မဲခေါင်၊ ဇွန် ၉
ရှမ်းပြည်တောင်ပိုင်းမှ တော်လှန်ရေးတပ်များဖြစ်သည့် PNLO၊ DPLA၊ KNDF နှင့် ရှမ်းတောင် PDF များမှ တပ်ဖွဲ့ဝင် စုစုပေါင်း ၄၀ ဦးလက်နက်ခဲယမ်းများနှင့်အတူ ဥပဒေဘောင်အတွင်းသို့ ထပ်မံဝင်ရောက်လာကြသည်ဟု စစ်ကောင်စီက သတင်းထုတ်ပြန်လာမှုအပေါ် သက်ဆိုင်ရာ တော်လှန်ရေးအဖွဲ့အစည်းများက သတင်းအတု၊ ဝါဒဖြန့်မှုသာဖြစ်ကြောင်း ပြန်လည်တုံ့ပြန်ပြောဆိုလိုက်ကြသည်။
စစ်ကောင်စီ၏ ထုတ်ပြန်ချက်တွင် ယမန်နေ့ ဇွန်လ ၈ ရက်က ပအိုဝ်းအမျိုးသားလွတ်မြောက်ရေးအဖွဲ့ချုပ် – PNLO အဖွဲ့ဝင် ၇ ဦး၊ ဖယ်ခုံ PDF ၇ ဦး၊ မိုးဗြဲ PDF ၂ ဦး၊ ဓနုပြည်သူ့လွတ်မြောက်ရေးတပ်တော် – DPLA ၁၂ ဦး၊ ကရင်နီအမျိုးသားများကာကွယ်ရေးတပ် – KNDF ၇ ဦး၊ ရှမ်းတောင် PDF ၁ ဦးနှင့် ကျောက်ဆည် PDF ၄ ဦး၊ စုစုပေါင်း ၄၀ ဦးတို့သည် M-16 ၄ လက်၊ M-22 ၁ လက်၊ လက်လုပ်စိန်ပြောင်း ၁ လက်အပါအဝင် သေနတ် ၅ လက်၊ ကျည်အိမ်နှင့် ကျည်မျိုးစုံ ၁၆၁ တောင့်တို့နှင့်အတူ အလင်းဝင်လာသဖြင့် စုစုပေါင်း ဆုကြေးငွေ ကျပ် ၃၃၅ သိန်း ချီးမြှင့်ခဲ့သည်ဟု ဖော်ပြထားသည်။
ယင်းဝါဒဖြန့်ထုတ်ပြန်ချက်နှင့် ပတ်သက်၍ အင်းလေးဒေသပြည်သူ့ကာကွယ်ရေးတပ်ဖွဲ့ (IPDF – အမှတ် ၁၀၀၉ တပ်ရင်း) မှ တပ်ရေး အင်းသွေးနီက လူထုကို လှည့်စားရန် လုပ်ဆောင်သည့် သတင်းအတုသာ ဖြစ်ကြောင်း ချေပပြောဆိုသည်။
“ထုံးစံအတိုင်း လူထုကို လှည့်စားဖို့၊ တော်လှန်ရေးတပ်တွေကြား သွေးထိုးဖို့လုပ်တဲ့ အတုတွေပါ။ သူတို့ ဒီလိုသတင်းထုတ်တိုင်း ကျနော်တို့ကတော့ လှောင်ရယ် ရယ်ကြတာပဲ။ စစ်ကောင်စီက ဆေးသမားတွေ၊ အရပ်သားပြည်သူတွေကို ထင်ရင်ထင်သလို လိုက်ဖမ်းနေတဲ့အချိန်မှာ ပျူစောထီးနဲ့ ဒလန်တွေက ပိုက်ဆံမက်လုံးကြောင့် အနံ့ခံနေကြတာ။ တော်လှန်ပြည်သူတွေအနေနဲ့ သတိနဲ့သတ္တိကို လက်ကိုင်ထားပြီး သူတို့ရဲ့ မတရားမှုတွေကို မှတ်တမ်းတင် သတင်းပေးပို့ကြဖို့နဲ့ ထိုက်တန်တဲ့ လက်တုံ့ပြန်မှုတွေ လုပ်ဆောင်ကြဖို့ လေးနက်စွာ ပြောချင်ပါတယ်” ဟု ဆိုသည်။
အလားတူ PNLO မှ ပြောရေးဆိုခွင့်ရှိသူ ခွန်ရိန်းယံကလည်း ၎င်းတို့တပ်ဖွဲ့ဝင်များ လက်နက်ချခြင်း လုံးဝမရှိကြောင်းနှင့် အရပ်သားများကို ဖမ်းဆီးကာ အတင်းအဓမ္မ ဝါဒဖြန့်နေခြင်းဖြစ်ကြောင်း မဲခေါင်သို့ ပြောကြားသည်။
“ဒီအခုတလော ဖြစ်စဉ်တွေမှာ ကျွန်တော်တို့ တပ်ဖွဲ့မှာ အဲလိုမျိုး လက်နက်သွားချတယ် ဘာညာဆိုတာတော့ မရှိပါဘူးဗျ။ ဒါကတော့ သူတို့က အချို့ပြည်သူတွေကို ကျွန်တော်တို့တပ်ဖွဲ့ဝင်လို့ စွပ်စွဲပြီးတော့ ဖမ်းဆီးပြီးတော့မှ လက်နက်ချတယ်ဆိုတဲ့ ဝါဒဖြန့်ချိမှုမျိုး လုပ်တာပါ။ ဒါက သူတို့ လုပ်နေကျ ပုံစံပါပဲ” ဟု ၎င်းက ဆိုသည်။
စစ်ကောင်စီ၏ ထုတ်ပြန်ချက်အရ ၎င်းတို့ထံ အလင်းဝင်သည်ဆိုသူများမှာ ပင်းတယ၊ ကလော၊ ရပ်စောက်၊ ဖယ်ခုံ၊ လွိုင်ကော်၊ မောက်မယ်၊ ဆီဆိုင်၊ ကျောက်ဆည်၊ ဒီးမော့ဆို မြို့နယ်များနှင့် ရန်ကုန်၊ မန္တလေးတိုင်းတို့မှ အမျိုးသား ၃၆ ဦးနှင့် အမျိုးသမီး ၄ ဦး၊ စုစုပေါင်း ၄၀ ဦး ဖြစ်ကြောင်း သိရသည်။
#MeKongNews
#စစ်ကောင်စီ
#ဝါဒဖြန့်
#အလင်းဝင်
#ခွန်ရိန်းယံ
#အင်းသွေးနီ
