မဲခေါင်၊ ဒီဇင်ဘာ ၂၃
မူဆယ်မြို့မှ တရုတ်နိုင်ငံဘက်သို့ ကူးသန်းသွားလာနေသူများအနေဖြင့် စစ်ကောင်စီ၏ ရွေးကောက်ပွဲတွင် မဲမပေးပါက နယ်စပ်ဖြတ်ကူးခွင့် ရတော့မည်မဟုတ်ကြောင်း သတင်းများ ထွက်ပေါ်နေသဖြင့် ဒေသခံများ စိုးရိမ်လျက်ရှိကြောင်း သိရသည်။
မူဆယ်မှ တရုတ်နိုင်ငံ ကြယ်ဂေါင်နှင့် ရွှေလီဘက်သို့ ကုန်စည်သယ်ယူပို့ဆောင်ရေး လုပ်ကိုင်နေသူများ၊ အထူးသဖြင့် မူဆယ်ဒေသခံလက်မှတ် (စာအုပ်နီ) ကိုင်ဆောင်ထားသူများအနေဖြင့် မဲမပေးပါက စာအုပ်သက်တမ်းတိုး၍ မရခြင်းနှင့် သွားလာခွင့် ကန့်သတ်ခံရခြင်းများ ဖြစ်ပေါ်လာနိုင်ကြောင်း ဒေသခံများထံမှ သိရသည်။
“စာအုပ်ရဖို့ မဲပေးရမယ်ဆိုပြီး အုပ်ချုပ်ရေးပိုင်းက စည်းရုံးနေတာ။ စာအုပ်နီရှိတဲ့သူတွေက ကုန်ပစ္စည်းသယ်တဲ့ စီးပွားရေးနဲ့ တစ်ရက်ကို အနည်းဆုံး ကျပ်တစ်သိန်းကျော် ရနေတာဆိုတော့ စာအုပ်ရှိဖို့က အဓိက ဖြစ်နေတယ်။ မဲထည့်မှ စာအုပ်ရမယ်ဆိုတော့ မထည့်ချင်လည်း ထည့်ကြရတော့မယ့် အခြေအနေပဲ” ဟု မူဆယ်မြို့၊ ဟူမွန်ရပ်ကွက်နေသူတစ်ဦးက မဲခေါင်သို့ ပြောသည်။
ယင်းစာအုပ်အနီကို မူဆယ်တွင် မြေပိုင်ဆိုင်မှု ပြသနိုင်သူများကိုသာ ထောက်ခံချက်ဖြင့် ထုတ်ပေးနေခြင်းဖြစ်ပြီး မြေကွက်မရှိသူများကို လဝကများက လာဘ်ငွေယူကာ ထုတ်ပေးကြောင်း၊ မြေပိုင်ဆိုင်မှု မပြနိုင်သူများအတွက် လက်ရှိတွင် စာအုပ်ပေါက်ဈေးမှာ တရုတ်ယွမ် ၄၀,၀၀၀ ခန့် (လက်ရှိ ငွေလဲနှုန်း ၁ ယွမ်လျှင် ၅၆၀ ကျပ်ဖြင့် တွက်ချက်ပါက ကျပ်သိန်း ၂၀၀ ကျော်) အထိ ရှိနေကြောင်း သိရသည်။
စစ်ကောင်စီ၏ ရွေးကောက်ပွဲကော်မရှင် (UEC) က ရွေးကောက်ပွဲနေ့တွင် မအားလပ်သူများနှင့် နေထိုင်မကောင်းသူများကို ဒီဇင်ဘာလ ၂၆ ရက်နှင့် ၂၇ ရက်နေ့များ၌ ကြိုတင်မဲပေးရန် ကြေညာထားသည့်အတွက် အချို့သော ဒေသခံများမှာ အလုပ်မပျက်စေရန်နှင့် အခက်အခဲ မဖြစ်စေရန်အတွက် မအားလပ်ဟု အကြောင်းပြကာ ကြိုတင်မဲပေးရန် ပြင်ဆင်နေကြကြောင်း သိရသည်။
