မဲခေါင် | ဇူလိုင် ၂၉

ရှမ်းပြည်တောင်ပိုင်း၊ အောင်ပန်းမြို့ ဇူလိုင် ၂၈ရက်နေ့ ကုန်စည်ဈေးကွက်အခြေအနေအရ ငရုတ်ပွဈေးနှုန်းသည် ပြီးခဲ့သည့်လများနှင့် နှိုင်းယှဉ်ပါက သိသိသာသာ ပြန်လည်မြင့်တက်လာပြီး လက်ရှိတွင် ရှယ်အရည်အသွေး တစ်ပိဿာလျှင် ကျပ်သုံးထောင့်ငါးရာနှင့် အလတ်အရည်အသွေး တစ်ပိဿာလျှင် ကျပ်သုံးထောင်အထိ ပေါက်ဈေးရှိနေကြောင်း ဈေးကွက်အတွင်းမှ သိရသည်။

ပြီးခဲ့သည့် ဇွန်လအတွင်းက အောင်ပန်း၊ ပင်တယနှင့် တီကျစ်မြို့နယ်များတွင် ငရုတ်ပွသီးဈေးကွက်ပျက်ကာ ဝယ်လက်မရှိသလောက် ဖြစ်ခဲ့ပြီး တောင်သူအချို့မှာ စိုက်ခင်းများကို အခင်းလိုက်ဖျက်ဆီးခဲ့ရသည်။

ထိုစဉ်က ငရုတ်ပွသီးတစ်ပိဿာလျှင် ကျပ်ငါးရာမှ ခုနစ်ရာဝန်းကျင်သာ ရရှိခဲ့သော်လည်း နောက်ပိုင်းတွင် ဈေးကွက်အတွင်း ကုန်ပစ္စည်းဝင်ရောက်မှု လျော့နည်းလာခြင်းနှင့် ဝယ်လိုအား ပြန်လည်မြင့်တက်လာခြင်းတို့ကြောင့် ယခုကဲ့သို့ ကျပ်သုံးထောင်အထက်အထိ ဈေးပြန်တက်လာခြင်းဖြစ်ကြောင်း သိရသည်။

တစ်ဖက်တွင် ခရမ်းချဉ်သီးဈေးမှာ အဝင်ပမာဏများပြားနေခြင်းကြောင့် ဆက်လက်ကျဆင်းနေပြီး ဂွတ်သီးတစ်ပိဿာလျှင် ကျပ်တစ်ထောင့်ရှစ်ရာ၊ ရှယ်သီးတစ်ပိဿာလျှင် ကျပ်တစ်ထောင့်ငါးရာနှင့် အသေးသီးတစ်ပိဿာလျှင် ကျပ်တစ်ထောင့်သုံးရာသာ ရရှိနေကြောင်း သိရသည်။

“ပြီးခဲ့တဲ့လက ငရုတ်ပွကို ရောင်းဖို့တောင် ခက်ခဲခဲ့ပေမယ့် အခုတော့ ဈေးပြန်တက်လာလို့ တောင်သူတွေအတွက် နည်းနည်းအသက်ရှူချောင်လာပါတယ်။ ဒါပေမယ့် အရင်ဆုံးရှုံးခဲ့တဲ့ စိုက်စရိတ်တွေကိုတော့ အပြည့်အဝ ပြန်ကာမိဖို့ အချိန်ယူရဦးမှာပါ” ဟု အောင်ပန်းဒေသခံ တောင်သူတစ်ဦးက မဲခေါင်သို့ ပြောသည်။

လက်ရှိဈေးကွက်တွင် ဈေးနှုန်းအမြင့်ဆုံး ကုန်စည်များအဖြစ် လက်ဖက်ခြောက်၊ ရှမ်းပွခြောက်၊ ရွှေပဲရှယ်နှင့် အရည်အသွေးမြင့် နနွင်းတက်များမှာ ဈေးကောင်းရရှိနေပြီး၊ ဈေးနှုန်းအနိမ့်ဆုံး ကုန်စည်များအဖြစ် မုံညှင်း၊ ကျောက်ဖရုံသီး၊ ခရမ်းချဉ်သီးနှင့် ပြောင်းဆံတို့မှာ ဈေးနှုန်းနိမ့်နေဆဲဖြစ်ကြောင်း ဈေးကွက်အချက်အလက်များအရ သိရသည်။

ဒေသတွင်းကုန်သည်များက ရာသီအလိုက် ကုန်စည်အဝင်အထွက်နှင့် ဝယ်လိုအားအခြေအနေများအပေါ် မူတည်၍ ကုန်စည်ဈေးနှုန်းများ ဆက်လက်အပြောင်းအလဲ ဖြစ်ပေါ်နိုင်ကြောင်း သုံးသပ်ပြောဆိုထားသည်။

#MeKongNews
#ရှမ်းတောင်
#ငရုတ်ပွ
#ခရမ်းချဥ်
#အောင်ပန်း
#ကုန်စည်ဈေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)