နိုင်ငံပိုင် အစုရှယ်ရာတွေ ပါဝင်တဲ့ ဖက်စပ် ဆက်သွယ်ရေး ကုမ္ပဏီ MPT ရဲ့ မိုဘိုင်းဖုန်း ဆင်းကတ် အသုံးပြုသူတွေ အနေနဲ့ ဖုန်းအသုံးပြုတဲ့ ပမာဏထက် ငွေပိုမို ဖြတ်တောက်ခံနေရတယ်လို့ ဝန်ဆောင်မှု ရယူနေတဲ့ ပြည်သူတွေက ဝေဖန်နေပါတယ်။
မကြာသေးခင်က နိုင်ငံခြားသား တစ်ဦး အသုံးပြုနေတဲ့ MPT ဆင်းကဒ်ဟာ အသုံးပြုတာထက် ပိုမိုတဲ့ ဖုန်းဘေလ်တွေ ဖြတ်တောက်နေတာ တွေ့ရှိလို့ Call Center ကို ဆက်သွယ် မေးမြန်းပေမယ့်လည်း မချေမငံ့ ပြောဆိုခံခဲ့ရတယ်လို့ သူ့ရဲ့ မြန်မာနိုင်ငံသား မိတ်ဆွေက ဆိုပါတယ်။
“မြန်မာပြည်ကို ရောက်နေတဲ့ စင်္ကာပူနိုင်ငံသား တစ်ဦး ကိုင်ဆောင်တဲ့ MPT ဆင်းကဒ်ကနေ ဖုန်းဘေလ်တွေ ခိုးဖြတ်နေလို့ ကွန်ပလိန်းတက်ဖို့ ပြောလာတော့ ဘာမှ သွားပြောမနေနဲ့၊ ဘာမှ လုပ်ပေးမှာ မဟုတ်ဘူးလို့ ပြောလိုက်တယ်။ စင်္ကာပူ နိုင်ငံသားကလည်း ဖုန်းဘေလ်က တစ်မိနစ်ကို ဘယ်လောက်ကျလဲ သူသိတယ်။ သူ့အလုပ်ကိုက စာရင်းစစ် ဖြစ်နေတော့ လက်ကျန်ငွေပြတဲ့ နံပါတ်တွေကို သတိထားမိတာလို့ ပြောတယ်။ သေချာအောင်စစ်ဖို့ အခြားဖုန်းတွေကို စမ်းခေါ်လိုက်တဲ့ အခါမှာ ခိုးဖြတ်နေတာကို တန်းမိတာပဲ” လို့ စင်္ကာပူ နိုင်ငံသားရဲ့ မြန်မာ မိတ်ဆွေက သူရဲ့ လှုမှုကွန်ရက် စာမျက်နှာမှာ ရေးသားထားပါတယ်။
စစ်တပ် အာဏာသိမ်းပြီးနောက် ဘဏ် အပါအဝင် ငွေရေးကြေးရေး အဖွဲ့အစည်းများနဲ့ ငွေတိုက်ရိုက် ထည့်သွင်း အသုံးပြုရတဲ့ ဆက်သွယ်ရေးကဲ့သို့သော ဝန်ဆောင်မှု လုပ်ငန်းတွေဟာ စစ်ကောင်စီ ထုတ်ပြန်တဲ့ ဥပဒေ မူဝါဒတွေကို အကြောင်းပြပြီး ပြည်သူတွေ အပေါ်က နည်းမျိုစုံနဲ့ အမြတ်ထုတ်နေတယ်လို့ ဝေဖန်မှုတွေ ရှိနေတာပါ။
“တစ်ခါတလေ ငွေဖြည့်လိုက်ရင် မချေးထားပဲနဲ့ ချေးထားတယ်ဆိုပြီး ဖြတ်သွားတယ်။ နောက်တစ်ခါ ထပ်ဖြည့်တော့ ဝန်ဆောင်ခဆိုပြီး အတိုး ထပ်ဖြတ်တယ်။ ဒါက သက်သက်မဲ့ ဥပဒေမဲ့ ပြုမူနေတာ။ အခုခေတ်က အရင်လို မဟုတ်ဘူး၊ မတရားမှန်း သိလည်း ခံနေရတာပါပဲ။ တစ်ခါတလေ မက်စစ်တွေပို့လို့ ဝင်ကြည့်ပါဆိုလို့ ဝင်ကြည့်တယ်၊ သူတို့ အစီစဉ်တွေကို ယူမယ်မယူဘူး ဆိုတာတောင် မေးဖော် မရတော့ဘူး။ တစ်ခါတည်း ငွေကို တန်းဖြတ်တာပဲ။ တကယ့် ခေတ်ပျက်ကြီးထဲ လုပ်စားနေတဲ့ သဘောပါ” လို့ MPT ဝန်ဆောင်မှု အသုံးပြုသူ တစ်ဦးက ပြောပါတယ်။
အခုလို ဖုန်းဘေ ပိုမို ဖြတ်တောက်နေတာနဲ့ ပတ်သက်ပြီး MPT Call Center ကို မဲခေါင်သတင်းဌာနက မေးမြန်းရာမှာ ဖုန်းလက်ခံ ပြောဆိုပေမယ့် မေးမြန်းတဲ့ မေးခွန်းတွေကိုတော့ ဖြေကြားမှု မပြုနိုင်ဘူးလို့ ငြင်းဆိုခဲ့ပါတယ်။
နိုင်ငံပိုင် မြန်မာ့ ဆက်သွယ်ရေး လုပ်ငန်းနဲ့ ဂျပန် အခြေစိုက် KDDI-Sumitomo ကုမ္ပဏီတို့ ပူးပေါင်း လုပ်ကိုင်နေတဲ့ MPT ရဲ့ 3G ဖုန်းကွန်ရက်ဟာ မြန်မာနိုင်ငံရဲ့ ၉၆ ရာခိုင်နှုန်းကို လွှမ်းခြုံထားပြီး သုံးစွဲသူ သန်း ၂၀ အတွက် ဝန်ထမ်းပေါင်း ၈,၀၀၀ ကျော်နဲ့ ဝန်ဆောင်မှု ပေးနေတယ်လို့ MPT ရဲ့ လူမှုကွန်ရက် စာမျက်နှာမှာ ဖော်ပြထားပါတယ်။