“အရင်က ကိုဗစ်လက်မှတ် မပါရင် ခရီးသွားလို့ မရသလိုမျိုး အခုလည်း မဲမပေးထားရင် ခရီးသွားလာခွင့် ပိတ်ပင်ခံရမှာကို ကြောက်နေကြရတာ။ တရုတ်ဘက်ကို သွားလို့မရရင် စီးပွားရေး အဆင်မပြေနိုင်တော့တာမို့ ကြိုတင်မဲပဲ ထည့်ရတော့မှာပါ” ဟု ဟိုနားရပ်ကွက်နေသူတစ်ဦးက ပြောသည်။
ဆက်လက်၍ မြန်မာဘက်မှ နယ်စပ်ဖြတ်သန်းခွင့် မပေးမည်ကိုသာမက တရုတ်နိုင်ငံဘက်ကပါ လက်ခံမည်မဟုတ်ခြင်းကို စိုးရိမ်နေကြကြောင်း ယင်းဒေသခံက ဆိုသည်။
“တရုတ်ဘက်က စက်ရုံတွေမှာ မြန်မာဘက်က အသက် ၃၅ နှစ်အောက်ဆို အလုပ်မခန့်ဖို့ စစ်မှုထမ်းဥပဒေနဲ့ ပတ်သက်ပြီး ကန့်သတ်တာမျိုးတွေ ရှိနေတယ်။ အခုလည်း မဲမပေးဘဲ လာရင် လက်မခံတာမျိုး တရုတ်ဘက်က လုပ်လာနိုင်တယ်” ဟု ၎င်းက သုံးသပ်သည်။
ပေါက်ကြားလာသည့် လျှို့ဝှက်ညွှန်ကြားစာအရ စစ်ကောင်စီသည် ရွေးကောက်ပွဲကို အပိုင်းနှစ်ပိုင်း ခွဲခြားပြုလုပ်ရန် စီစဉ်ထားကြောင်း သိရသည်။
အတုအယောင်ရွေးကောက်ပွဲဟု အများကသတ်မှတ်ထားသည့် စစ်ကောင်စီ၏ ရွေးကောက်ပွဲ အပိုင်း (၁) အတွက် စစ်ဗိုလ်ချုပ်များ၊ ဝန်ကြီးဌာနဝန်ထမ်းများ၊ ကော်မရှင်အဖွဲ့ဝင်များနှင့် တာဝန်ကျမည့်သူများကို ဒီဇင်ဘာလ ၁၀ ရက်မှ ၂၇ ရက်အထိ ကြိုတင်မဲပေးခိုင်းထားပြီး သာမန်ပြည်သူများထဲမှ မအားလပ်သူများကို ဒီဇင်ဘာလ ၂၆ ရက်နှင့် ၂၇ ရက်တို့တွင် ကြိုတင်မဲပေးရန် သတ်မှတ်ထားသည်။
ထို့ပြင် ရွေးကောက်ပွဲ အပိုင်း (၂) အတွက် ဝန်ထမ်းများနှင့် တာဝန်ရှိသူများကို ၂၀၂၆ ခုနှစ်၊ ဇန်နဝါရီလ ၁ ရက်မှ ၁၀ ရက်အထိ လည်းကောင်း၊ အသက်ကြီးရင့်သူများနှင့် မအားလပ်သည့် ပြည်သူများကို ဇန်နဝါရီလ ၉ ရက်နှင့် ၁၀ ရက်နေ့တို့တွင်လည်းကောင်း ကြိုတင်မဲပေးရန် ညွှန်ကြားထားကြောင်း သိရသည်။
#MeKongNews
#မူဆယ်
#နယ်စပ်ဖြတ်သန်းခွင့်
#စာအုပ်အနီ
#ရွေးကောက်ပွဲ
