မဲခေါင်၊ ဧပြီ ၁

ငလျင်ဒဏ်သင့် မန္တလေးမြို့သို့ စစ်ခေါင်းဆောင်ရောက်ရှိခဲ့သော်လည်း တဖက်ကမ်း စစ်ကိုင်းမြို့သို့ စစ်ခေါင်းဆောင်မသွားဘဲ နေပြည်တော်ပြန်ကာ သူတည်ထားသည့် မာရဝိဇယဘုရားသို့ သွားကြည့်ခဲ့သည်ဟု စစ်ကောင်စီရုပ်သံများတွင် ယနေ့ (ဧပြီ ၁) ၌ ဖော်ပြသည်။

၂၀၂၁ ခုနှစ် စစ်ခေါင်းဆောင်မင်းအောင်လှိုင် အာဏာသိမ်းပြီးနောက် တည်ထားခဲ့သည့် မာရဝိဇယ ထိုင်တော်မူရုပ်ပွားတော်သည် သက်တမ်းအားဖြင့် ၂ နှစ်ကျော်သာ ရှိသေးသည်။ တည်ထားစဥ်က စစ်တပ်အင်ဂျင်နီယာများဖြင့် စနစ်တကျ တည်ထားခဲ့ခြင်းကြောင့် ပြင်းထန်ငလျင်လှုပ်ခတ်စဥ် မည်သည့်ထိခိုက်မှုမျှ မရှိကြောင်း စစ်တပ်ပိုင် မီဒီယာများက ဖော်ပြသည်။

ဘုရားရင်ပြင်တော် လျှောက်လမ်းနှင့် ရင်ပြင်တော်ကြွေပြားတချို့ ထိခိုက်ခဲ့မှု၊ ရုပ်ပွားတော်နှင့်အတူ တည်ဆောက်ခဲ့သည့် အဂ္ဂအဓိပတိကျောင်းဆောင်တို့ အနည်းငယ်သာ ထိခိုက်ခဲ့သည်ဟုဆိုသည်။

အာဏာသိမ်းပြီးနောက် တည်ထားကိုးကွယ်မှု ပြီးစီးခဲ့သည့် ထိုင်တော်မူ ထိုစေတီကို မင်းအောင်လှိုင်ဘုရားဟု ဒီမိုကရေစီလိုလားသူများက ခေါ်ကြသည်။ စစ်ခေါင်းဆောင်ကမူ ထိုင်တော်မူ ထိုစေတီသည် ကမ္ဘာပေါ်တွင် အကြီးဆုံးဟု ဂုဏ်ယူစွာ ပြောလေ့ရှိသည်။

တည်ထားမှုပြီးနောက် အရံစေတီများသည် မညီမညာဖြစ်နေသည်ဟု ဝေဖန်မှုများလည်း ရှိခဲ့သည်။

ပြင်းထန်ငလျင်လှုပ်ခတ်ပြီး နောက်နေ့ (မတ် ၂၉) တွင် စစ်ခေါင်းဆောင်သည် မန္တလေးမြို့ ငလျင်ဒဏ်ခံရသည့် နေရာများသို့သွားရောက်ခဲ့ပြီး နေပြည်တော်သို့ ပြန်ခဲ့သည်။ နိုင်ငံတကာ ကယ်ဆယ်ရေးအဖွဲ့များ ရောက်ရှိလာပြီးနောက် နေပြည်တော်ကိုသာ ဦးစားပေးကယ်တင်ရန် ညွှန်ကြားမှုများ ရှိသည်ဟုဆိုသည်။

ငလျင်ကြောင့် နေပြည်တော်တွင် စစ်ရုံးချုပ်၊ စစ်ခေါင်းဆောင်များနေထိုင်သည့်အိမ်၊ ဝန်ကြီးဌာနရုံးများ ထိခိုက်ပျက်စီးခဲ့သည်။ ဝန်ထမ်းများလည်း ထောင်ချီ သေဆုံးခဲ့သည်။

စစ်ခေါင်းဆောင်သည် မန္တလေးမြို့သို့ မတ် ၂၉ ရက်တွင် ရောက်ရှိခဲ့သော်လည်း တဖက်ကမ်း စစ်ကိုင်းမြို့သို့ မသွားရောက်ခဲ့ဘဲ နေပြည်တော်သို ပြန်လာခဲ့ခြင်းဖြစ်သည်။ နေပြည်တော်တွင်လည်း အသေအပျောက်များနေသည်။

လက်ရှိအချိန်အထိ ပြင်းထန်ငလျင်ကြောင့် သေဆုံးသူ ၂၇၀၀ ကျော်ပြီဖြစ်သည်။ ပျောက်ဆုံးသူနှင့် ဒဏ်ရာရရှိသူများပြားနေသည်။

နေပြည်တော်ကို စတင်တည်ဆောက်ခဲ့သည့် အာဏာရှင်ဟောင်းဦးသန်းရွှေ တည်ထားခဲ့သောရွှေတိဂုံပုံတူ ဥပါဒသန္တိစေတီတော်ကို စစ်ခေါင်းဆောင်မင်းအောင်လှိုင် သွားကြည့်ခဲ့ခြင်း မရှိပါ။ ထိုစေတီ ထိခိုက်ပျက်စီးမှုကိုလည်း မဲခေါင်သတင်းဌာနက မသိရသေးပါ။

နေပြည်တော်တွင် စစ်ခေါင်းဆောင်လှည့်ကြည့်ခဲ့သည့် အဆောက်အဦးများတွင် လွှတ်တော်အဆောက်အဦလည်းပါရှိသည်။

#MeKongNews
#စစ်ခေါင်းဆောင်
#မင်းအောင်လှိုင်ဘုရား
#သွားကြည့်
#နေပြည်တော်
#စစ်ကိုင်းငလျင်
#ထိုင်တော်မူ
#မာရဝိဇယ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)