မဲခေါင်၊ ဇူလိုင် ၂၉
ရှမ်းပြည်မြောက်ပိုင်း။ လားရှိုးတွင် သူခိုးတစ်ဦးကို ရပ်ကွက်နေပြည်သူများက ကိုယ်ထူကိုယ်ထ ထမ်းမီဖမ်းဆီးရမိသည်ဟု သတင်းရင်းမြစ်များထံမှ သိရသည်။
ယမန်နေ့ ဇူလိုင် ၂၈ ရက်က လားရှိုးမြို့၊ ရပ်ကွက် ၁ ရှိ နေအိမ်တစ်အိမ်ကို သူခိုးတစ်ဦးက ဖောက်ထွင်းခိုးယူမှု ပြုလုပ်နေစဉ် ရပ်ကွက်နေ ပြည်သူများက ဖမ်းဆီးရမိခြင်းဖြစ်သည်။
“သူခိုးက အိမ်ထဲ ဝင်ခိုးနေတုန်း လူမိပြီး ဝိုင်းဖမ်းခံလိုက်ရတာပါ။ ပြည်သူတွေပဲ ဖမ်းတာက ။ ကိုယ်ထူ ကိုယ်ထပဲပေါ့။ ဖမ်းပြီးမှ ရဲကိုလွဲပြောင်းပေးလိုက်တာ။ ဟုတ်တယ် မနေ့ကတည်းက ဖမ်းပြီးချက်ချင်း ရဲကိုအပ်လိုက်တယ်”ဟု လားရှိုးမြို့ခံတစ်ဦးကပြောသည်။
အဆိုပါ သူခိုးအား အချိန်မှီ ဖမ်းဆီးနိုင်ခဲ့သဖြင့် အိမ်ရှင်များအနေဖြင့် ပစ္စည်းဆုံးရှုံးမှု မရှိခဲ့ကြောင်းလည်း သတင်းရင်းမြစ်ကပြောသည်။
စစ်ကောင်စီအုပ်ချုပ်ရေးမှူးများက သူခိုးများကို ကိုယ်ထူ ကိုယ်ထ ဖမ်းပြီးပါက အွန်လိုင်းပေါ် မတင်ရန် တားမြစ်ထားသည်။ ထိုသို့ တားမြစ်ထားသည်ကို ပြည်သူများက သဘောတူခြင်းမရှိပဲ ဆန့်ကျင်ကန့်ကွက်ခဲ့ကြသည်။
လားရှိုးမြို့တွင် ဇူလိုင် ၂၂ ရက်၌ သေနတ်ဖြင့် လမ်းသွားလမ်းလာပြည်သူကို ခြိမ်းခြောက်သည့် မူးယစ်ဆေးကြောင်သူတစ်ဦးကိုလည်းကောင်း၊ ဇူလိုင်လ ၁၇ ရက်တွင် ဆိုင်ကယ်သူခိုးတစ်ဦးကိုလည်းကောင်း၊ ဇူလိုင် ၁၄ ရက်တွင် ကားသူခိုး တစ်ဦးကိုလည်းကောင်း၊ ပြည်သူများကပင် ဝိုင်းဝန်းဖမ်းဆီးခဲ့သည်။
စစ်ကောင်စီက ထိန်းချုပ်ထားသည့် လားရှိုးမြို့တွင် လက်ရှိကာလအတွင်း၌ ခိုး ဆိုး လုယက်မှုများ မကြာခဏ ဖြစ်ပွားနေလျက်ရှိပြီး အချို့ဖြစ်စဉ်တွင် လူသေဆုံးမှုပါ ရှိခဲ့သည်။
ဇူလိုင် ၁၉ ရက်တွင် လားရှိုးမြို့ ရပ်ကွက် ၁၀ ရှိ နေအိမ်တစ်ခုကို လုယက်သူများက ပစ္စည်းများအား လုယက်သွားသည့်အပြင် အိမ်တွင်းရှိ ပြည်သူ ၂ ဦးကိုပါ သတ်ဖြတ်ခဲ့သည်။
#MeKongNews
#ရှမ်းမြောက်
#လားရှိုး
#သူခိုး
#စစ်ကောင်စီ
