မဲခေါင်၊ မေ ၁၈
တစ်နှစ်ကျော်ကာလအတွင်း ရုရှားမြို့တော် မော်စကိုအပေါ် အကြီးမားဆုံး ညပိုင်း ဒရုန်းတိုက်ခိုက်မှုကို ယူကရိန်းက လုပ်ဆောင်ခဲ့ပြီးနောက် မော်စကိုဒေသမှ ၃ ဦး အပါအဝင် လူ ၄ ဦး သေဆုံးခဲ့ကြောင်း ဒေသန္တရ အရာရှိများက ပြောကြားကြသည်။
ယူကရိန်း အရှေ့မြောက်ပိုင်းဒေသနှင့် ထိစပ်နေသော ရုရှား ဘယ်လ်ဂိုရော့ဒေသတွင် လူတစ်ဦး သေဆုံးသွားခဲ့သည်ဟု ဒေသအာဏာပိုင်များက ပြောကြားကြသည်။
ထိုအတောအတွင်းမှာပင် ပြီးခဲ့သည့် ၂၄ နာရီအတွင်း ယူကရိန်းဒရုန်း တစ်ထောင်ကျော်ကို ပစ်ချခဲ့သည်ဟု ရုရှားကာကွယ်ရေးဝန်ကြီးဌာနက ယမန်နေ့ နေ့လယ်ပိုင်းတွင် ပြောကြားသည်။
လွန်ခဲ့သော ၄ နှစ်ကျော်က စတင်ခဲ့သော စစ်ပွဲတွင် ယူကရိန်းမြို့တော် ကိဗ်အပေါ် အကြီးမားဆုံး ဒရုန်းနှင့် ဒုံးကျည်တိုက်ခိုက်မှုများကို ရုရှားက ၂ ရက်ဆက်တိုက် လုပ်ဆောင်ခဲ့ပြီးနောက် ထိုလုပ်ရပ်များကို လက်တုံ့ပြန်သွားမည်ဟု ယူကရိန်းသမ္မတ ဇီလန်စကီးက သောကြာနေ့တွင် ကြုံးဝါးခဲ့ပြီးနောက် မော်စကိုမြို့အပေါ် အကြီးမားဆုံး တိုက်ခိုက်မှု ဖြစ်ပေါ်လာခဲ့သည်။
ရုရှားက စစ်ပွဲကို ဆက်လက် သက်ဆိုးရှည်အောင် လုပ်ဆောင်ထားခြင်းနှင့် မိမိတို့ မြို့ကြီးများနှင့် ရပ်ရွာအသိုင်းအဝိုင်းများကို တိုက်ခိုက်ခဲ့ခြင်းအတွက် ယူကရိန်း၏ တုံ့ပြန်မှုမှာ တရားမျှတမှု ရှိသည်ဟု ဆိုနိုင်ကြောင်း ဇီလန်စကီးက ပြောကြားသည်။
မော်စကိုမြို့အနီးတွင် လေကြောင်းရန် ကာကွယ်ရေးစနစ်များ ထူထပ်စွာ ချထားသော်လည်း ကီလိုမီတာ ၅၀၀ ကျော် အကွာအဝေးမှ ပစ်မှတ်များကို ယူကရိန်းက တိုက်ခိုက်နိုင်သည်ဟုလည်း ဇီလန်စကီးက ဆက်ပြောသည်။
“သူတို့အစိုးရက စစ်ပွဲကို အဆုံးသတ်ရမယ်ဆိုတာကို ကျနော်တို့က ရုရှားနိုင်ငံသားတွေကို ရှင်းလင်းစွာ ပြောကြားနေပါတယ်” ဟု ဇီလန်စကီးက ပြောသည်။
ယူကရိန်းက အရပ်သားများကို ပစ်မှတ်ထား တိုက်ခိုက်နေသည်ဟု ရုရှားနိုင်ငံခြားရေးဝန်ကြီးဌာနက စွပ်စွဲပြောကြားသည်။
ဥရောပသမဂ္ဂ၏ ငွေကြေးထောက်ပံ့မှုများဖြင့် ကိဗ်အစိုးရက ယူရိုဗစ်ရှင်း(သီချင်းဆိုပြိုင်ပွဲ) သံစဉ်များဖြင့် ကြီးမားကျယ်ပြန့်သော အကြမ်းဖက် တိုက်ခိုက်မှုတစ်ခုကို ထပ်မံ ကျူးလွန်ခဲ့သည်ဟု ရုရှားကာကွယ်ရေးဝန်ကြီးဌာန ပြောရေးဆိုခွင့်ရှိသူ မစ္စက်မာရီယာဇာခါရိုဗာက ပြောကြောင်း ရုရှားအစိုးရ တာ့စ်သတင်းဌာနက ဖော်ပြသည်။
သို့ရာတွင် အရပ်သားများအား ပစ်မှတ်ထားသည်ဆိုခြင်းကို ၂ ဖက်စလုံးက ငြင်းဆိုကြသည်။
အေးကျော်
Ref:Reuters
#MeKongNews
#ယူကရိန်း
#ဒရုန်းတိုက်ခိုက်မှု
#ရုရှား
#မော်စကို
