မဲခေါင်၊ ဇွန် ၂၀

ရှမ်းပြည်တောင်ပိုင်း၊ ရွာငံမြို့နယ်၊ လယ်ကိုင်းကျေးရွာအုပ်စု၊ တံတားဖြူကျေးရွာတွင် ဇွန် ၁၈ ရက်၊ နံနက်အစောပိုင်း ၂ နာရီဝန်းကျင်ခန့်က အသက် ၆၀ ကျော်အရွယ် အမျိုးသားတစ်ဦး နေအိမ်အတွင်း သတ်ဖြတ်ခံခဲ့ရသည်ဟု ဒေသတွင်း သတင်းရင်းမြစ်များက ပြောသည်။

သတင်းအရ သေနတ်ကိုင်ဆောင်ထားသည့် အမည်မသိ လက်နက်ကိုင်အဖွဲ့တစ်ဖွဲ့သည် နေအိမ်အတွင်း ဝင်ရောက်ကာ သေဆုံးသူဦးကျော်တင့်ကို လက်ပြန်ကြိုးတုတ်ပြီး ဓားဖြင့် ထိုးသတ်ခဲ့ကြောင်း သိရသည်။

“ဘယ်လိုရန်ငြိုးရှိလို့ ခုလိုသတ်ဖြတ်ခံရတာလဲတော့ မသိဘူး။ အသက်လည်းကြီးပြီးဆိုတော့ သတင်းကြားကြားချင်း စိတ်မကောင်းဖြစ်ရပါတယ် “ဟု ဒေသခံတစ်ဦးက မဲခေါင်သို့ ပြောသည်။

ဦးကျော်တင့် သတ်ဖြတ်ခံရချိန်တွင် ကျန်မိသားစုဝင်များကိုလည်း လက်ပြန်ကြိုးတုတ်ကာ မှောက်ခိုင်းထားခဲ့သည်ဟု ဒေသခံများက ပြောသည်။

အဆိုပါဖြစ်စဉ်နှင့် ပတ်သက်၍ ကျူးလွန်သူများမှာ မည်သည့်အဖွဲ့အစည်း ဖြစ်သည်ကို အတည်ပြုနိုင်ခြင်း မရှိသေးကြောင်း ဒေသခံ သတင်းရင်းမြစ်များက ပြောဆိုထားသည်။

ပြီးခဲ့သည့် မေလတစ်လအတွင်း ရွာငံမြို့နယ်တွင် ပျူစောထီးအဖွဲ့ဝင် အပါအဝင် ဒေသခံ ၈ ဦး အသတ်ခံခဲ့ရကြောင်း ဒေသခံများထံမှ သိရသည်။

ရွာငံမြို့နယ်အတွင်း စစ်ကောင်စီသတင်းပေးဟု ယူဆခံရသူများကို ရှင်းလင်းသည့် ဖြစ်စဉ်များ မကြာခဏ ဖြစ်ပွားနေပြီး နောက်ပိုင်းတွင် ပုဂ္ဂိုလ်ရေး မကျေနပ်မှုများနှင့် အငြိုးအတေးများကြောင့် အရပ်သားများကိုပါ ပစ်မှတ်ထား သတ်ဖြတ်မှုများ ရှိလာနေသဖြင့် ဒေသခံများက လုံခြုံရေးအတွက် စိုးရိမ်နေကြကြောင်း သိရသည်။

#MeKongNews
#ရွာငံ
#အမျိုးသားတစ်ဦး
#နေအိမ်အတွင်း
#သတ်ဖြတ်ခံရ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)