မဲခေါင်၊ ဇန်နဝါရီ ၁၀
ရှမ်းပြည်မြောက်ပိုင်း ၊စစ်ကောင်စီ ထိန်းချုပ် လားရှိုးမြို့တွင်၊ နေအိမ်အတွင်း သိုလှောင် သိမ်းဆည်း ထားသည့် ပစ္စည်းများကိုပါ ဝင်ရောက် ဖမ်းဆီးနေပြီး သွင်းကုန်နှင့် ငွေကြေးခဝါချမှု ဥပဒေဖြင့်ပါ အရေးယူရန် လုပ်ဆောင်နေကြောင်း ဒေသခံများထံမှ သိရသည်။
ပြီးခဲ့သည့် ရက်ပိုင်းတွင် လုပ်ငန်းရှင်တစ်ဦး နေအိမ်တွင် သိုလှောင်ထားသော တရုတ်ထုတ် ဗကပ လည် တို ဖိနပ်များနှင့် မိုးကာများကို စစ်ကောင်စီ အာဏာပိုင်အဖွဲ့က ဝင်ရောက် ဖမ်းဆီးခဲ့ကြောင်း သတင်း ရင်း မြစ်များထံမှ သိရသည်။
ယင်းအမှုကို ပို့ကုန် သွင်းကုန် ဥပဒေပုဒ်မ – ၈ အပြင် ငွေကြေး ခဝါချမှုဖြင့်ပါ အရေးယူရန် ဇန်နဝါရီ ၆ ရက်တွင် စတင် စိစစ်နေကြောင်း သိရသည်။
ယင်းမှာ ပြီးခဲ့သည့် နှစ်ကုန်ပိုင်းက လားရှိုးမြို့၊ ရပ်ကွက် – ၅ နေ လုပ်ငန်းရှင် အမျိုးသမီးတစ်ဦး အိမ်အတွင်း သိုလှောင်ထားသည့် စုစုပေါင်းတန်ဖိုး ကျပ်သိန်း ၆၃၀ တန်ကြေးရှိ ကုန်ပစ္စည်းများအား နေအိမ်ထဲအထိ ဝင်ရောက် ရှာဖွေ ဖမ်းဆီးခဲ့သည့်အမှု ဖြစ်သည်။
“အောက်ဘက်လည်း သယ်လို့မရတော့ ဒီမှာပဲ သိုလှောင် ရောင်းကြတာပေါ့၊ အခုက အိမ်တွေထဲ အထိ ဝင်ဖမ်းနေတာ ဖြစ်လို့ ကုန်သည်တွေလည်း မထားရဲကြဘူး ဖြစ်နေကြတယ်။ အခုက ပို့သွင်းပုဒ်မအပြင် ငွေခဝါချမှုပါ အမှုကြီးလာပြီ၊ လားရှိုး ကျော်သွားမှ ဖမ်းတာ မဟုတ်တော့ဘူး။ အိမ်ထဲအထိ ဝင်ဖမ်းလာပြီ”ဟု ရပ်ကွက် – ၅ ဒေသခံတစ်ဦးက မဲခေါင်သို့ ပြောသည်။
အကယ်၍ ငွေကြေးခဝါချမှု တိုက်ဖျက်ရေး ဥပဒေအရ စွဲချက်တင်ခဲ့ရပါက ပိုင်ဆိုင်မှုများကိုပါ သိမ်းဆည်းခံရမည့် အရေးနှင့် လုပ်ငန်းရှင်များ ရင်ဆိုင်နေကြရသည်။
လက်ရှိတွင် စစ်ကောင်စီက တရုတ်ဘက်မှ အကောက်ခွန်မဲ့ တရားမဝင် ကုန်ပစ္စည်းများ သယ်ဆောင်သည့် ကားများကို နမ့်လန်နှင့် သီပေါ၊ ကျင်သီတံတား၌ ဖမ်းဆီးထားရာ ယာဥ်ငယ်များ အပါအဝင် စီးရေ ၁၀၀ ခန့် ရှိနေကြောင်း သီပေါ ဒေသခံတစ်ဦးက မဲခေါင်သို့ ပြောသည်။
#MeKongNews
#လားရှိုး
#သိုလှောင်ကုန်
#စစ်ကောင်စီ
#ဝင်ဖမ်း
