မဲခေါင်၊ စက်တင်ဘာ ၁၄
၁၀၂၇ စစ်ဆင်ရေးပြီးသည့်နောက်ပိုင်း ကိုးကန့်ဒေသနှင့် ဝဒေသရှိ ကျားဖြန့်ငွေလိမ်ဂိုဏ်းများသည် ရှမ်းတောင်နှင့်ရှမ်းရှေ့ရှိ မြို့နယ် ၁၇ ခုထက်မနည်းသို့ ပျံ့နှံ့ရောက်ရှိသွားသည်ဟု အစီရင်ခံစာတစ်ခုတွင် ဖော်ပြသည်။
ISP မြန်မာက ယခုစက်တင်ဘာလတွင် ထုတ်ပြန်သည့် အစီရင်ခံစာတွင် ယင်းကဲ့သည့် ထည့်သွင်းဖော်ပြလာခြင်း ဖြစ်သည်။
“စစ်ဆင်ရေး ၁ဝ၂၇ ပြီးသွားပြီလို့ ဆိုနိုင်ပေမဲ့ မူလရည်ရွယ်ချက်တွေအတိုင်း မဖြစ်ခဲ့တာတွေလည်း ရှိပါတယ်။ ကျားဖြန့်အွန်လိုင်းလောင်းကစားတွေလည်း ပပျောက်သွားတာ မရှိပါဘူး။ ကိုးကန့်ဒေသနဲ့ “ဝ”ကိုယ်ပိုင်အုပ်ချုပ်ခွင့်ရဒေသတွေမှာရှိခဲ့တဲ့ ကျားဖြန့်လုပ်ငန်းတွေဟာ စစ်ဆင်ရေး ၁ဝ၂၇အလွန်မှာ ရှမ်းပြည်နယ်တောင်ပိုင်းနဲ့ အရှေ့ ပိုင်းကို ရွှေ့ပြောင်းပျံ့နှံ့သွားပါတယ်”ဟု ISP ကပြောသည်။
ဥပမာအားဖြင့် တန့်ယန်း၊ လဲချားနှင့် တာချီလိတ်မြို့နယ်များတွင် ကျားဖြန့်လုပ်ငန်းများကို အများဆုံးတွေ့ရပြီး စစ်ကောင်စီ ထိန်းချုပ်ထားသည့် မူဆယ်မြို့တွင်လည်း ကျားဖြန့်လုပ်ငန်းများ ကျယ်ကျယ်ပြန့်ပြန့်လုပ်နေကြသည်ဟု ဆိုသည်။
အများ ပြည်သူ လွတ်လပ်စွာရယူကြည့်ရှုနိုင်သည့် ရင်းမြစ်များအရ ရှမ်းပြည်နယ်အတွင်းရှိ ဟိုပုံး၊ လဲချား၊ နမ့်စန်၊ မိုင်းရယ်၊ တန့်ယန်း၊ ကျိုင်းတုံ၊ မိုင်းဆတ်၊ မိုင်းတုံ၊ တာချီလိတ် စသည့် ၁၇ ခုထက်မနည်းတွင် ကျားဖြန့် လုပ်ငန်းများ ရှိနေသည်ကို တွေ့ရသည်ဟု ISP ကဆိုသည်။
“ဒီဒေသတွေမှာ ကျားဖြန့်လုပ်ငန်း ၂၅ ခုထက်မနည်းဟာ လက်ရှိမှာ ဆက်လက်လည်ပတ်နေပါတယ်” ဟု ISP က ပြောသည်။
လောက်ကိုင်၊ ပန်ဆန်း၊ မိုင်းလားမှ ကျားဖြန့်များသည် ၁၀၂၇ စစ်ဆင်ရေးအလွန်တွင် ရှမ်းတောင်နှင့်ရှမ်းရှေ့သို့ ရွေ့ပြောင်းသွားကြခြင်းဖြစ်ပြီး တန့်ယန်း လဲချား တာချီလိတ် မူဆယ်မြို့နယ်များတွင် ကျားဖြန့်လုပ်ငန်းများကို အများဆုံးတွေ့ရသည်ဟု ဆိုသည်။
ယခုစာရင်းများစသည့် အများပြည်သူ လွတ်လပ်စွာ ရယူကြည့်ရှုနိုင်သည့် အရင်းအမြစ်များကိုသာ အသုံးပြုကောက်ယူထားခြင်းဖြစ်သဖြင့် မြေပြင်နှင့်ကွဲလွဲမှုတစ်စုံတစ်ရာရှိနိုင်သည်ဟု အစီရင်ခံစာတွင် ဆိုသည်။
၂ဝ၂၃ ခုနှစ် အောက်တိုဘာ ၂၇ ရက်တွင် စတင်သည့် ၁ဝ၂၇ စစ်ဆင်ရေးသည် ကျားဖြန့် အွန်လိုင်းလောင်းကစားလိမ်လည်မှု ပပျောက်ရေး၊ မိမိဒေသကို ယခုထက် ပိုထိန်းချုပ် နိုင်ရေးနှင့် မြန်မာပြည်သူတရပ်လုံး၏ လိုလားချက်ဖြစ်သည့် စစ်အာဏာရှင်အမြစ်ပြတ်ရေး စသည်တို့ကို ရည်ရွယ်သော်လည်း ရွည်ရွယ်ချက်အတိုင်း မဖြစ်ခဲ့သည်များလည်းရှိသည်ဟု ISP က ဆိုသည်။
#MeKongNews
#ရှမ်းတောင်
#ရှမ်းရှေ့
#ကိုးကန့်
#ကျားဖြန့်
#စစ်ဆင်ရေး
