မဲခေါင်၊ ဧပြီ ၁၁
ကျပ်သိန်းပေါင်း တစ်သောင်းခွဲကျော် အသုံးပြုပြီး ရှမ်းပြည်မြောက်ပိုင်း၊ နမ့်ခမ်းမြို့တွင်းရှိ လမ်းတံတားခင်းခြင်းများကို ဆောင်ရွက်ခဲ့သည်ဟု တအာင်းတပ်ဖွဲ့ – TNLA က သတင်းထုတ်ပြန်သည်။
၂၀၂၅ ခုနှစ် ဇန်နဝါရီ ၁၇ ရက်မှ ယခုနှစ် မတ်လအထိ မြို့တွင်းရှိ ရပ်ကွက်အသီးသီးတွင် ပျက်စီးယိုယွင်းနေသော လမ်းများကို ကွန်ကရစ်လမ်း ၁၅ ခု ခင်းခြင်း ၊ တံတား ၂ စင်းနှင့် မြေသားရေမြောင်း ၃ ခုဖောက်လုပ် ပြုပြင်ခြင်းတို့ကို PSLF/TNLA မြို့နယ်စည်ပင်သာယာရေးအဖွဲ့က ဆောင်ရွက်ခဲ့ခြင်း ဖြစ်ကြောင်း သိရသည်။
“အဆိုပါ လမ်းနှင့် တံတား ပြုပြင်ရေးလုပ်ငန်းများအတွက် စုစုပေါင်း ကုန်ကျငွေ သိန်းတစ်သောင်းငါးထောင်ကျော် အသုံးပြုခဲ့ပြီးဖြစ်သည်။ မြို့နယ်စည်ပင်သာယာရေးအဖွဲ့အနေဖြင့် လက်ရှိတွင် ပြုပြင်ရန် ကျန်ရှိနေသော လမ်းများ၊ တံတားများ၊ ရေမြောင်းတူးဖော်ရေး လုပ်ငန်းများနှင့် လမ်းတိုးချဲ့ရေး လုပ်ငန်းများကို ဆက်လက် ဆောင်ရွက်လျက်ရှိပါသည်” ဟု TNLA က ထုတ်ပြန်ချက်တွင် ပြောသည်။
မြန်မာ – တရုတ် နယ်စပ်ပေါ်တွင် တည်ရှိသည့် နမ့်ခမ်းမြို့ကို ၁၀၂၇ စစ်ဆင်ရေးအတွင်း တအာင်းတပ်ဖွဲ့ – TNLA က စစ်ကောင်စီထံမှ တိုက်ခိုက် သိမ်းပိုက်နိုင်ခဲ့ခြင်း ဖြစ်သည်။
#MeKongNews
#နမ့်ခမ်း
#လမ်းတံတား
#တည်ဆောက်
#TNLA
