မဲခေါင်၊ ဇူလိုင် ၂၂

ရှမ်းပြည်အရှေ့ပိုင်း၊ မိုင်းတုံမြို့နယ်၊ လွယ်ခမ်းလုံကျေးရွာအုပ်စု ရပ်ကျေးစာရေး ဦးဟိန်းဇေယျာဦး တရားမဝင် သစ်ခိုးထုတ်နေသည့် ပန်စလီကျေးရွာဝန်းကျင်သို့ မြို့နယ်အုပ်ချုပ်ရေးပိုင်းနှင့် ဌာနဆိုင်ရာ ပူးပေါင်းအဖွဲ့မှ သွားရောက်ရှာဖွေ စစ်ဆေးခဲ့သော်လည်း အမှန်တကယ် သစ်ခုတ်လှဲနေသည့် သစ်ကွင်းသို့ သွားရောက်စစ်ဆေးခဲ့ခြင်းမရှိကြောင်း ဒေသခံများက မဲခေါင်သို့ တိုင်တန်းပြောကြားလာသည်။

ယမန်နေ့ ဇူလိုင်လ ၂၁ ရက်နေ့၊ နံနက် ၉ နာရီ ၄၅ မိနစ်အချိန်က မိုင်းတုံမြို့နယ် အထွေထွေအုပ်ချုပ်ရေးဦးစီးဌာန၊ ရဲတပ်ဖွဲ့နှင့် သစ်တောဦးစီးဌာနတို့ ပါဝင်သော ပူးပေါင်းအဖွဲ့သည် ပန်စလီကျေးရွာဘက်သို့ သစ်ခိုးထုတ်မှု သတင်းအရ တက်ရောက်စစ်ဆေးခဲ့ကြခြင်း ဖြစ်သည်။

“သူတို့အဖွဲ့ ပန်စလီရွာဘက်ကို တက်သွားကြတယ်ဗျ။ ဒါပေမဲ့ အမှန်တကယ် သစ်ခိုးထုတ်နေတဲ့ ပန်စလီက သစ်ကွင်းနေရာကိုတော့ မသွားဘူး။ ဒေသခံ ရွာသားတွေကိုလည်း သစ်ခိုးထုတ်တဲ့ နေရာအမှန်ကို မမေးကြဘူး။ သူတို့ဘာသာ ကားလမ်းဘေးမှာရှိတဲ့ နေရာတချို့မှာ တွေ့တဲ့ သစ်တိုသစ်စ သစ်ကိုင်းတွေကို စုပုံပြီး မီးရှို့ပြသွားတာပဲ ရှိတယ်” ဟု ဒေသခံတစ်ဦးက မဲခေါင်သို့ ပြောသည်။

ယင်းထွေအုပ်စာရေး ခိုးထုတ်နေသည့် သစ်ကွင်းနေရာမှာ ပန်စလီကျေးရွာသို့ မရောက်မီ ဝဲဘက်တွင်ရှိသော ထင်းရှူးကုန်းဖြစ်ပြီး လက်ရှိတွင် စက်ယန္တရားများဖြင့် ခုတ်လှဲမှုကြောင့် တောင်တစ်ကုန်းလုံးနီးပါး သစ်ပင်များ ကုန်ခါနီး ဖြစ်နေပြီဖြစ်ကြောင်း ဒေသခံများက ပြောသည်။

“အဖွဲ့စုံက ရွာသားတွေကို ‘သစ်တွေ ဘယ်မှာ ပုံထားလဲ’ လို့တော့ မေးတယ်။ သစ်တွေကို ဘယ်နေရာမှာ ခုတ်လှဲထုတ်ယူနေတာလဲဆိုတာတော့ မမေးဘူး။ သစ်က လွန်ခဲ့တဲ့ ရက်ပိုင်းကမှ ခိုးထုတ်ရောင်းထားတာဆိုတော့ သစ်ပုံက ရွာထဲမှာ ဘယ်ရှိတော့မလဲ။ ပူပူနွေးနွေး သစ်ခုတ်ထားတဲ့ သစ်ကွင်းကို တိုက်ရိုက်သွားစစ်ပြီး ထိထိရောက်ရောက် အရေးယူရမှာ မဟုတ်ဘူးလား” ဟု ဒေသခံက ဆက်လက်ထောက်ပြသည်။

ယင်းသစ်ခိုးထုတ်မှု စစ်ဆေးသည့် ကိစ္စနှင့် ပတ်သက်၍ ပန်စလီ အထက်ရွာနှင့် အောက်ရွာမှ ရွာသား ၄ ဦးကိုလည်း မိုင်းတုံမြို့နယ် ထွေအုပ်ရုံးသို့ ခေါ်ယူစစ်ဆေးလျက်ရှိကြောင်း သိရသည်။

“သစ်ခိုးထုတ်နေတဲ့ ထွေအုပ်စာရေး ဟိန်းဇေယျာဦးနဲ့ သူရဲ့ ယောက္ခမ ဒေါ်အီကြည်တို့က ရွာသားတွေကို ခြိမ်းခြောက်တာတွေ ရှိတယ်။ ‘သူတို့ စကားကို နားမထောင်ရင်တော့ ထွက်ပြေးဖို့သာ ပြင်ထားတော့’ လို့ ရွာသားတွေကို မဲတင်းပြောထားတယ်လို့ သိရတယ်” ဟုလည်း ဒေသခံတစ်ဦးက ဆိုသည်။

မိုင်းတုံမြို့နယ်၊ လွယ်ခမ်းလုံကျေးရွာအုပ်စု စာရေး ဦးဟိန်းဇေယျာဦးသည် ရပ်ကွက်/ကျေးရွာ ထောက်ခံစာများ ပြုလုပ်ပေးရာတွင် ငွေကြေး ကျပ်သိန်းချီ၍ မတရားတောင်းခံခြင်း၊ သဘာဝပတ်ဝန်းကျင်မှ သစ်များကို တရားမဝင် ခိုးထုတ်နေခြင်းများနှင့် ဒေသခံ ရပ်ရွာလူထုအပေါ် လက်နက်နှင့် အာဏာအားကိုးဖြင့် ဖိနှိပ်ဆက်ဆံမှုများပြုလုပ်နေသဖြင့် ဒေသခံများက သက်ဆိုင်ရာ အထက်ဌာနအဆင့်ဆင့်သို့ မကျေမနပ် တိုင်တန်းထားကြခြင်းဖြစ်ကြောင်း စုံစမ်းသိရှိရသည်။

#MeKongNews
#မိုင်းတုံမြို့နယ်
#ရပ်ကျေးစာရေး
#သစ်ခိုးထုတ်
#ထွေအုပ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)