မဲခေါင်၊ နိုဝင်ဘာ ၆
စစ်မြေပြင်တွင် အသေခံတပ်သား လူသားဒိုင်းအဖြစ် အဓမ္မစုစည်းကာ အသုံးချနေသည့် စစ်မှုထမ်းလူသစ်(ပစ)များကို ဒုတပ်ကြပ်အဆင့်မှ တပ်ကြပ်၊ တပ်ကြပ်ကြီးအဆင့်အထိ ရာထူးပေးနေပြီး အမြဲတမ်းတပ်ဖွဲ့ဝင်အဖြစ် စစ်ကောင်စီက သွေးဆောင်စည်းရုံးလျက်ရှိကြောင်း လူသစ်မိသားစုဝင်များနှင့် စစ်တပ်သတင်းအရင်းအမြစ်များထံမှ သိရသည်။
စစ်ကောင်စီမှ ထုတ်ပြန်သည့် အောက်တိုဘာ၂၂ရက် စာရင်းတစ်ခုတွင် ရာထူးအဆင့်တိုးပေးမှုသာမက စွမ်းဆောင်ရည် ဆုလက်မှတ်များကိုပါ ပေးခြင်းဖြင့် စည်းရုံးနေကြောင်း တွေ့ရပြီး ယင်းစာရင်းတွင် ဆုတံဆိပ်များအပြင် ရာထူးတိုးသူ ၁၈၂၁ ဦးအထိ ဖော်ပြထားသည်ကို တွေ့ရသည်။
ယင်းသို့ ရာထူးတိုးပေးသော်လည်း ၂နှစ်ပြည့်သည်နှင့် ထွက်ခိုင်းမည်ဖြစ်ကြောင်း တောင်ကြီးမြို့နယ်၊ အေးသာယာမှ စစ်မှုထမ်းအပတ်စဉ် (၁) တွင်ပါသွားသူတစ်ဦး၏ မိသားစုဝင်က ပြောသည်။
“စစ်ဗိုလ်ပေးလည်းမိသားစုကလက်မခံဘူး၊ သေရွာသွားနေရတာကို အိမ်မှာနေ့တိုင်းဆုတောင်းနေရတာ။ မသေလို့ သေတွင်းကထွက်လာမှာကိုစောင့်နေတာ၊ ကလေးတွေဆိုအဖေပဲမေးနေကြတာ။” ဟုအေးသာယာ ၆ ရပ်ကွက်မှ အပတ်စဥ်(၁) စစ်မှုထမ်းတစ်ဦး၏ဇနီးကပြောသည်။
စစ်ကောင်စီသည် ပြည်သူ့စစ်မှုထမ်းဥပဒေကို ကြေညာပြီးနောက် ပြည်သူ့စစ်မှုထမ်း သင်တန်းအပတ်စဉ်(၁)ကို ၂၀၂၄ ခုနှစ်၊ ဧပြီ ၈ ရက်မှ စတင်၍ ဖွင့်လှစ်ခဲ့ပြီး ယခအခါ အပတ်စဥ် (၁၉)အထိ ဖွင့်လှစ်ခဲ့ပြီးဖြစ်ရာ အပတ်စဥ်(၁)ဆင်း စစ်မှုထမ်းများသည် လာမည့် ၂၀၂၆ခုနှစ်၊ ဧပြီလ၌ ၂နှစ်ပြည့်မည်ဖြစ်သည်။
“ကိုယ်ပိုင်အမှတ်ကိုတော့ မပြောင်းပေးဘူး။ ရာထူးနဲ့ ဆုလက်မှတ်တွေနဲ့ ဆွဲဆောင်နေတာပေါ့လေ။ သူတို့အင်အားက ဒီလူသစ်တွေအပေါ် အဓိကမှီခိုနေရတာကိုး။ ဒါပေမယ့် သတ်မှတ်ထားတဲ့ ၂နှစ်သက်တမ်းပြည့်လို့ ထွက်ခွင့်မရကြရင်တော့ သေနတ်ပြောင်းတွေက အထက်အရာရှိတွေဆီ ပြန်လှည့်ကုန်ကြမှာပဲ” ဟုCDM စစ်တပ်အရာရှိတစ်ဦးက သုံးသပ်ပြောဆိုသည်။
စစ်ကောင်စီက လူသစ်ထပ်စုနေသော်လည်း လူသစ်များသာ ထပ်တိုးလာပြီး လူဟောင်းများ ယုတ်လျော့လာမည်ဖြစ်ရာ စစ်တပ်၏ တိုက်စွမ်းရည် ကျဆင်းလာမည်ဖြစ်ကြောင်း စစ်ရေးအကဲခတ်တစ်ဦးက သုံးသပ်သည်။
“သူတို့အပတ်စဥ်(၂၀)အထိဆို လူသစ်တစ်သိန်းရှိလာပေမယ့် လူဟောင်းတွေကထွက်၊ လူသစ်တွေကဝင်နဲ့ အဲဒါထက် မတိုးနိုင်တော့ဘူး။ လူသစ်တွေက စကတည်းက စစ်ထဲဝင်ချင်တာ မဟုတ်တာ၊ စစ်မြေပြင်ရဲ့ နဖူးတွေ့ဒူးတွေ့ သေမင်းနဲ့ရင်ဆိုင်ရတာနဲ့ တပ်တွင်းအကြမ်းဖက်အနိုင်ကျင့်မှုတွေက တပ်ထဲဆက်နေမယ့်သူ မရှိသလောက်ဖြစ်မှာပဲ”ဟု ၎င်းကပြောသည်။
စစ်ကောင်စီသည် တစ်ပတ်လျင် လူသစ်၅၀၀၀ဝန်းကျင်ဖြင့် အခြေခံ ၃လ သင်တန်းဆင်းလျင် တိုက်ခိုက်ရေးတပ်ရင်းများသို့ တိုက်ရိုက်ပို့နေသဖြင့် သင်တန်းဆင်းလူသစ်များ အတုန်းအရုန်း သေဆုံးကြခြင်း၊ အစုအပြုံလိုက် လက်နက်ချကြခြင်းများ နေ့စဥ်လို ဖြစ်ပေါ်လျက်ရှိကြောင်း စစ်ရေးသတင်းများအရ သိရသည်။
#MeKongNews
#စစ်မှုထမ်း
#စစ်ကောင်စီ
#ရာထူးတိုး
#သွေးဆောင်
