မဲခေါင်၊ ဇွန် ၁၇

ရှမ်းပြည်တောင်ပိုင်း၊ အောင်ပန်းမြို့၊ ညောင်ပင်ထောင်ရပ်ကွက်မှာ ယနေ့နံနက်ပိုင်းက လင်မယားချင်း ရန်ဖြစ်ရာက ခင်ပွန်းဖြစ်သူ ဓားဒဏ်ရာရပြီးသေဆုံးသွားကြောင်း ဒေသခံများထံမှ သိရသည်။

ယနေ့ ဇွန် ၁၇ ရက်၊ နံနက် ၁၀ နာရီဝန်းကျင်က အောင်ပန်းမြို့၊ ညောင်ပင်ထောင်ရပ်ကွက်၊ နယ်မြေ ၅ တွင် နေထိုင်သည့် အောင်ကိုထက်ဆိုသူတို့လင်မယားနှစ်ဦး စကားများရာမှ အောင်ကိုထက်မှာ ရင်ညွန့်တွင် ဓားဒဏ်ရာရပြီး သေဆုံးသွားခြင်းဖြစ်ကြောင်း ရပ်ကွက်နေသူတစ်ဦးက ပြောသည်။

“နှစ်ယောက်သား စကားများရင်း လက်ပါလာတော့ မိန်းမက မီးဖိုချောင်ထဲ လှီးချွတ်နေတဲ့ ဟင်းရွက်လှီးဓားနဲ့ ပြန်ပြီး တုံ့ပြန်တာမှာ ထိသွားတာလို့သိရတယ်။ ဆေးရုံပို့နေတုန်း ဆုံးတယ်ပြောတယ်”ဟု ၎င်းက ပြောသည်။

ဓားဖြင့်ထိုးသူ အောင်ကိုထက်၏ ဇနီး မရတနာမိုးကို ဖမ်းဆီးထားပြီး သေဆုံးသူ ၂၅ နှစ် အရွယ်အောင်ကိုထက်ကို ကလောဆေးရုံသို့ ပို့ဆောင်ထားကြောင်း သိရသည်။

#MeKongNews
#အောင်ပန်း
#လင်မယားချင်း
#ခင်ပွန်း
#ဓားဒဏ်ရာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)