မဲခေါင်၊ စက်တင်ဘာ ၂၂

မယ်ဆိုင်ချောင်းရေ မြင့်တက်လာမှုနှင့်အတူ တာချီလိတ်မြို့တွင် ရေကြီးနေပြီး ရပ်ကွက်အချို့ ရေမြုပ်နေကြောင်း ဒေသခံများထံမှ သိရသည်။

မိုးများသည်းထန်စွာရွာသွန်ခြင်းနှင့် တောင်ကျရေကျဆင်းမှုကြောင့် မယ်ဆိုင်ချောင်းရေမြင့်တက်လာကာ စက်တင်ဘာ ၂၂ ရက်နေ့ နံနက်ပိုင်းစ၍ ဗိုလ်ချုပ်လမ်းမကြီးအပါအဝင် အနိမ့်ပိုင်းရပ်ကွက်များတွင် ရေကြီးရေလျှံမှုဖြစ်ပွား လျက်ရှိပြီး ဗိုလ်ချုပ်လမ်းမကြီးနှင့် မြို့ပေါ်ရပ်ကွက်များဖြစ်သော တာလော့၊ ပုန်းထွန်၊ မကာဟိုခမ်း၊ ဆန်ဆိုင်း (က)၊ (ခ) ရပ်ကွက်များရှိ လမ်းနှင့် နေအိမ်များ ရေနစ်မြုပ်နေကြောင်း သိရသည်။

“မိုးက ည၂နာရီလောက်ကတည်းက ခုလည်းကျနေဆဲပဲ။ အဓိက က မိုင်းဆတ်ဘက် လွိုင်ဆမ်ဆွန်မိုးရွာတာ၊ မယ်ဆိုင်ချောင်းက ပူနားကိုနားက လွိုင်ဆန်တောင်မှာ မြစ်ဖျားခံတာ”ဟု တာချီလိတ် မကာဟိုခမ်းရပ်နေသူတစ်ဦးက ပြောသည်။

၂၀၂၅ခုနှစ် စက်တင်ဘာလ ၂၂ ရက်နေ့ မနတ် ၁၀နာရီ ၃၀ မိနစ်ခန့်တွင် တိုင်းတာချက်များအရ တာချီလိတ်မြို့၊ လွယ်တော်ခမ်းကျေးရွာတွင် မြို့၏ စိုးရိမ်ရေမှတ် အထက်သို့ ၂ပေခွဲခန့် ကျော်လွန်နေပြီး ၂၄နာရီအတွင်း တစ်ပေခန့်ထပ်မံမြင့်တက်လာနိုင်ကြောင်း မိုးဇလက ထုတ်ပြန်ထားသည်။

ယခုအကြိမ် တာချီလိတ်ရေကြီးမှုသည် တစ်နှစ်အတွင်း ၁၅ ကြိမ်မြောက်ဖြစ်ပြီး ရေကြီးနစ်မြုပ်မှုကြောင့် ဒေသခံများ လူမှု၊ စီးပွား အခက်အခဲများစွာ ရင်ဆိုင်နေရသည်။

#MeKongNews
#တာချီလိတ်
#မယ်ဆိုင်ချောင်းရေ
#ရေကြီးခြင်း
#စိုးရိမ်ရေမှတ်အထက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)