မဲခေါင်၊ ဇွန် ၁၇
ရုရှားသမ္မတ ဗလာဒီမာပူတင်ကို ဝေဖန်လေ့ရှိသူ အသက် ၄၄ နှစ်အရွယ် ရုရှားအနုပညာရှင် ရောဘတ်ကူဇော့နော့ဗ်သည် ပိုလန်နိုင်ငံအရှေ့ပိုင်း ဘီယာလာပေါ့လက်စကာမြို့မှ ၎င်း၏ နေအိမ်အနီးတွင် အနီးကပ်ပစ်ခတ် သတ်ဖြတ်ခံခဲ့ရကြောင်း ပိုလန်အစိုးရရှေ့နေများက ပြောကြားကြသည်။
တနင်္လာနေ့က သတ်ဖြတ်မှု ဖြစ်ပွားပြီးနောက် အသက် ၃၇ နှင့် ၃၃ နှစ်အရွယ် ဘီလာရုစ်နိုင်ငံသား ၂ ဦးကို ဘီလာရုစ်ကောင်စစ်ဝန်ရုံးအနီးတွင် ဖမ်းဆီးခဲ့ကြောင်း ရှေ့နေများက ပြောကြားကြသည်။
ကလောင်နာမည် ဆမ်ယွန်စကရီပက်စကီး အသုံးပြုသော အနုပညာရှင်က ၎င်း၏ အနုပညာလက်ရာများမှတစ်ဆင့် ရုရှားအာဏာပိုင်များ၏ လက်ရှိမူဝါဒများကို ဝေဖန်လေ့ရှိသည်ဟု အစိုးရရှေ့နေများက ပြောကြားကြသည်။
၎င်းသည် ရုရှားသမ္မတ ပူတင်၊ ချေချင်းညာခေါင်းဆောင် ကာဒီရော့ဗ် နှင့် အခြားရုရှားအရာရှိကြီးများ၏ ပုံပျက်ပန်းပျက် ပုံများ ရေးဆွဲခဲ့ကာ ပုံတစ်ပုံတွင် ဆိုဗီယက်အာဏာရှင်ဟောင်း ဂျိုးဆက်ဖ်စတာလင်၏ လက်ထဲတွင် ပွေ့ချီခံထားရသည့်ကလေးငယ်အဖြစ် ပူတင်ကို ပုံဖော်ခဲ့သည်။
ရုရှားက လွတ်လပ်သော အချုပ်အခြာပိုင်ဆိုင်ကြောင်း ကြေညာခဲ့သည့် ဇွန် ၁၂ ရက် ရုရှားနိုင်ငံနေ့တွင်လည်း ၎င်းက ဘာလင်မြို့၌ ရှိနေစဉ် ရုရှားအလံကို အမှိုက်ပုံးတစ်ခုထဲသို့ ပစ်ထည့်နေသော ဗီဒီယိုကို ရောဘတ်ကူဇော့နော့ဗ်က တနင်္ဂနွေနေ့တွင် အွန်လိုင်းပေါ်တင်ခဲ့သည်။
၎င်း၏ နေအိမ်အနီးတွင် မည်သူမည်ဝါမှန်းမသိသူတစ်ဦးက ရုရှား အနုပညာရှင်နားကပ်ကာ သေနတ်ဖြင့် ၂ ချက်ဆင့်ပစ်ခတ်ခဲ့ပြီး ထို့နောက် ၃ ကြိမ်ထပ်မံပစ်ခတ်ကာ ထွက်ပြေးသွားခဲ့ကြောင်း နှင့် ၎င်းသည် ဦးခေါင်း၊ ရင်ဘတ်နှင့် နောက်ကျောတို့ကို ထိမှန်သော ဒဏ်ရာများကြောင့် ပွဲချင်းပြီး သေဆုံးခဲ့ကြောင်း ရှေ့နေများက ပြောကြားကြသည်။
ရုရှားအနုပညာရှင်သေဆုံးခြင်းမှာ မော်စကိုလက်ချက်ဖြစ်ကြောင်း ပိုလန် အစိုးရရှေ့နေများက ပြောကြားခြင်းမရှိခဲ့ဘဲ ပိုလန်ပြည်တွင်းလုံခြုံရေးဌာနကလည်း မှတ်ချက်ပေးရန် တောင်းဆိုမှုကို ချက်ချင်း မတုံ့ပြန်ခဲ့ကြောင်း အေပီသတင်းက ဖော်ပြသည်။
အေးကျော််
Ref:AP
#MeKongNews
#ပူတင်
#ရုရှားအနုပညာရှင်
#ပိုလန်
#ပစ်သတ်ခံရ
