မဲခေါင်၊ ဇွန် ၁၈
တာချီလိတ်မြို့တွင် ရွှေဆိုင်များအပါအဝင် လုပ်ငန်းပေါင်းများစွာ ပိုင်ဆိုင်ထားသည့် ကြီးမြတ်သောရွှေမြင်း လုပ်ငန်းစု၏ သူဌေးဖြစ်သူ အားချန်ကို ထိုင်းအာဏာပိုင်များက အရေးကြီးမူးယစ်ရာဇာအဖြစ် ဖမ်းဝရမ်းထုတ်လိုက်ပြီး ထိုင်းနိုင်ငံအတွင်းရှိ ၎င်း၏ ပိုင်ဆိုင်မှုအချို့ကို ချိတ်ပိတ်လိုက်ကြောင်း ထိုင်းမူးယစ်ဆေးဝါးနှိမ်နှင်းရေးဘုတ်အဖွဲ့ – Office of the Narcotics Control Board – ONCB က ယနေ့ သတင်းစာရှင်းလင်းပွဲတွင် ထုတ်ပြန်သည်။
ထိုင်းနိုင်ငံ၊ ချင်းရိုင်မြို့တွင် ယနေ့ ဇွန်လ ၁၈ရက် ပြုလုပ်သည့် သတင်းစာရှင်းလင်းပွဲတွင် တာချီလိတ်မှ ကြီးမြတ်သောရွှေမြင်း လုပ်ငန်းစုသူဌေး အားချန်မှာ မူးယစ်ရာဇာကြီးဖြစ်ပြီး ဘန်ကောက်အပါအဝင် ထိုင်းနိုင်ငံ အနှံ့အပြားနှင့် အရှေ့တောင်အာရှသို့ မူးယစ်ဆေးဝါးများ ဖြန့်ဖြူးနေခြင်းဖြစ်ကြောင်း ONCB ထိုင်းတာဝန်ရှိသူများက ပြောသည်။
မူးယစ်ရာဇာကြီး အားချန်မှာ တာချီလိတ်မြို့တွင် ပိုင်ဆိုင်မှု ဘတ် တစ်ဘီလီယံ (သန်း ၁၀၀၀) ခန့်ရှိကြောင်း၊ အရေးကြီးသည့် မူးယစ်ရာဇာကြီးဖြစ်ကြောင်း၊ ထိုင်းနိုင်ငံအတွင်း ၎င်း၏ ပိုင်ဆိုင်မှုမှာ ဘတ် သန်း ၁၀၀ ခန့်ရှိပြီး ၎င်းတို့ကို သိမ်းဆည်းလိုက်ပြီဖြစ်ကြောင်း၊ အားချန်မှာ မြန်မာနိုင်ငံဘက်သို့ ထွက်ပြေးသွားပြီး ထိုင်းအာဏာပိုင်များအနေဖြင့် မြန်မာအာဏာပိုင်များနှင့် ပူးပေါင်းကာ ပိုက်စိတ်တိုက် ရှာဖွေနေကြောင်း ONCB က သတင်းစာရှင်းလင်းပွဲတွင် ပြောသည်။
ကြီးမြတ်သောရွှေမြင်းလုပ်ငန်းစုသည် တာချီလိတ်မြို့အပါအဝင် ရှမ်းအရှေ့တွင် စီးပွားရေးလုပ်ငန်းများစွာ ပိုင်ဆိုင်ထားသည့် လုပ်ငန်းစုဖြစ်ပြီး ရွှေဆိုင်၊ အင်တာနက်လုပ်ငန်း၊ အိမ်ဆောက်ပစ္စည်းဆိုင်များ၊ အိမ်သုံးပစ္စည်းဆိုင်များ၊ ဆောက်လုပ်ရေးလုပ်ငန်းများ၊ ကာစီနိုများ၊ ဖျော်ဖြေရေးခန်းမများစွာကို လုပ်ကိုင်လျက်ရှိသည်။
ယင်းလုပ်ငန်းစု၏ ပိုင်ရှင် အားချန်မှာ တရုတ်နွယ်ဖွား လူလတ်ပိုင်းတစ်ဦးဖြစ်ပြီး ပြိုင်ကားများ စုဆောင်းရသည်ကို ဝါသနာပါသူဖြစ်ပြီး ၎င်း၏ လူမှုကွန်ယက်အကောင့်များတွင် ပြိုင်ကားများဖြင့် ရိုက်ကူးထားသည့်ပုံများ မကြာခဏ တင်လေ့ရှိသည်။
#MeKongNews
#တာချီလိတ်
#မူးယစ်ရာဇာ
#ကြီးမြတ်သောရွှေမြင်း
#ထိုင်းနိုင်ငံ
