မဲခေါင်၊ ဧပြီ ၂၉
စစ်ကောင်စီလက်အောက်ခံ PNO ပြည်သူ့စစ် မြင့်မိုရ်တိုင်း တိုင်းမှူး ဖြားခေါင်းအတွက် ပအိုဝ်းပြည်သူများက ဆက်ကြေးအပြင် လုံခြုံရေးအတွက်ဟုဆိုကာ နေ့စဉ်အလှည့်ကျ ကင်းစောင့်ပေးနေရသည်ဟု ဒေသခံများကပြောသည်။
PNO ပြည်သူ့စစ်၏ မြင့်မိုရ်တိုင်း တိုင်းမှူး ဖြားခေါင်းအတွက်ဟုဆိုကာ တောင်ကြီးမြို့နယ် မြောက်ဘက်ခြမ်းရှိ ပအိုဝ်းကျေးရွာမှ ပြည်သူများသည် စစ်အာဏာသိမ်းပြီးချိန်မှ လက်ရှိအချိန်ထိ ဆက်ကြေးအပြင် လုံခြံရေးကိစ္စကိုပါ အလှည့်ကျသွားနေရခြင်းဖြစ်သည်။
တောင်ကြီးမြိုနယ် ဇလဲကျေးရွာအုပ်စု၊ နားဟိတ်၊ ကောင်ပြိုင် စသည့် ကျေးရွာမှ ပြည်သူများသည် စစ်အသုံးစရိတ်နှင့်တိုင်းမှူးအဖွဲ့တွက်ဟုဆိုကာ တစ်အိမ် ၅ သောင်း၊ ထွန်စက်တစ်စီး ၂ သိန်း၊ ထော်လာဂျီတစ်စီး ၅ သောင်း၊ ရိုးရိုးထွန်စက်ငယ်တစ်စီး ၅ သောင်း၊ အိမ်စီးကားတစီး ၁ သိန်း ပေးဆောင်ရသည့်အပြင် စစ်ဝတ်စုံဝတ်ကာ တိုင်းမှူးဖြားခေါင်းနေအိမ်ကိုလည်း အလှည့်ကျ ကင်းစောင့်ပေးရသည်ဟု ဒေသခံများထံမှ သိရသည်။
“တိုင်းမှူးဆိုတဲ့အတိုင်းပဲ နေတာ ထိုင်တာက လူထုကို ကျွန်လို သဘောထားနေတာလားပဲ။ ပိုက်ဆံလိုတိုင်း အကြောင်းအမျိုးမျိုးပြပြီး ပအိုဝ်းရွာတွေကို ငွေကောက်တယ်၊ ဘုရားတည်တာကို အကြောင်းပြပြီးလည်း ကောက်တယ်။ သူ့လုံခြုံရေးလည်း အလှည့်ကျ သွားပေးရတယ်။ အသက်ကကြီးနေပြီ ဘုရား တရားနဲ့ နေရမယ့်အရွယ်ကို ငွေကောက်စားနေတုန်းပဲ” ဟု ဒေသခံတဦးက ပြောသည်။
စစ်ကောင်စီလက်အောက်ခံ PNO ပြည်သူ့စစ်သည် ပအိုဝ်းဒေသကို တိုင်း ၄ တိုင်းဖြင့် ဖွဲ့စည်းကာ အုပ်ချုပ်နေခြင်းဖြစ်ပြီး ကလော-တောင်ကြီး-ဟိုပုံး-လွိုင်လင်-နမ့်စန်ကားလမ်းမကြီး မြောက်ဘက်ခြမ်းကို မြင့်မိုရ်တိုင်းအဖြစ် ဖွဲ့စည်းကာ ဖြားခေါင်းသည် ဗိုလ်မှူးကြီးရာထူးဖြင့် တိုင်းမှူးတာဝန် ယူထားသူ ဖြစ်သည်။
၎င်းတိုင်းမှူးများ၏ လက်အောက်တွင် အစိုးရနှင့်အပြိုင် မြို့နယ်မှူး ကျေးရွာအုပ်စုမှူးများ ထားရှိကာ အုပ်ချုပ်နေခြင်း ဖြစ်သည်။
ယင်း PNO ပြည်သူ့စစ်၏ မြို့နယ်မှူး ကျေးရွာအုပ်စုမှူးများသည် PNO တပ်ဖွဲ့ဝင်များသာဖြစ်ပြီး စစ်ယူနီဖောင်းများ နောက်လိုက်နောက်ပါများဖြင့် လက်နက်ကိုင်ဆောင်ထားကြသဖြင့် အစိုးရ အုပ်ချုပ်ရေးမှူးများထက်ပင် အာဏာပိုရှိပြီး ကျေးရွာများတွင် တရားစီရင်ရေး ကိစ္စများကိုပါ စိတ်ကြိုက် လုပ်ဆောင်ကြသူများဖြစ်ကြောင်း ဒေသခံများက ပြောသည်။
ထို့ကြောင့် ပအိုဝ်းပြည်သူများသည် စစ်ကောင်စီကို အခွန်ဆောင်ရသည့်အပြင် PNO ပြည်သူ့စစ်က ကောက်ခံသည့် စစ်မှုထမ်းကြေး၊ စစ်အသုံးစရိတ်၊ အိမ်ခွန်၊ ထွန်စက်ခွန်၊ ကားခွန် စသည့် ဆက်ကြေးအမျိုးမျိုးကိုလည်း ပေးဆောင်ရသည်။
PNO ၏ မြင့်မိုရန်တိုင်းမှူး ဖြားခေါင်းသည် ဘုရားစေတီတည်ရန်အတွက်ဟုဆိုကာ နှစ် ၂၀ ကျော် နှစ်စဉ်ငွေကောက်သဖြင့် ၎င်းတည်သည့် စေတီကို ဒေသခံများက လူထုမွဲစေတီဟု နာမည်ပြောင်ခေါ်ဝေါ်ခံရသည့်သူလည်း ဖြစ်သည်။
“သူကျောက်တန်းမှာ တည်တဲ့ဘုရားက ငွေနှစ်စဉ် နှစ်တိုင်းကောက်ပြီး တည်တာ၊ ကျွန်တော်တို့ ကလေးဘဝကနေ မိန်းမရပြီး ကလေးရတဲ့အထိ မပြီးနိုင်ပဲ ငွေပဲကောက်နေလို့ လူထုက နာမည်ပြောင်ပြောကြတာပါ” ဟု ကျောက်တန်းဒေသခံတဦးက ပြောသည်။
PNO ပြည်သူ့စစ်တိုင်းမှူး ဖြားခေါင်း သည် ဇလဲကျေးရွာဇာတိဖြစ်ပြီး လက်ရှိတွင် ဇလဲကျေးရွာအုပ်စု ကုန်းသာကျေးရွာ၌ ဒုတိယ ဇနီးနှင့်အတူ နေထိုင်လျက်ရှိသည်။
#MeKongNews
#ပြည်သူ့စစ်
#PNO
#ပအိုဝ်းဒေသ
#ဇလဲကျေးရွာ
