မဲခေါင်၊ နိုဝင်ဘာ ၁၃
ရှမ်းပြည်မြောက်ပိုင်းမှ တရားမဝင်ကုန်ပစ္စည်းများ တင်ဆောင်လာမှုဖြင့် ကုန်ကားအစီး ၆၀ ခန့်ကို နောင်ဝိုးလမ်းပိုင်းတွင် စစ်ကောင်စီက ဖမ်းဆီးထားကြောင်း ဒေသတွင်းသတင်းရင်းမြစ်အရ သိရသည်။
လားရှိုးဘက်မှ လွှတ်ပေးလိုက်သည့် တရုတ်ကုန်ပစ္စည်းမျိုးစုံ တင်ဆောင်လာသော ကုန်တင်ကားအစီး ၆၀ ခန့်ကို ယမန်နေ့ နိုဝင်ဘာ ၁၂ ရက်က ရှမ်းပြည်တောင်ပိုင်း၊ နောင်ဝိုးလမ်းပိုင်းတွင် အရှေ့ပိုင်းတိုင်းစစ်ဌာနချုပ်မှ ဗျူဟာမှူးကိုယ်တိုင်ဆင်းပြီး နေပြည်တော်ဒရုန်းအဖွဲ့နှင့် ပူးပေါင်းကာ ဖမ်းဆီးခဲ့ခြင်းဖြစ်ကြောင်း သိရသည်။
“ကားဆရာတွေရဲ့ မှတ်ပုံတင်တွေသိမ်းပြီး စစ်ဆေးစရာ လမ်းကြောင်းလေးရှိလို့ ၂ ရက်လောက် ထိန်းသိမ်းထားမယ် သိရတယ်။ အစပိုင်းက အဖွဲ့ပေါင်းစုံ ပူးပေါင်းဖမ်းဖို့၊ ခုက ဒီဘက်အခြမ်းမှာလည်း ၃၀ လောက်ဖမ်းထားတာ၊ ဗထူးဘက်ဆွဲလာမယ်လည်း ပြောနေတယ်” ဟု ဒေသတွင်းသတင်းက ဖော်ပြသည်။
ယခင်က ယင်းကဲ့သို့ တရားမဝင်ကုန်စည်များ တင်ဆောင်လာသည့်ယာဥ်များကို ဖမ်းဆီးမှုတွင် လိုင်စင်မဲ့ယာဥ်များကို သိမ်းဆည်းပြီး ကုန်အမျိုးအစားများအပေါ်ခွဲခြား၍ ပြစ်ဒဏ်ကြေးများဖြင့် အကောက်ခွန်တွင် ပြန်လည်လျှောက်ထား ရယူနိုင်ကြောင်း ထုတ်ပြန်ထားရာ ယခုတွင်လည်း ယင်းကဲ့သို့ပင် လုပ်ဆောင်လာနိုင်ဖွယ်ရှိကြောင်း ကုန်သည်များက ခန့်မှန်းနေကြသည်။
“ဒီနေ့ပဲ မီးတန်းယာဥ်နဲ့ သွားခေါ်လာပြီ။ ကားတွေတင်မကဘူး လူတွေရဲ့မှတ်ပုံတင်၊ စမတ်ကတ်၊ ယာဥ်မောင်းလိုင်စင်တွေပါ သိမ်းထားပြီး ရပ်စောက်ဗထူးဝင်းထဲကို ကားတွေထိုးခိုင်းထားတယ်။ ကားငယ်တွေလည်းပါတယ်” ဟု အခြားဗထူးနယ်ခံတစ်ဦးက ယနေ့တွင် မဲခေါင်သို့ ပြောသည်။
ယခင် စစ်တိုင်းမှူးနိုင်ဇော်ဦး လက်ထက်က ယင်းတရားမဝင်ကုန်စည်များကြောင့် ဖမ်းဆီးခံခဲ့ရသည့်အတွက် ယခု စစ်တိုင်းမှူးအသစ်ကျော်နိုင်ဦး လက်ထက်တွင် ဖမ်းဆီးပြနေခြင်းဖြစ်သည် ဟု စစ်ရေး၊ နိုင်ငံရေးအကဲခတ်များက သုံးသပ်နေကြသည်။
#MeKongNews
#နောင်ဝိုး
#တရားမဝင်ကုန်ပစ္စည်း
#စစ်ကောင်စီ
#ဖမ်းဆီး
