မဲခေါင်၊ ဖေဖော်ဝါရီ ၁၁
ကန့်ဘလူမြို့နယ်၊ ချပ်သင်းရွာဘက်မှာ ပွိုင့် ၅ နဲ့ ပစ်ခတ်ခံရပြီး မီးခိုးထွက်သွားတဲ့ စစ်ကောင်စီတိုက်လေယာဉ် MI 35 ဟာ ကန့်ဘလူမြို့နယ်ထဲက အမြောက်တပ်ဖြစ်တဲ့ ၆၀၀၆ ထဲကို ပြန်ဆင်းသွားနိုင်ခဲ့ပြီး ပြင်ဆင်မှုတွေပြုလုပ်နေတယ်လို့ စစ်ရေးသတင်းရင်းမြစ်တွေက ပြောပါတယ်။
ပွိုင့် ၅ ကျည်ထိမှန်ပြီး မီးခိုးထွက်နေတဲ့ MI 35 ရဟတ်ယာဉ်ဟာ ပျက်ကျသွားခြင်းမရှိဘဲ ၆၀၀၆ အမြောက်တပ်ထဲ ပြန်ဆင်းသွားနိုင်ခဲ့ကာ MI 35 ရဟတ်ယာဉ်ပြင်ဆင်ဖို့အတွက် ပစ္စည်းတွေကို မုံရွာ နမခကနေ MI 17 ရဟတ်ယာဉ်နဲ့ သယ်ဆောင်လာပြီး ပြင်ဆင်နေတယ်လို့ စစ်ရေးသတင်းရင်းမြစ်က မဲခေါင်ကို ပြောပါတယ်။
“အနည်းဆုံးတော့ ၂ လလောက် ပြင်ရမယ်။ ပန်ကာဒလက်နားတွေပါ မှန်သွားတယ်” လို့ သူက ပြောပါတယ်။
အဲဒီ MI 35 ရဟတ်ယာဉ်ဟာ ဖေဖော်ဝါရီလ ၈ ရက်က ကန့်ဘလူမြို့နယ်၊ ချပ်သင်းရွာဘက်ကို လေကြောင်းကနေတိုက်ခိုက်ဖို့ လာရောက်စဉ် မြေပြင်ကနေ တော်လှန်ရေးတပ်ဖွဲ့တွေက ပွိုင့် ၅ နဲ့ ပြန်လည်ပစ်ခတ်ရာမှာ ထိမှန်သွားတာ ဖြစ်ပါတယ်။
၂၀၂၃ ခု နှစ်ကုန်ပိုင်းလောက်ကစလို့ တိုင်းရင်းသားလက်နက်ကိုင်တပ်ဖွဲ့တွေ အပါအဝင် တော်လှန်ရေးတပ်ဖွဲ့တွေက စစ်ကောင်စီရဲ့ စစ်ရဟတ်ယာဉ်နဲ့ တိုက်လေယာဉ်တွေကို ခပ်စိပ်စိပ် ပစ်ချလာနိုင်ခဲ့ပြီး ၂၀၂၃ ခုနှစ် နိုဝင်ဘာလကနေ ဒီနေ့အထိ စစ်ရဟတ်ယာဉ်နဲ့ တိုက်လေယာဉ် ၄ စင်း ပစ်ချခံထားရပါတယ်။
၂၀၂၁ ခုနှစ် အာဏာသိမ်းကတည်းကစလို့ ပစ်ချခံရပြီး ပျက်စီးသွားတဲ့ စစ်ကောင်စီရဲ့ စစ်ရဟတ်ယာဉ်နဲ့ တိုက်လေယာဉ်ယာဉ် စုစုပေါင်း ၇ စင်းရှိတယ်လို့ RFA မြန်မာပိုင်းရဲ့ သတင်းမှာ ဖော်ပြထားပါတယ်။
စစ်ကောင်စီဟာ မြေပြင်မှာ စစ်ရှူံးနိမ့်နေတာကြောင့် လေကြောင်းတိုက်ခိုက်မှုကို အားကိုးလာခဲ့ပြီး တော်လှန်ရေးတပ်ဖွဲ့တွေကိုသာမက ပြည်သူတွေနဲ့ ကျေးရွာတွေကိုပဲ တိုက်ခိုက်နေတာဖြစ်ပါတယ်။
MK – 004
#MeKongNews
#MI35
#ချပ်သင်း
#ပွိုင့်၅
