မဲခေါင်၊ နိုဝင်ဘာ ၂၂
MNDAA တပ်စွဲထားသည့် ရှမ်းပြည်မြောက်ပိုင်း ဟိုယ၊ နမ့်ပေါင်၊ မယ်ဟန်၊ နောင်မွန်၊ နားဆော့ ဒေသများမှ တပ်များကို ယနေ့ နိုဝင်ဘာ ၂၂ ရက် ညနေပိုင်းက စတင်၍ လောက်ကိုင်ဘက်သို့ ရွှေ့ပြောင်းနေပြီဟု MNDAA နှင့်နီးစပ်သူတစ်ဦးထံမှ သိရသည်။
MNDAA တပ်စွဲထားသည့် နမ့်ပေါင်–မိုင်းရယ်–ဟိုယ လမ်းကြောတစ်လျှောက်ရှိ တပ်စခန်းများကို ယခုနှစ် ရွေးကောက်ပွဲမစမှီ ဆုတ်ပေးရန် စစ်ကောင်စီက တရုတ်မှတဆင့် တောင်းဆိုထားကြောင်း ယင်းနီးစပ်သူထံမှ သိရသည်။
“ရွေးကောက်ပွဲအမှီ clear ဖြစ်မယ်။ ၂၀၀၈ အတိုင်း ယခင်နယ်မြေအတိုင်းပဲ တောင်းဆိုနေတာ” ဟု နီးစပ်သူက ပြောသည်။
တပ်များ စရွှေ့နေသော်လည်း လုံခြုံရေးဂိတ်များကိုချထားဆဲဖြစ်ကြောင်း သက်ဆိုင်ရာအရင်းအမြစ်က ပြောသည်။
“ထုံးစံအတိုင်း လားရှိုးလိုပဲ ကျောင်းတက်နေဆဲ ကလေးတွေကို တရုတ်တစိတ် မြန်မာတစိတ် သင်ကြားတဲ့အရာတွေကတော့ ပလုံ ဖြစ်နိုင်တယ်။ သိန္ဓီမြို့နယ်တဝိုက်မှာတော့ ဒေသခံကဒ်တွေ၊ နေထိုင်ခွင့်ကဒ်တွေ၊ ယာဉ်မောင်းလိုင်စင်တွေက တရုတ်စနစ်သုံးထားတာတွေ ပလုံဖြစ်နိုင်တယ်။ ယခင် MNDAA ထိန်းချုပ်စဉ်က တရုတ်လူမျိုး အချို့ထံ ဌားထားတဲ့ ဒေသခံမြေယာတွေကိုလည်း မူလပိုင်ရှင်တွေနဲ့ တရုတ်လုပ်ငန်းရှင်တွေ ဘက်က ညှိနှိုင်းမှုပြေလည်ရင် အဆင်ပြေမယ်။ ဒါပေမဲ့ မြေစာရင်းဌာန၊ စိုက်ပျိုးရေးနှင့် အခွန်ရုံးက ခွင့်မပြုရင်တော့ ပလုံပါမယ်” ဟု MNDAA နီးစပ်သူ လားရှိုးဒေသခံတစ်ဦးက ပြောသည်။
၂၀၀၈ အတိုင်း ပြန်ဆုတ်ပါက MNDAA ဆုတ်ရမည့် နယ်မြေထဲတွင် မူဆယ် ၁၀၅ မိုင်ပါဝင်မည်ဖြစ်ပြီး၊ ထိုကဲ့သို့ ဖြစ်လာပါက AA တို့နှင့် စစ်ကောင်စီတို့ ရှမ်းမြောက်တွင် ထိပ်တိုက် ရင်ဆိုင်ရနိုင်ကြောင်း စစ်ရေးအကဲခတ်တစ်ဦးက သုံးသပ်သည်။
“စစ်ကောင်စီက စစ်မတိုက်တော့ဘူး။ တရုတ်အားကိုးနဲ့ပဲ လားရှိုးလို ပြန်တောင်းမယ်။ ၁၀၅ မိုင်ကို ကိုးကန့်က ပြန်ပေးနိုင်ပေမဲ့ AA က မပေးဘူးဆိုရင် တိုက်လာနိုင်မလား။ အခု မူဆယ်မှာ အင်အားဖွဲ့စည်းနေတာတွေက ၁၀၅ မိုင်အတွက် ဖြစ်နိုင်တယ်” ဟု ၎င်းက ဆိုသည်။
MNDAA သည် ၁၀၂၇ စစ်ဆင်ရေး ၂ ခုလုံးတွင် စစ်ကောင်စီ၏ အရှေ့မြောက်တိုင်း စစ်ဌာနချုပ်အပါအဝင် လားရှိုး၊ လောက်ကိုင်၊ ချင်းရွှေဟော်၊ မုန်းကိုး၊ ဖောင်းဆိုင်၊ ကုန်းကြမ်း၊ ပန်လုံ၊ ကွမ်းလုံ၊ သန္ဓီ၊ တာမိုးညဲ၊ ပန်ဆိုင်းမြို့များကို သိမ်းပိုက်နိုင်ခဲ့သော်လည်း လားရှိုးမြို့ကို ပြီးခဲ့သည့် ဧပြီလတွင် တရုတ်ဖိအားကြောင့် ပြန်လွှဲပေးခဲ့ရပြီး ယခုတလောတွင်လည်း တရုတ်ဖိအားကြောင့် တပ်များ စတင် ဆုတ်ခွာနေရခြင်း ဖြစ်ကြောင်း သိရသည်။
#MeKongNews
#MNDAA
#ရှမ်းမြောက်
#တပ်ရွှေ့ပြောင်းမှု
#လားရှိုး
