မဲခေါင်၊ မေ ၃
တာချီလိတ်မြို့ရှိ ကားရေဆေးခုံများ၊ ကားအရာင်းပြခန်းများတွင် လိုင်စင်မဲ့ကားများကို မေလ ၂ ရက်၌ လိုက်လံဖမ်းဆီးနေကြောင်း ဒေသခံများထံမှ သိရသည်။
စစ်ကောင်စီ၏ အဖွဲ့စုံပါသည့်အဖွဲ့များဖြင့် လိုက်လံဖမ်းဆီးနေခြင်းဖြစ်ပြီး ဆန်ဆိုင်း (က) ရပ်ကွက်အတွင်းရှိ KK ကားဆားဗစ်စင်တာမှ ကားများကို ဖမ်းဆီးသွားကြောင်း ဒေသခံတစ်ဦးက ပြောသည်။
“လိုက်ဖမ်းမယ်တော့ ပြောနေသံကြားတယ်။ အခုက အဖမ်းခံရတဲ့လူကလည်း ဘာမှ အသံမထွက်ရဲဘူး။ လူတွေလည်း အစစအရာရာ ဒုက္ခရောက်နေကြတယ်” ဟု ၎င်းကပြောသည်။
KK ကားဆားဗစ်စင်တာမှ ကား ၁၃စီးဖမ်းဆီးသွားကြောင်း နီးစပ်သူတစ်ဦးက ပြောပြီး စစ်ကောင်စီထုတ်ပြန်ချက်တွင်မူ ၁၂ စီး ဖမ်းဆီးရမိကြောင်း ကြေညာထားသည်။
စစ်ကောင်စီအာဘော် မြဝတီသတင်းတွင် မေလ ၂ ရက်၊ နေ့လယ်ပိုင်းက တာချီလိတ်မြို့၊ ဆန်ဆိုင်း (က)ရပ်ကွက်၊ ပုံလို့လမ်းရှိ ဦးအားမြင့် ပိုင် KK Car Service တွင် တရားမဝင် အကောက်ခွန်မဲ့၊ လိုင်စင်မဲ့ယာဉ်များရှိကြောင်း သတင်းအရ ဝင်ရောက်စစ်ဆေးရာ Honda CRV / Alphard ကဲ့သို့သော မော်တော်ယဥ် ၁၂ စီးကို သိမ်းဆည်းရမိကြောင်း၊ ယင်းဖမ်းဆီးမှုနှင့် ပတ်သက်၍ ဦးအားမြင့် ခြံဝန်းအတွင်း တရားမဝင် အကောက်ခွန်မဲ့ မော်တော်ယာဥ်များအား တင်သွင်းသိမ်းဆည်းထားသည့် ဦးအားချန်အား ပို့ကုန်၊ သွင်းကုန် ဥပဒေဖြင့် တာချီလိတ် မြို့မရဲစခန်းတွင် အမှုဖွင့် အရေးယူဆောင်ရွက်ထားကြောင်း ဖော်ပြထားသည်။
တာချီလိတ်မြို့အပါအဝင် ရှမ်းပြည်အနှံ့၌ လိုင်စင်မဲ့ယာဉ်များကိုသာ အားပြုစီးနင်းနေခြင်းဖြစ်သော်လည်း ယခုလပိုင်းအတွင်း ရှမ်းအရှေ့နှင့် ရှမ်းတောင်ရှိ မြို့နယ်များတွင် စစ်ကောင်စီက လိုင်စင်မဲ့ယာဉ်ဖမ်းဆီးမှုများ တင်းတင်းကြပ်ကြပ် လုပ်ဆောင်နေသည့်အတွက် ပြည်သူအများ အခက်တွေ့နေကြသည်။
ပြီးခဲ့သည့် ဖေဖော်ဝါရီ ၅ ရက်ကလည်း ကျိုင်းတုံ ပြည်နယ်ခွဲရဲမှူးကြီး၏ အမိန့်ဖြင့် တာချီလိတ်မြို့အတွင်း လိုင်စင်မဲ့ကားများ ဖမ်းဆီးသည်ဟု အကြောင်းပြကာ လိုင်စင်ရှိကားများ အပါအဝင် ကားစီးရေ ၃၀ ခန့် ဖမ်းဆီးခဲ့သဖြင့် ဖမ်းဆီးခဲ့သူများအား နေပြည်တော်အထူး စုံစမ်းစစ်ဆေးရေးဦးစီးဌာနက ဒုချုပ်ကိုယ်တိုင် လာရောက်စစ်ဆေးခဲ့သေးသည်။
#MeKongNews
#တာချီလိတ်
#လိုင်စင်မဲ့ကား
#ကားရေဆေးခုံ
#ရှမ်းအရှေ့
