မဲခေါင်၊ ဩဂုတ် ၈
စီးပွားရေးလုပ်ငန်းများ ပြန်လည် လည်ပတ်နိုင်ပြီ ဖြစ်၍ ၂၀၂၅ ခုနှစ် စက်တင်ဘာလ ၁ ရက်နေ့မှ ကိုးကန့် (MNDAA) ထိန်းချုပ်နယ်မြေများတွင် အခွန်ပြန်လည်ကောက်ခံမည် ဖြစ်ပြီး ကနဦး တဝက်လျော့ချပေးသည့် မူဝါဒကို ကျင့်သုံးမည် ဟု ကိုးကန့်တပ်ဖွဲ့က သတင်းထုတ်ပြန်ထားသည်။
၁၀၂၇ စစ်ဆင်ရေးကာလများအပြီးတွင် ဒေသပြန်လည်တည်ထောင်ရေးအစပိုင်းကာလများတွင် စီးပွားရေးအခြေခံအုတ်မြစ်ကို ခိုင်မာစေရန်၊ ပြည်သူများ၏ စီးပွားရေးလုပ်ငန်းလုပ်ကိုင်မှုဖိအားကို လျော့ချပေးနိုင်ရန်၊ ဈေးကွက်အခြေအနေ ပုံမှန်ပြန်ဖြစ်လာစေရန်အတွက် ကိုးကန့်ထိန်းချုပ်နယ်မြေများအတွင်း စီးပွားရေးအကောက်ခွန်များ လျော့ချပေးသည့်မူဝါဒကို တဆင့်ပြီး တဆင့် အကောင်အထည်ဖော်ခဲ့သည် ဟု ထုတ်ပြန်ထားသည်။
ယခုအခါ ကိုးကန့်ထိန်းချုပ်ဒေသများရှိ စီးပွားရေးလုပ်ငန်းများနှင့် ထုတ်လုပ်မှုလုပ်ငန်းများမှာ အပြည့်အဝ ပြန်လည်လည်ပတ်လာနိုင်သည့် အခြေအနေတွင် ရောက်ရှိလာပြီး အများပြည်သူဆိုင်ရာ ဝန်ဆောင်မှုလုပ်ငန်းများ၊ အခြေခံအဆောက်အဦးတည်ဆောက်ရေးလုပ်ငန်းများနှင့် လူမှုရေးဖွံဖြိုးတိုးတက်ရေး လုပ်ငန်းများကို အာမခံချက် ပေးနိုင်ရန်အတွက် ၂၀၂၅ ခုနှစ် စက်တင်ဘာလ ၁ ရက်နေ့မှ စတင်ကာ စီးပွားရေးအကောက်ခွန် ပြန်လည်ကောက်ခံခြင်း လုပ်ငန်းစဉ်ကို အကောင်အထည်ဖော်မည် ဟု ဖော်ပြထားသည်။
အခွန်ကောက်ခံမှု လုပ်ငန်းများကို ယခင်ကဲ့သို့ တစ်ဝတ်လျော့ချပေးသည့် မူဝါဒကို ဆက်လက်အကောင်အထည်ဖော် ဆောင်ရွက်မည်ဟုဆိုပြီး လုပ်ငန်းလိုင်စင် မလုပ်ဆောင်ရသေးသည့် လုပ်ငန်းရှင်များ သို့မဟုတ် ကုမ္ပဏီများအနေနှင့် ဒေသဆိုင်ရာ ဈေးကွက်နှင့် ကုန်သွယ်ရေး ကြီးကြပ်ထိန်းသိမ်းရေးဦးစီးဌာနသို့ အမြန်ဆုံး သွားရောက်လျှောက်ထားကြရန် နိုးဆော်ထားသည်။
လုပ်ငန်းရှင်များ၊ ကုမ္ပဏီများ အနေဖြင့် မိမိတို့၏ စီးပွားရေးလုပ်ငန်းများ လည်ပတ်မှုကို မထိခိုက်စေရန် စက်တင်ဘာလမတိုင်မီ အပြီးအစီး လုပ်ဆောင်ရမည်ဟု ဆိုကာ ကိုးကန့်ထိန်းချုပ်ထားသည့် နယ်မြေအားလုံး အကျုံးဝင်သည်ဟု ဆိုသည်။
အချို့သော စီးပွားရေးအခွန်နှင့် အကောက်တော်ခွန်များအတွက် အချိန်မရွေးပြောင်းလဲတက်သော အခွန်စနစ်ကို ကျင့်သုံးမည် ဖြစ်၍ သက်ဆိုင်ရာ အကောက်ခွန်ဦးစီးဌာနကို သွားရောက်စုံစမ်းရန် အသိပေးထားသည်။
ဖေသန်း
#MeKongNews
#MNDAA
#ကိုးကန့်
#စီးပွားရေးအခွန်
#အထူးဒေသ၁
