုမဖွင့်စေလိုပါက ဘတ်ငွေသိန်းချီပေးရန် တောင်းခံနေခြင်း ဖြစ်သည်။
“ကားအချင်းချင်း မတော်တဆပွတ်မိတာကို တစ်ဖက်နဲ့တစ်ဖက် ကြေအေးပြီးပြီ။ ဒါကို ရုံးခေါ်ပြီး ကြေအေးကြောင်း လက်မှတ်ထိုးခိုင်းတယ်။ ပြီးတော့မှ အမှုဖွင့်လို့ရတယ်၊ ကားအသိမ်းမခံချင်ရင်၊ အမှုမဖွင့်စေချင်ရင် ပိုက်ဆံပေးဆိုပြီး တောင်းတာ။ ဘာမှမဖြစ်လည်း အကြောင်းအမျိုးမျိုးပြပြီး တောင်းတာပဲ။ တိုင်းရင်းသားတွေဆို စကားမတတ်တာရယ်၊ ရုံးဂါတ်ကြောက်တာရယ်ကြောင့် အနည်းဆုံး ဘတ်သောင်းဂဏန်းကနေ သိန်းဂဏန်းအထိ ပေးလိုက်ရတယ်။ သူတို့စီးတဲ့ ဆိုင်ကယ်တွေ၊ ကားတွေဆိုရင်လည်း Without (လိုင်စင်မဲ့) တွေချည်းပဲ၊ အခုဟာက ပြည်သူကို တမင်ဖိအားပေးနေတာ” ဟု အမှုဖြစ်ပွားခဲ့သူတစ်ဦးက ပြောသည်။
တာချီလိတ် ယာဉ်ထိန်းတပ်စုမှူး ဒုရဲမှူး အေးမင်းအောင်မှာ ဒုရဲချုပ် အောင်နိုင်သူ၏ တပည့်ဖြစ်ပြီး၊ ယာဉ်ထိန်းတပ်ဖွဲ့က ရရှိသည့် လာဘ်ငွေခွဲတမ်းများကို အောက်ခြေအဆင့် အရာရှိနှင့် တပ်သားများအား ပြန်လည်ခွဲဝေပေးခြင်းမရှိဘဲ တပ်ဖွဲ့ဝင်များကိုသာ ဖိအားပေး ခိုင်းစေနေကြောင်း ရဲတပ်ဖွဲ့နှင့် နီးစပ်သည့် သတင်းရင်းမြစ်များထံမှ သိရသည်။
“အချင်းချင်းအပေါ်လည်း မိုက်ကြေးခွဲ ခွဲတမ်းမပေးချင်ဘူး။ တစ်ခုခုဆို သူဒုရဲချုပ် PSO ၊ ရဲချုပ်ရုံးကလာတာမို့ အိတ်ပိတ်စာပို့လိုက်မယ်၊ ပြောင်းခိုင်းလိုက်မယ်နဲ့ ခြိမ်းခြောက်တာ” ဟု ရဲတပ်ဖွဲ့နှင့် နီးစပ်သူတစ်ဦးက ပြောသည်။
ထို့ပြင် ၎င်းသည် တာဝန်ချိန်အတွင်း ဂေါက်ရိုက်ခြင်းနှင့် အပျော်အပါးများဖြင့်သာ အချိန်ကုန်နေသူဖြစ်ကြောင်း ရဲတပ်ဖွဲ့ဝင်အချို့ထံမှ စုံစမ်းသိရှိရသည်။
တာချီလိတ်မြို့သည် လိုင်စင်မဲ့ မော်တော်ဆိုင်ကယ်နှင့် မော်တော်ကား စီးနင်းမှု ၉၀ ရာခိုင်နှုန်းကျော်ရှိသည့် နယ်စပ်မြို့ဖြစ်သဖြင့် ယာဉ်မတော်တဆမှုဖြစ်လျှင် ယာဉ်အသိမ်းခံရမည်နှင့် အမှုပတ်မည်ကို စိုးရိမ်ကြသည်။
ထို့ကြောင့် ယာဉ်မတော်တဆ ဖြစ်စဉ်များတွင် အမှုမကြီးစေရန်အတွက် ယာဉ်ထိန်းတပ်ဖွဲ့က တောင်းသမျှကို ပေးဆောင်နေကြရကြောင်း ယာဉ်မတော်တဆ ဖြစ်ပွားဖူးသူများက ဆိုသည်။
#MeKongNews
#တာချီလိတ်
#ယာဉ်ထိန်းရဲ
#အေးမင်းအောင်
#ယာဉ်တိုက်မှု
#လာဘ်စား
