မဲခေါင်၊ ဇူလိုင် ၁၅
မြောက်ပိုင်းအဖွဲ့များကို တရုတ်ခေါ်တွေ့ပြီးနောက် ကိုးကန့်တပ်ဖွဲ့ – MNDAA က သိန္နီမြို့ကို စစ်ကောင်စီထံ ပြန်ပေးပြီး ဆုတ်ခွာမည်ဟု သတင်းထွက်ပေါ်နေကြောင်း သတင်းရင်းမြစ်များထံမှ သိရသည်။
မြောက်ပိုင်း လက်နက်ကိုင်တပ်ဖွဲ့များဖြင့် ဖွဲ့စည်းထားသည့် ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ -FPNCC အဖွဲ့ဝင်များကို တရုတ်က ခေါ်ယူဆွေ့ဆုံပြီးနောက် ယခုကဲ့သို့ သတင်းများ ထွက်ပေါ်လာနေခြင်း ဖြစ်သည်။
“ကိုးကန့်ကိုယ်တိုင်ကတော့ ပြန်ဆုတ်မယ်လို့ ထုတ်ပြောတာ မကြားသေးဘူး။ ဒါပေမယ့် သူနဲ့ထိစပ်တဲ့ အဖွဲ့တွေကနေ သိန္နီကနေ ကိုးကန့် ပြန်ဆုတ်မယ်လို့ သတင်းတွေ ထွက်နေတယ်။ တရုတ်နိုင်ငံ ကူမင်းမြို့မှာ မြောက်ပိုင်းအဖွဲ့တွေကို တရုတ်က ခေါ်တွေ့ပြီးတဲ့နောက် အခုလိုသတင်းထွက်တာဖြစ်ပါတယ်”ဟု FPNCC နှင့် နီးစပ်သည့် သတင်းရင်းမြစ်တစ်ဦးက ပြောသည်။
ပြီးခဲ့သည့် ဇူလိုင်လအစတွင် တရုတ်ကွန်မြစ်နစ်ပါတီ ၁၀၅ နှစ်ပြည့်သို့ AA မှ လွဲပြီး ကျန်သည့် FPNCC အဖွဲ့ဝင်များအားလုံးကို တရုတ်က ကူမင်းသို့ ခေါ်ယူတွေ့ဆုံခဲ့ပြီး အချို့အဖွဲ့များကို တဖွဲ့ချင်းစီ ပြောဆိုဆွေးနွေးခဲ့သည်ဟု သတင်းရင်းမြစ်များထံမှ သိရသည်။
ထိုတွေ့ဆုံမှုအတွင်း စစ်ကောင်စီ၏ ငြိမ်းချမ်းလုပ်ငန်းစဉ်ကိစ္စတွင် ပါဝင်ကြရန် တရုတ်က ပြောဆိုခဲ့သည်ဟုလည်း FPNCC နှင့် နီးစပ်သည့် သတင်းရင်းမြစ်ထံမှ သိရသည်။
ထိုသို့ တွေ့ဆုံပြီးနောက် ကိုးကန့်တပ်ဖွဲ့က သိန္နီမြို့ကို စစ်ကောင်စီထံ ပြန်အပ်မည်ဟု သတင်းထွက်ပေါ်နေခြင်း ဖြစ်ပြီး ကိုးကန့်တပ်ဖွဲ့ကမူ တစ်စုံတစ်ရာ တရားဝင်ပြောဆိုခြင်း မရှိသေးပေ။
ထို့ပြင် သိန္နမြို့ပေါ်တွင်လည်း ကိုးကန့်တပ်ဖွဲ့ အုပ်ချုပ်ရေး ပုံမှန်လည်ပတ်နေလျက်ရှိပြီး တပ်ဆုတ်မည့် အရိပ်အယောင် မတွေ့ရကြောင်း မြို့ခံတစ်ဦးက ပြောသည်။
“အခုထိတော့ ပုံမှန်လည်ပတ်နေတာပဲဗျ။ ပြီးခဲ့တဲ့ပတ်ကမှ အစည်းအဝေးခေါ်ပြီး ဒုတိယ ၆ လပတ်မှာ ဘာတွေ ဆက်လုပ်မယ်ဆိုတာကို ပြောသေးတယ်ဗျ”ဟု ၎င်းသတင်းရင်းမြစ်က ပြောသည်။
ယမန်နေ့ ဇူလိုင် ၁၄ ရက်တွင်မူ ကိုးကန့်တပ်ဖွဲ့နှင့် စစ်ကောင်စီက လားရှိုးတွင် တွေ့ဆုံကြပြီး စစ်သုံးပန့် ၄၀ ကျော်ကိုလည်း ကိုးကန့်တပ်ဖွဲ့က ထပ်မံလွတ်ပေးခဲ့သည်။
ကိုးကန့်တပ်ဖွဲ့သည် သိန္နီမြို့ကို ပြီးခဲ့သည့် ၁၀၂၇ စစ်ဆင်ရေးတွင် စစ်ကောင်စီထံမှ တိုက်ခိုက်သိမ်းပိုက်ခဲ့ခြင်း ဖြစ်သည်။
လက်ရှိတွင်လည်း သိန္နီမြို့နယ်အတွင်းတွင် တရုတ်လုပ်ငန်းရှင် အများအပြားကို ခေါ်သွင်းကာ စီမံကိန်းများ ဖော်ဆောင်လျက်ရှိသည်။
#MeKongNews
#မြောက်ပိုင်းအဖွဲ့များ
#တရုတ်
#သိန္နီမြို့
#ကိုးကန့်တပ်ဖွဲ့
#ဆုတ်ခွာမည်
