မဲခေါင်၊ ဇူလိုင် ၁
မတရားဖမ်းဆီးချုပ်နှောင်ခံထားရသည့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ကျန်းမာရေးအခြေအနေ အလွန်ကောင်းမွန်နေသည်ဟု မင်းအောင်လှိုင်အစိုးရ၏ ပြောရေးဆိုခွင့်ရှိသူ ဒေါ်ခိုင်ခိုင်စိုးက ပြောသည်။
ဒေါ်အောင်ဆန်းစုကြည်၏ ကျန်းမာရေးအခြေအနေကို သားဖြစ်သူ ကင်မ်အဲရစ်ကို အလွန်စိုးရိမ်ကြောင်း ပြောကြားပြီးနောက် မင်းအောင်လှိုင်၏ ပြောရေးဆိုခွင့်ရှိသူ က ယမန်နေ့ နေပြည်တော်၌ပြုလုပ်သည့် သတင်းစာရှင်းလင်းပွဲမှာ သတင်းထောက်၏ မေးမြန်းမှုကို ပြန်ပြောခဲ့ခြင်းဖြစ်သည်။
“ဒေါ်အောင်ဆန်းစုကြည်ကျန်းမာရေး အခြေအနေ အလွန်ကောင်းမွန်နေပါတယ်။ ဘာမှပြဿနာမရှိပါဘူး။ ဘာအခက်အခဲမှ မရှိပါဘူး။ အပြည့်အဝကို ကောင်းမွန်နေပါတယ်။ ဆေးစစ်မှုတွေကိုလည်း ပုံမှန်ပြုလုပ်ပေးနေပါတယ်” ဟု သူက ပြောသည်။ သို့သော် ဒေါ်အောင်ဆန်းစုကြည်ကို မည်သည့်နေရာ၌ မည်သို့ ထိန်းသိမ်းထားသည်ကိုမူ စစ်တပ်နည်းတူ ထည့်မပြောပါ။
အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်သည် နှလုံးရောဂါအပြင် အရိုးပွရောဂါနှင့် လူကြီးရောဂါများကို ဆိုးဆိုးရွားရွားခံစားနေရသည့် သတင်းများရရှိထားကြောင်း သာဖြစ်သူ ကင်မ်အဲရစ်က ဂျပန်သတင်းဌာန Kyodo News နှင့် အင်တာဗျူး၌ ပြောကြားထားသည်။
၂၀၂၆ ခုနှစ် လွတ်ငြိမ်းချမ်းသာခွင့် ပေးခဲ့တုန်းက ဒေါ်အောင်ဆန်းစုကြည်ကို ထောင်ဒဏ် ၁၇ နှစ်အထိ လျော့ပေါ့ပေးခဲ့ပြီး နေအိမ်အချယ်ချုပ်သို့ ပြောင်းရွှေ့ခဲ့သည်ဟု မင်းအောင်လှိုင်အစိုးရက ထုတ်ပြန်သော်လည်း မည်သည့်အထောက်အထားမျှ မရှိသေးကြောင်းလည်း ကင်မ်အဲရစ် က ဆိုသည်။
နေအိမ်အကျယ်ချုပ်သို့ ပြောင်းခြင်းသည် ဒေါ်အောင်ဆန်းစုကြည်၏ နေအိမ် တက္ကသိုလ်ရိပ်သာလမ်းသို့သာ ပြောင်းရွေ့ရမည်ဟု နိုင်ငံရေးသမားများက ဝေဖန်သည်။ ခြံအမှတ် (၅၄) တက္ကသိုလ်ရိပ်သာလမ်းသို့ ပြောင်းရွှေမပေးသည့်အပြင် အိမ်ရှေခြံ၌ ချိတ်ဆွဲထားသည့် ဖခင်ဗိုလ်ချုပ်အောင်ဆန်းဓာတ်ပုံကိုပင် စစ်အုပ်စုတို့က ဇွန် ၁၅ ရက်က ဖြုတ်ချခဲ့သည်။
ဒေါ်အောင်ဆန်းစုကြည်သည် ၂၀၂၁ ခုနှစ်၊ ဖေဖော်ဝါရီလ၊ စစ်တပ်အာဏာသိမ်းတုန်းက မတရားဖမ်းဆီးခံခဲ့ရပြီး ပုဒ်မမျိုးစုံတပ်ကာ ထောင်တွင်းအကျဥ်းချခဲ့သည်။ ဖမ်းဆီးအကျဥ်းချထားသူများကို ဒေါ်အောင်ဆန်းစုကြည်ကို ပြစ်ဒဏ်များကျခံပြီးနောင်မှသာ နိုင်ငံတကာကိုယ်စားလှယ်များနှင့် တွေ့ခွင့်ပေးမည်ဟုလည်း ယမန်နေ့က ပြုလုပ်သည့် နေပြည်တော်သတင်းစာရှင်းလင်းပွဲတွင် ဒေါ်ခိုင်ခိုင်စိုး က ပြောသည်။
လက်ရှိ မြန်မာနိုင်ငံ အထွေထွေအကျပ်အတည်းများအားလုံးသည် NLD နှင့် ဒေါ်အောင်ဆန်းစုကြည်တို့ ၂၀၂၀ ရွေးကောက်ပွဲမဲမသာမှုများကြောင့်ဟု စစ်ခေါင်းဆောင်မင်းအောင်လှိုင်က မကြာခဏ အပြစ်ပုံချလေ့ရှိသည်။
#MeKongNews
#ဒေါ်အောင်ဆန်းစုကြည်
#စစ်ကောင်စီ
#စစ်တပ်
#အကျဥ်းချ
