မဲခေါင်၊ မေ ၃
လားရှိုးမြို့တွင် ဖေဖော်ဝါရီလ ၂၇ရက်က ဖြစ်ပွားသည့် ကုန်စုံဆိုင်ပိုင်ရှင် အမျိုးသမီး ပြန်ပေးဆွဲခံရသည့် အမှုတွင် ထိုစဉ် စခန်းမှူးအဖြစ် တာဝန်ထမ်းဆောင်ခဲ့သည့် ဒုရဲမှူးညိုဝင်းက ပြန်ပေးသမားများထံမှ ကျပ်ငွေ သိန်း ၁၀၀၀ ကို ပြန်လည်တောင်းယူပြီး ပိုင်ရှင်ထံ ပြန်မပေးဘဲ လာဘ်စားသွားကြောင်း ရဲတပ်ဖွဲ့နှင့် နီးစပ်သည့် သတင်းရင်းမြစ်များက ပြောသည်။
ပြန်ပေးသမား ၄ဦးမှာ ဖေဖော်ဝါရီ ၂၄ ရက် ညနေ ၄ နာရီခွဲတွင် လားရှိုးမြို့ ရပ်ကွက် (၅) ရှိ ‘တွမ်ဂျားကုန်စုံ ဆိုင်’မှ အသက် ၂၃ နှစ်အရွယ် မယဥ်ယဥ်ထွန်းကို ပြန်ပေးဆွဲသွားပြီး ကျပ်သိန်း ၁၀၀၀ တောင်းကာ ယင်းငွေကို တာချီလိတ်ရှိ ငွေလဲဆိုင်တစ်ခုသို့ လွှဲခိုင်းခဲ့ကြောင်း၊ ပြန်ပေးသမားများကို ဖေဖော်ဝါရီလ ၂၇ရက် နေ့လယ်ပိုင်းတွင် ဖမ်းမိပြီး ထိုစဉ်စခန်းမှူး ဒုရဲမှူး ညိုဝင်းက တာချီလိတ်ငွေလဲဆိုင်မှ ကျပ်သိန်း ၁၀၀၀ ကို အကောင်တစ်ခုထဲသို့ ပြန်လွှဲခိုင်းခဲ့ကြောင်း သတင်းရင်းမြစ်တစ်ဦးက ပြောသည်။
“အမှုပေါ်ပြီး ပြန်ပေးသမားတွေကိုမိတော့ အဲဒီသိန်းတစ်ထောင်က ပြန်ပေးသမားက တာချီလိတ်က ငွေလဲလုပ်တဲ့ ဆိုင်တစ်ခုကိုလွှဲပြီး ဘတ်နဲ့လဲထုတ်တာပေါ်လို့ အဲဒီငွေလဲဆိုင်ကို ညိုဝင်းက ဖုန်းဆက်ငွေညှစ်တယ်။ သိန်းတစ်ထောင်ကို ညိုဝင်းပြောတဲ့ အကောင့်တစ်ခုထဲ လွှဲပေးရတယ်။ ညိုဝင်းဆီ သိန်းတစ်ထောင် မပို့ရင် အဲဒီငွေလဲဆိုင်ပိုင်ရှင်ကို ဖမ်းမယ်တဲ့။ ငွေလဲဆိုင်ပိုင်ရှင်ရဲ့ ငွေလွှဲလုပ်တဲ့အကောင့်ကိုလည်း ပိတ်ထားတာ အခုထိမဖွင့်ပေးသေးဘူးတဲ့။ အခု ညိုဝင်းကို ငွေလဲဆိုင်ပိုင်ရှင်က သိန်းတစ်ထောင် လွှဲပြီးပြီ။ သူက ထပ်အဖမ်းခံရမှာ ကြောက်လို့ လွှဲပေးလိုက်တာ။ ဒါပေမဲ့ ငွေလဲဆိုင်ပိုင်ရှင်ရဲ့ လုပ်ငန်းလုပ်နေတဲ့အကောင့်ကို အခုထိ ဖွင့်မပေးဘူး။ သိန်းတစ်ထောင်ကို ပြန်ပေးဆွဲခံရတဲ့ ကောင်မလေးကိုလည်း ပြန်မပေးဘူး” ဟု ၎င်းက ပြောသည်။
ယင်းဖြစ်စဉ် ဖြစ်ပွားပြီးနောက် ဒုရဲမှူးညိုဝင်းမှာ လားရှိုးမြို့မ ရဲစခန်းမှူး နေရာမှ လားရှိုးခရိုင်ရဲရုံး မှုခင်းမှတ်တမ်း – CRO အဖြစ် ပြောင်းရွှေ့သွားကြောင်း ရဲတပ်ဖွဲ့နှင့်နီးစပ်သူများထံမှ သိရသည်။
ပြန်ပေးဆွဲမှုမှာ ဖေဖော်ဝါရီ ၂၄ ရက် ညနေ ၄ နာရီခွဲတွင် လားရှိုးမြို့၊ ရပ်ကွက် (၅) ရှိ ‘တွမ်ဂျားကုန်စုံ ဆိုင်’မှ အသက် ၂၃ နှစ်အရွယ် မယဥ်ယဥ်ထွန်းကို Crown အဖြူရောင်ဖြင့် လာသည့် အမျိုးသား ၃ ဦး ဆိုင်ထဲဝင်လာပြီး သေနတ်ထောက်ကာ ဖမ်းဆီးခေါ်ဆောင်သွားခဲ့ခြင်းဖြစ်ပြီး မယဥ်ယဥ်ထွန်းမှာ ဖေဖော်ဝါရီ ၂၇ ရက်တွင် ပြန်လည် လွတ်မြောက်လာခဲ့ခြင်း ဖြစ်သည်။
#MeKongNews
#လားရှိုး
#ပြန်ပေးဆွဲမှု
#ဒုရဲမှူးညိုဝင်း
#စခန်းမှူး
