မဲခေါင်၊ ဇွန် ၁၆
စစ်ကောင်စီရွေးကောက်ပွဲတွင် အသုံးပြုမည့် မြန်မာ့အီလက်ထရွန်နစ်မဲပေးစက် – EVM အသုံးပြုနည်း နည်းပြဆရာဖြစ်သင်တန်းကို ဇွန်လ ၁၆ ရက်နေ့မှ ၁၇ ရက်နေ့အထိ ရှမ်းပြည်အရှေ့ပိုင်း၊ ကျိုင်းတုံမြို့ မြို့တော်ခန်းမတွင် ကျင်းပလျက်ရှိသည်။
ယင်းသင်တန်းကို တက်ရောက်သည့်သူများမှတဆင့် မဲပေးစက် အသုံးပြုနည်းများကို ပြည်သူများထံ ဆက်လက်မျှဝေ သင်ကြားပေးရမှာဖြစ်ကြောင်း သိရသည်။
“ရှမ်းအရှေ့က ဘာတိုက်ပွဲမှမရှိတော့ အမာခံအနေနဲ့ကို လုပ်မှာ။ ဒါပေမယ့် တချို့နေရာတွေဆို ကြံဖွံ့ပါတီတစ်ခုထဲ ရှိတော့တယ်။ မိုင်းတုံ ၁ ဆို ကျားဖြူ၊ ကျားခေါင်း၊ NLD၊ လားဟူ၊ တစည မဝင်တော့ဘူးကြားတော့ တစ်ပါတီထဲပြိုင်မလား မသိဘူး။ ကျားဖြူဥက္ကဌ စိုင်းအိုက်ပေါင်းကတော့ တစ်ယောက်ထဲ မဲလာထည့်လည်း ရွေးကောက်ပွဲအောင်မြင်တယ် ပြောတာပဲ” ဟု ကျိုင်းတုံဒေသခံတစ်ဦး က မဲခေါင်ကို ပြောသည်။
ရှမ်းမြောက်တွင် MNDAA နှင့် TNLA ထိန်းချုပ်ထားသည့် မြို့နယ်များမှ လွဲ၍ စစ်ကောင်စီ ထိန်းချုပ်ထားနိုင်သည့် လားရှိူး၊ မူဆယ်၊ တန့်ယန်း၊ မိုင်းရယ် ၄ မြို့နယ်၊ ရှမ်းပြည်အရှေ့ပိုင်းမှ ၉ မြို့နယ်၊ ရှမ်းပြည်တောင်ပိုင်း၌ ၂၁ မြို့နယ်၊ စုစုပေါင်း ၃၃ မြို့နယ်ထက်မနည်း ရှမ်းပြည်နယ်အတွင်း စစ်ကောင်စီက ရွေးကောက်ပွဲကျင်းပနိုင်မည်ဟု မျှော်လင့်ထားသည်။
“အကယ်၍ MNDAA က လုပ်ခွင့်ပြုမယ်ဆိုရင် မဲဆန္ဒနယ်မြေတွေ ပိုလာနိုင်တယ်။ TNLA ကလည်း ပြောမရဘူး စောင့်ကြည်ရမှာပဲ။ “ဝ” နဲ့ မိုင်းလားက အရင်ကတည်းက မလုပ်ခဲ့တာ၊ ခုလည်း မလုပ်နိုင်ဘူးဆိုပေမယ့် နိုင်ငံရေးအရ ပြောင်းလဲနိုင်တော့ မခန့်မှန်းတတ်ဘူး” ဟု နိုင်ငံရေးလေ့လာသူတစ်ဦးက မဲခေါင်ကို ပြောသည်။
စစ်ကောင်စီခန့် ပြည်ထောင်စုရွေးကောက်ပွဲကော်မရှင်၏ လက်ရှိ စာရင်းဇယားများအရ မြို့နယ်ပေါင်း ၂၆၇ မြို့နယ်တွင် ရွေးကောက်ပွဲကျင်းပဖို့ရှိသည်ဟု ဇွန်၇ရက်က ဝါဒဖြန့်မီဒီယာများသို့ ပြောကြားထားသည််။
ကျင်းပမည့် ရွေးကောက်ပွဲတွင် ယခင်ကျင့်သုံးခဲ့သည့် မဲအများဆုံးရသူ အနိုင်ယူစနစ်(FPTP)နှင့် အချိုးကျ ကိုယ်စားပြုစနစ်(PR) ၂ မျိုးလုံး အသုံးပြုဆောင်ရွက်သွားမှာ ဖြစ်သည်ဟုလည်းဆိုထားသည်။
ရွေးကောက်ပွဲတွင် မဲပေးရမည့်စနစ်မှ မြန်မာအီလက်ထရောနစ်မဲပေးစက် (Myanmar Electronic Voting Machine-MEVM) ဖြစ်ပြီး မဲပေးစက်မှာ Internet, Wifi, Bluetooth စနစ်များ မပါဝင်ဘဲ ကွန်ပျူတာများကဲ့သို့ ဝင်းဒိုးစနစ်(OS)များ မပါဝင်သည့် မိုက်ခရိုကွန်ထရိုလာစနစ် ဖြစ်သည့်အတွက် အလွန်ရိုးရှင်းပြီး လုံခြုံစိတ်ချရသော စနစ်ဖြစ်သည်ဟု စစ်ကောင်စီက ညွှန်းဆိုထားသည်။
“Microcontroller ကလည်း ပြောင်းလို့ပြင်လို့ရတာပဲလေ။ ကုဒ် (Code) ထဲမှာကိုက လိမ်ထားရင် ခြေရာခံဖို့ ပိုလို့တောင်ဆိုးသေး။ Bootloader ကနေ မသမာတဲ့ ကုဒ်တင်ပြီး ခြေရာပြန်ဖျောက်လိုက်ရင် ဆက်သွယ်ထားတဲ့ ကွန်ရက်မရှိ၊ Log မှတ်တမ်း မရှိရင် ဘယ်လိုစစ်ဆေးနိုင်မှာလဲ”ဟု ယင်းစနစ်ကို တတ်သိသူတစ်ဦးက ဝေzန်ထောက်ပြသည်။
လက်ရှိတွင် စစ်ကောင်စီ၏ ရွေးကောက်ပွဲဝင်ရန် ၅၇ ပါတီ မှတ်ပုံတင်ထားပြီး လာမည့် ၂၀၂၅ ခုနှစ်၊ ဒီဇင်ဘာလနှင့် ၂၀၂၆ ခုနှစ်၊ ဇန်နဝါရီလတို့တွင် အပိုင်းလိုက် ခွဲ၍ ကျင်းပသွားမည်ဟု စစ်ကောင်စီဥက္ကဌက ပြောကြားထားသည်။
#MeKongNews
#ရှမ်းအရှေ့
#ကျိုင်းတုံ
#စစ်ကောင်စီရွေးကောက်ပွဲ
#အတုအယောင်
#MEVM
#မဲပေးစက်
