မဲခေါင်၊ ဇန်နဝါရီ ၂၈
ပအိုးဝ်ဒေသတွင် ရှေ့တန်း ၂၂ ရက်သွားရမည်ဟု စစ်ကောင်စီ လက်အောက်ခံ PNO ပြည်သူ့စစ်က ခေါ်သွားသည့် ရွာသားတစ်ဦး ၂ နှစ်ကျော်ကြာသည်အထိ ကျေးရွာသို့ ပြန်မရောက်လာဘဲ ပျောက်ဆုံးနေကြောင်း ဒေသခံ သတင်းရင်းမြစ်များထံမှ သိရသည်။
ရှမ်းပြည်တောင်ပိုင်း၊ ဆီဆိုင်မြို့နယ်၊ တောရရွာမှ ခွန်ထွက်လေး ဆိုသူသည် ပြီးခဲ့သည့် ၂၀၂၃ ခုနှစ်တွင် PNO က မသွားမနေရ ခေါ်သဖြင့် ရှေ့တန်းသို့ အလှည့်ကျသွားခဲ့ရရာ အတူသွားသည့်တစ်ဦးက တစ်လကျော်အကြာတွင် ကျေးရွာသို့ ပြန်လည် ရောက်ရှိသော်လည်းမှာ ၎င်းမှာ ယနေ့အချိန်ထိ မည်သည့်သတင်းမှ မရဘဲ ပျောက်ဆုံးနေခြင်းဖြစ်သည်ဟု သတင်းရင်းမြစ်တစ်ဦးက ပြောသည်။
“PNO က မဖြစ်မနေ သွားရမယ်ဆိုပြီး ခေါ်လို့ သူတို့က ဘာစစ်သင်တန်းမှ မတက်ရပဲနဲ့ အလှည့်ကျ သွားရတာ။ PNO တွေပြောတုန်းက ၂၂ ရက်လို့ ပြောတာ ကျန်တဲ့သူတွေ ပြန်ရောက်ပေမယ့် သူက ခုထိပျောက်သွားတယ်။ သေလား ရှင်လားလည်းမသိရဘူး၊ သူ့မိသားစုက PNO လူကြီးဆီ သွားမေးလည်း အတွေ့မခံဘူး။ သူတို့ပဲ ပြန်သတ်လိုက်တာလား၊ ရှေ့တန်းမှာ သေသွားတာလား တိကျတဲ့အဖြေမသိရဘူး”ဟု ခွန်ထွက်လေးနှင့် နီးစပ်သူတစ်ဦးက ပြောသည်။
ထိုသို့ ၂နှစ်ကျော်ကြာသည့်အထိ ခွန်ထွက်လေး ပျောက်ဆုံးနေသဖြင့် သေဆုံးသွားပြီဟု ယူဆကာ မိသားစုဝင်များနှင့် ဒေသခံများက သက်ပျောက်ဆွမ်းကပ်ကာ ကုသိုလ်ကောင်းမှု ပြုလုပ်ပေးလိုက်ပြီ ဖြစ်ကြောင်းလည်း သတင်းရင်းမြစ်က ပြောသည်။
“သူ့မိန်းမနဲ့ ကလေး ၂ ယောက်ကျန်ခဲ့တယ်။ ၂ နှစ်ကျော်ကြာပြီ အစအနမရတော့ သေပြီလို့ သတ်မှတ်ပြီး ပွဲလုပ်ပေးလိုက်ပြီ။ အခုဆို သူ့မိန်းမလည်း တယောက်တည်း ရုန်းကန်ရတာ ခက်ခဲတော့ နောက်အိမ်ထောင် ပြုလိုက်ပြီ”ဟု ၎င်းက ဆိုသည်။
စစ်ကောင်စီလက်အောက်ခံ PNO ပြည်သူ့စစ်သည် ပအိုဝ်းဒေသတွင် အသက် ၄၅ နှစ်အောက် အမျိုးသားမှန်သမျှကို အလှည့်ကျ ရှေ့တန်းပို့သည့် စနစ်ဖြင့် စစ်တိုက်နေသဖြင့် ကျေးရွာများတွင် သေဆုံး၊ ပျောက်ဆုံးသူ များပြားလာနေသည်။
ထို့သို့ ဒေသခံများအား လူသားဒိုင်းအဖြစ် အသုံးပြုကာ စစ်တိုက်ရာတွင် တိုက်ပွဲအတွင်း ကျဆုံးသူများကို PNO က မိသားစုဝင်များအား အကြောင်းကြားခြင်း၊ နာရေးပြုလုပ်ပေးခြင်း မရှိဘဲ ဗိုလ်ကြီးအထက် အဆင့်မှသာ နာရေးပွဲ လုပ်ခွင့်ပေးသဖြင့် သတင်းအစအနမရပဲ သေဆုံးခဲ့ရသူလည်း အများအပြားရှိနေသည်။
#MeKongNews
#ရှေ့တန်း
#PNO
#ရွာသား
#ပြန်မရောက်
